João 16:28 | Versão YNS | Bíblia Online

1 « Kàlakyään mɛ indiir abi, ntɔn bɛ làkɔ̈ɔ̈n abwiy làkwikilà abɛ. 2 Bàkyer asàlaböŋ u ndwà a nköŋ a Ayudà. Yumwɛy ayi: taaŋ làmuyà, mbuur asàladwa asàsi naa nde wàmupà ibɔɔn akà Nzam. 3 Bàsàkyer ba abà, ntɔn ba bàyöb anki itàkal Taa, itàkal mɛ. 4 Wɛɛ kàlayäm mɛ indiir abi, ntɔn umpal làsàkwo taaŋ, bɛ, bɛ làsàyɔbà naa mɛ, mɛ kàkyàlayäm ya.

Isal a Dweelà Inkyɛɛl

« Mɛɛ ya kàlasam anki fà nsɛmà, ntɔn mɛ kàkälà anà bɛ. 5 Apanà, mɛ in’wàmukyà akà mbuur kan’töm, wɛɛ akà mwɛy uboo a bɛ kan’fuul anki naa: "Ngye ken akyà?" 6 Wɛɛ, ntɔn amàlasam mɛ abà, undiir awun mpem abɛ yan’yɔl ya a ngyɛb. 7 Mpalabà, mɛ amàlasam ubwaŋàbwaŋ: yan’söön mfun akà bɛ naa mɛ, mɛ in’kyen. Wɛɛ kya mɛ impàkyà anki, un’lɛɛl akwà alàyà mukàlabay, uyàfàyà anki akà bɛ. Wɛɛ isàkal naa mɛ an’kyà, mɛ in’kyer asàlatööm awà. 8 Waa mpal usàyà nde, nde asàswaŋ ubwaŋàbwaŋ muyöb man’be aba, balàbal anà nsaŋ a Nzam. 9 U ndaa iler man’be, ntɔn ba bàfàsà anki làkwikilà amu mɛ, 10 u ndaa iler balàbal, ntɔn mɛ in’kyà akà Taa anà bɛ làfàsan’man anki, 11 u ndaa iler nsaŋ, mfum afàyaal mɛɛn bàyun’tsüül nsaŋ. »

12 « Mɛ, mɛ in’we anà indiir mbɔɔn mukàlasam, wɛɛ papanà bɛ làkwo anki mukaar bya u mpem abɛ. 13 Utaaŋ usàyà Dweelà a ndandaa, nde asàlatwaal unsà ndandaa yanswà. Ntɔn nde usàtɛn anki kà ukwen ande ŋakwo, nde asàtɛn ndaa yanswà usàwem nde anà asàkyään ndaa yanswà isàyà. 14 Nde asan’sà làkoo, ntɔn nde asàwal ndaa amɛ, waa usàlakyään ya. 15 Indiir byanswà abyà byàtaa, bya sye byà byàmɛ. Undiir awun in’tɛn mɛ naa Dweelà asàwal unsà byàmɛ, waa usàlakyään bya.

Ngyɛb isàbulà un’sak

16 « Itaan a mbɔɔn tɛy, bɛ làsàfan’man anki, apan sye, ungö a taaŋ ikikye, bɛ làkyer asàfan’man. » 17 Apan, amwɛy uboo a alɔŋki ande bàtɛɛnà ba a ba naa: « Ininà nde ukwen mutɛn a bi naa: "Itaan a mbɔɔn tɛy, bɛ làfàsan’man anki, apan sye, ungö a taaŋ ikikye, làkyer afàsan’man", anà sye: "Ntɔn mɛ in’kyà akà Taa"? 18 "Taaŋ ikikye" utɛɛnà nde ikaswaŋà aben? Bi ikayöbà anki naa ininà nde utɛɛnà! » 19 Yɛsu kàyöb nde naa ba bàkwen mukun’fuul, waa kàtɛn a ba naa: « Bɛ làbàmuleŋ uboo a bɛ muyöb naa mɛ ininà in’kwen mutɛn: "Itaan a mbɔɔn tɛy, bɛ làfàsan’man anki, apan sye, ungö a taaŋ ikikye, bɛ làkyer afàsan’man." 20 Ndandaa, ndandaa, mɛ alàkyään, bɛ, bɛ làkyer asàlel anà làsàsà un’saabà, mpal isàkal mɛɛn musaŋ. Bɛ làsàkal u ngyɛb, wɛɛ ngyɛb abɛ isàbulà un’sak. 21 Umpal ufàkal un’kaar anà in’swaŋ, mpem ande ifàkal udu udu ntɔn taaŋ ande lan’kwo. Wɛɛ isàkal naa nde kan’bɔr, nde afàdiimà usaay abà banswà, waa usaŋ ntɔn kan’bɔr nde mwan. 22 Lalan ŋàbawà bɛ làbà u ngyɛb mbɔɔn. Wɛɛ mɛ, mɛ in’kyer afàsàlaman, mpem abɛ isàkal unsà un’sak, mbuur asàladuum wa watɛy.

23 « Abun, ilä akin, akà undiir mwɛy bɛ làfàsan’fuul anki. Ndandaa, ndandaa, mɛ alàkyään, undiir wanswà làsàlɔm bɛ akà Taa, nde akyer asàlapà wa kà ikɔb amɛ. 24 Tii apanà, akà undiir mwɛy bɛ ŋàtàlɔm anki kà ikɔb amɛ. Làlɔ̈m, waa bɛ làsàwal, ntɔn un’sak abɛ ukàl wàŋàkwo. »

Yɛsu kan’tɛn kà imɛɛy a alɔŋki

25 « Indiir abi mɛ kàtɛn a bɛ unsà nsim. Taaŋ làmuyà, alà mpa in’fàsàlasam mɛ abà, wɛɛ alà in’sàlakyään mɛ kà imɛɛy ndaa iler Taa. 26 Ilä akin, bɛ làsàlɔm akà Taa kà ikɔb amɛ, mɛ in’tɛn anki naa mɛ in’sàlalɔ̈ɔ̈m akà Taa, 27 ntɔn Taa akyàlakwen nde ŋakwo, ntɔn lan’kwen bɛ anà làsi bɛ làkwikilà naa mɛ kàfü akà Nzam. 28 Mɛ, mɛ kàtoo amu Taa, waa mɛ kàyi u mɛɛn. Apanà, mɛ in’wàmulwomà u mɛɛn anà mufurà akà Taa. » 29 Alɔŋki bàtɛn a nde naa: « Le, apanà ngye an’tɛn kà imɛɛy, ukɔɔn asyääl nsim. 30 Apanà bi kan’yöb naa ngye ayöb indiir byanswà, anà ngye mfun yatɛy naa mbuur kafuul ndaa. Undiir awun waa bi kan’sà làkwikilà naa ngye an’fà akà Nzam. » 31 Yɛsu kafuur naa: « Nkye apanà bɛ lan’sà làkwikilà? 32 Le, taaŋ làmuyà, apanà la lan’kwo, alà làsàtà bɛ upay, mbuur mbuur a mbwo ande, làsan’wɛy bɛ aŋàyen. Wɛɛ mɛ kà in’wà aŋàyen anki, ntɔn Taa wà anà mɛ. 33 Amàlakyään mɛ indiir abi ntɔn bɛ làkäl anà duu amu mɛ. Bɛ làbà uboo a lingyoomà u mɛɛn mà. Wɛɛ làkäl anà un’kanà, mɛ, mɛ mɛɛn akyun’wal iböŋ! »

Bíblia Online

João 16

Veja também

Oração para pedir a Deus que aumente a fé quando o coração está cheio de dúvida

7 atitudes que agradam a Deus segundo a Bíblia