1 Yɛsu kan’tɛn naa: « Wɛy mpem abɛ ikɔ̈ɔ̈n akyɛɛr. Làsi làkwikilà amu Nzam, làsi làkwinkilà sye amu mɛ. 2 U ndwà a Taaràmɛ ikal byà mbɔɔn. Kya ilàkɔɔn akal abwɛy, mɛ in’làlakyään anki: Mɛ amàkàlalɔ̈ɔ̈n ikal. 3 Umpal in’sàkyà mɛ mukàlalɔ̈ɔ̈n ikal, mɛ insàfyefurà muyàlawal, ntɔn ikal in’wà mɛ, bɛ sye làkäl paa. 4 Mɛ, ntsü in’kyà mɛ, bɛ làkyàyöb mbwo. » 5 Tuma kàtɛn a nde naa: « Mwol, bi iyöb anki mper akyà ngye. Bi ban’kwo muyöb aben mbwo a ya? » 6 Yɛsu kun’fuur naa: « Mɛ, mɛ in’wà mbwo, ndandaa anà mɔ̈ɔ̈. Mbuur ukwo anki mukyà akà Taa ukɔɔn alyaaŋ u mbwo amɛ. 7 Ilàkal naa bɛ lan’yöb, bɛ làlàyöb sye Taaràmɛ. Fà apanà, bɛ làmun’yöb, bɛ làmun’man. »

8 Filipo kàtɛn a nde naa: « Mwol, iswɛŋ Taa, waa ya ikwo akà bi. » 9 Yɛsu kun’fuur naa: « Filipo, mɛ an’kal anà bɛ taaŋ mbɔɔn, wɛɛ ngye ŋàtan’yöb anki? Mbuur kàman’man, kan’man Taa. Ntɔn nkye an’tɛn ngye naa: "Iswɛŋ Taa"? 10 Làsi làkwikilà naa mɛ in’wà amu Taa, naa nde wà amu mɛ. Ndaa in’fàtɛn mɛ a bɛ banswà, kà mɛ ŋakwo in’fàbɔn anki, Taa awà amu mɛ afàkyer isal ande ŋakwo. 11 Làsi làkwikilà naa mɛ in’wà amu Taa, naa Taa wà amu mɛ. Naa tɛy, làsi làkwikilà ntɔn isal abi. 12 Ndandaa, ndandaa, mɛ alàkyään: mbuur awe anà làkwikilà amu mɛ, nde sye, nde asàkyer isal in’fàkyer mɛ. Nde asàkyer byàŋàsöön, ntɔn mɛ in’wàmukyà akà Taa. 13 Undiir wanswà làsàlɔm bɛ kà ikɔb amɛ, mɛ in’kyer asàkyer wa, ntɔn Taa uwɛl làkoo amu Mwan. 14 Isàkal naa bɛ lan’lɔm undiir mwɛy kà ikɔb amɛ, mɛ, mɛ in’kyer asàkyer wa.

15 « Isàkal naa bɛ làman’kwen, bɛ làsàsyääl nswɛɛŋ amɛ. 16 Waa mɛ, mɛ in’sàbɔɔn Taa, waa nde usàlatööm un’lɛɛl asin ntɔn nde ukäl anà bɛ ilä byanswà: 17 Dweelà a ndandaa mpa ban’kwo baar a mɛɛn muwal, ntɔn ba bun’manà anki, ba bun’yöb anki. Wɛɛ bɛ, bɛ làkyun’yöb, ntɔn nde wà apà bɛ, anà nde asakalà amu bɛ mbul a in’tye. 18 Mɛ in’sàlawɛy anki asànaa itii, mɛ in’kyer asàfyefurà akà bɛ. 19 Yan’saal ikikye, baar a mɛɛn bàsan’man anki, wɛɛ bɛ, bɛ làkyer asan’man ntɔn mɛ in’wà wàmɔ̈ɔ̈ anà bɛ, bɛ làsàkal bàmɔ̈ɔ̈ sye. 20 Kà ilä akin, bɛ làsàyöb naa mɛ in’wà amu Taaràmɛ, naa bɛ làbà amu mɛ anà mɛ in’wà amu bɛ.

21 « Mbuur awe anà nswɛɛŋ amɛ anà afàsyääl ya, wawun mbuur afan’kwen. Kyeka mbuur afan’kwen, Taa asàkyer un’kwen, mɛ sye in’kyer asun’kwen, waa mɛ ŋakwo in’sàmɛnà akà nde. »

22 Yudasi - kà Yudas mwan a Isikalyɔt anki - kun’fuul naa: « Mwol, ya yà aben naa ngye akyer asyemɛɛy akà bi, wɛɛ kà akà baar a mɛɛn mà anki? » 23 Yɛsu kun’fuur naa: « Isàkal naa mbuur mwɛy kàman’kwen, nde asàkaar ndaa amɛ, Taaràmɛ akyer asun’kwen. Bi isàyà akà nde, waa isàbwaay amu nde. 24 Mbuur mpa kan’kwen, ufàkyey anki ndaa amɛ. Ndaa lan’wem bɛ yi, kàyan’fà akà mɛ anki, wɛɛ yà Taa mbuur kan’töm. 25 Indiir abi, mɛ bya amàlakyään utaaŋ in’wà mɛ anà bɛ. 26 Dweelà In’kyɛɛl, un’lɛɛl, usàtɔm Taa kà ikɔb amɛ, nde asàlalɔŋ indiir byanswà, waa usàlayɔɔb ndaa yanswà kàtɛn mɛ a bɛ.

27 « Mɛ amàsàlawɛy duu, mɛ amàlapà duu amɛ. Mɛ la alapà anki asànaa bàfàpà baar a mɛɛn. Wɛy mpem a bɛ ikɔ̈ɔ̈n akyɛɛr, ikɔ̈ɔ̈n atɛɛr. 28 Bɛ làkyàwem, mɛ kàtɛn a bɛ naa: "Mɛ an’kyà anà mɛ in’kyer asàfyefurà akà bɛ". Yàlàkal naa bɛ làfàkyer an’kwen, bɛ làlàkal unsà un’sak ntɔn in’kyà mɛ akà Taa, ntɔn Taa kàman’söön. 29 Mɛ amàlawey indiir abi apanà, kusà a bya muyà, ntɔn umpal isàyà bya, waa bɛ làsàsà làkwikilà. 30 Mɛ in’sàfàyääm anki mbɔɔn anà bɛ, ntɔn mfum a mɛɛn mà wàmuyà. Itàkal abun, nde ikɔ̈b mwɛy kyatɛy udu a mɛ, 31 wɛɛ, ntɔn naa mɛɛn màyöb naa mɛ in’kwen Taa, anà mɛ in’fàkyer nswɛɛŋ kan’pɛ Taa. Làmbarà, tsweenà!