1 Yɛsu kàkyen mɔŋ a In’te a olive. 2 Ututu tutu, nde kàyàfurà u ndwà a Nzam. Un’sɛŋ a baar wanswà kàyi akà nde, nde waa kàbwaay, waa kàsɛmà mulɔŋ. 3 Apan, alɔɔŋ a Un’kɔɔn anà Amfarisi bun’twääl un’kaar mwɛy bàkör ba wàmutà inswem, waa bun’tɔɔl uboboo a baar banswà, 4 waa bàtɛn a Yɛsu naa: « Un’lɔɔŋ, un’kaar wà bàmun’kɔr wàmutà inswem. 5 Unsà un’kɔɔn, Mɔsɛ kà iswɛŋ mutà akaar a tub abà in’kul. Waa ngye, ngye an’tɛn aben bà? »

6 Bàtɛɛnà ba abà ntɔn ba bun’lwɛb ndaa, anà ba bàkäl anà undiir ban’kwo ba mukun’füün. Wɛɛ Yɛsu waa kàtsüüm, kàsɛmà mubaar in’dyärà a làpin u mɛɛn. 7 Ntɔn bàsi ba muküünà mukun’fuul, Yɛsu kàsuub un’tswe, waa kàtɛn a ba naa: « Isàkal naa apà we anà mbuur mwɛy uboo a bɛ mpa aŋàtàkyer man’be akà ikikye, wɛy nde kun’käm un’kul atàtwɛb. » 8 Ungö, kàfàtsüüm nde, nde kàsön u mɛɛn. 9 Ungö bàwem ba ndaa ayi, ba bàsɛmà mutà upay umwɛy umwɛy, semà akà andweer. Wɛɛ Yɛsu kàsàsal aŋàyen, un’kaar kàkyàmbar kusà a nde. 10 Apan, Yɛsu kàsuub nde un’tswe, waa kun’fuul naa: « Un’kaar, bàken ba? Nkye akà mbuur akyapà ikwàndwà? » – 11 Nde kàfuur naa: « Ŋaa, Mwol, akà mbuur. » Waa Yɛsu kàtɛn a nde naa: « Mɛ sye, mɛ apà anki ikwàndwà. Kyen, twon an’fàkyer man’be. »

12 Yɛsu kàfàtɛn a ba naa: « Mɛ, mɛ in’wà pɛɛlà a mɛɛn. Mbuur ayan’lab, nde usàkyà anki u mpib akà ikikye, nde asàwal pɛɛlà làfàpà mɔ̈ɔ̈. » 13 Apan, Amfarisi bàtɛn a nde naa: « Ngye, ngye awàmutà imbäl angye ŋakwo. Imbäl angye kà kyà ndandaa anki. » 14 Yɛsu kafuur naa: « Yà ndandaa naa mɛ, mɛ in’wàmutà imbäl amɛ ŋakwo. Imbäl amɛ kyà ndandaa, ntɔn mɛ in’kyàyöb naa mɛ an’fà ken anà mɛ sye in’kyà ken. Wɛɛ bɛ, bɛ làyöb anki naa mɛ an’fà ken anà mɛ sye in’kyà ken. 15 Bɛ, bɛ nsaŋ làfàtsul unsà imbuur. Wɛɛ mɛ, mɛ in’fàtsüül anki mbuur nsaŋ. 16 Mpalabà, isàkal naa mɛ in’kyer atsul nsaŋ, ntsüül a nsaŋ amɛ yà balàbal, ntɔn mɛ kà in’wà aŋàyen anki, wɛɛ mɛ in’wà anà Taa, mbuur awà kan’töm. 17 Bàsön unsà Un’kɔɔn abɛ ŋakwo naa bàfàtɔn anki imbäl a baar bɔ̈ɔ̈l. 18 Mɛ, mɛ in’fàtà imbäl amɛ ŋakwo, Taa awà kan’töm afan’tɛɛl sye imbäl. » 19 Apan ba bàtɛɛnà a nde naa: « Wàken Taaràŋà wa? » Yɛsu naa: « Bɛ, bɛ mɛ lan’yöb anki, itàkal Taaràmɛ, bɛ lun’yöb anki. Ilàkal naa bɛ lan’yöb, bɛ sye Taaràmɛ làkyer alun’yöb. »

20 Ndaa ayi, Yɛsu ya kàtɛɛnà umpal kàlɔɔŋà nde u ndwà a Nzam, kà ikal a insak a an’kab. Akà mbuur mwɛy kàkwe anki mukun’kɔr, ntɔn taaŋ ande làkäl aŋàkwo anki.

21 Yɛsu kàfàtɛn a ba naa: « Mɛ, mɛ in’kyer ayàkyà, bɛ làkyer ayan’leŋ, wɛ bɛ, bɛ làsàkwà unsà ube abɛ. Bɛ làkwe anki mukyà mper in’kyà mɛ. » 22 Apan amfum a Ayudà bàtɛɛnà naa: « Nkye nde we anà an’kyän mudwa nde ŋakwo, ntɔn nde wàmutɛn naa: "Bɛ làkwe anki mukyà mper in’kyà mɛ"? » 23 Yɛsu kafuur naa: « Bɛ, bɛ làbà baar a indiir a mɛɛn mà. Wɛɛ mɛ, mɛ in’wà mbuur a indiir a dudu. Bɛ, bɛ làbà baar a mɛɛn mà, wɛɛ mɛ, mɛ kà in’wà mbuur a mɛɛn mà anki. 24 Undiir awun in’tɛn mɛ a bɛ naa bɛ làsàkwà unsà man’be abɛ. Abun, isàkal naa bɛ làkyey anki naa "Mɛ In’wà", bɛ làsàkwà unsà man’be abɛ. » – 25 Ba bun’fuul naa: « Ngye, ngye awà nà? » Yɛsu kafuur naa: « Mbuur akwà kàlakyään mɛ fà nsɛmà. 26 Mɛ, mɛ in’we anà indiir mbɔɔn mutɛn anà mutsul nsaŋ ntɔn bɛ. Wɛɛ mɛ in’fàkyään u mɛɛn nà ya akwà kàwem mɛ akà mbuur kan’töm, nde afàtɛn ndandaa. »

27 Wɛɛ ba bàyöbà anki naa nde ba kasaamà ntɔn Taa. 28 Apan, Yɛsu kàtɛn naa: « Utaaŋ làsàsɛɛn bɛ Mwan a mbuur, bɛ laa làsàyöb bɛ naa "Mɛ In’wà", anà mɛ in’fàkyer anki undiir kà ukwen amɛ ŋakwo: mɛ in’fàtɛn ya akwà kan’lɔŋ Taa. 29 Mbuur kan’töm wà anà mɛ: nde kan’wɛy anki aŋàyen, ntɔn mɛ, taaŋ lanswà mɛ in’fàkyer indiir ufàkwen nde. » 30 Umpal kàkäl nde mutɛɛnà abà, baar mbɔɔn bàsi làkwikilà amu nde.

31 Abun Yɛsu kàtɛn a Ayudà abà bàsi làkwikilà amu nde naa: « Isàkal naa bɛ, bɛ lan’lam u ndaa amɛ, ndandaa bɛ làbà alɔŋki amɛ. 32 Abun, bɛ làsàyöb ndandaa, waa ndandaa isàlabuul baar a nsaay. » 33 Ba bun’fuur naa: « Bi, bi ibà itoo a Abàlam, bi kàsàkal anki asɔ a mbuur mwɛy akà ikikye. Aben ngye, ngye atɛɛnà naa: "Bɛ làsàbulà baar a nsaay"? » 34 Yɛsu kafuur naa: « Ndandaa, ndandaa mɛ alàkyään: mbuur wanswà afàkyer man’be, nde wà un’sɔ a man’be. 35 Un’sɔ ufàbwaay anki ipepey u ndwà, wɛɛ mwan afàbwaay ipepey kwo. 36 Abun, isàkal naa Mwan kàmàlakɔɔr, bɛ làsàkal baar a nsaay bàndandaa. 37 Mɛ in’kyàyöb naa bɛ làbà itoo a Abàlam, wɛɛ bɛ làfàleŋ mukan’dwa, ntɔn ndaa amɛ ifàlatwà anki u mpem. 38 Mɛ, mɛ in’fàtɛn indiir kàmɛn mɛ akà Taa. Wɛɛ bɛ, bɛ làfàkyer indiir làwem bɛ akà taaràbɛ. » 39 Ba bun’fuur naa: « Abàlam wà taaràbi. » Yɛsu naa: « Kya bɛ làlàkal baan a Abàlam, bɛ làlikyerà isal a Abàlam. 40 Wɛɛ apanà, bɛ, bɛ làleŋà mukan’dwa, mɛ mbuur kàlakyään ndandaa ayà kàwem mɛ akà Nzam. Abàlam kàkyer anki abà! 41 Wɛɛ bɛ, bɛ làfàkyer isal a taaràbɛ. » Ba bun’fuur naa: « Bi kà ibà baan a inswem anki. Bi ibye awà Taa mwɛy mpɛl, Nzam. » 42 Yɛsu kafuur naa: « Yàlàkal naa Nzam wà Taaràbɛ, bɛ làlàkyer an’kwen. Ntɔn mɛ, mɛ an’too amu Nzam anà mɛ sye an’fà kwo. Mɛ, mɛ kàyi anki a ukwen amɛ ŋakwo, wɛɛ Nde kan’töm. 43 Ntɔn nkye mpa làkayöbà bɛ ntɛɛn amɛ? Ntɔn bɛ, bɛ làkwe anki muwem ndaa amɛ. 44 Bɛ, taaràbɛ ileŋ, bɛ làfàkwen mukyer ngyal a taaràbɛ. Nde wun’dwää fà nsɛmà, nde kàsàtsim anki uboo a ndandaa, ntɔn ndandaa amu nde yatɛy. Umpal ufàtà nde loor, nde la afàwal uboo a indiir ande ŋakwo, ntɔn nde wà ŋaloor anà taar a loor. 45 Wɛɛ, mɛ in’fàtɛn ndandaa, undiir awun mpa làfan’sà bɛ làkwikilà. 46 Nà uboo abɛ kan’kwo mukan’swaŋ naa mɛ an’kyer man’be? Ntɔn nkye lan’kɔɔn bɛ mukan’sà làkwikilà isàkal naa mɛ an’tɛn ndandaa? 47 Mbuur awà mbuur a Nzam, afàwem ndaa a Nzam. Wɛɛ bɛ, bɛ làfàwem anki, ntɔn bɛ kàlàbà baar a Nzam anki. »

48 Ayudà bun’fuur naa: « Nkye bi iböŋ kyatɛy mutɛn naa ngye awà un’nsi Samalya, anà ngye sye awe anà unsɔŋà? » – 49 Yɛsu kàfuur naa: « Mɛ, mɛ unsɔŋà watɛy. Wɛɛ mɛ, mɛ in’wàmusyäŋà Taaràmɛ. Wɛɛ bɛ, bɛ làkun’syäŋà anki. 50 Mɛ, mɛ in’fàleŋ anki làkoo amɛ ŋakwo. We anà mbuur afàpà la anà afàtsul mbar. 51 Ndandaa, ndandaa, mɛ alàkyään: isàkal naa mbuur kan’kaar ndaa amɛ, nde usàkwà anki akà ikikye. »

52 Apan, Ayudà nsil abà bàtɛn a nde naa: « Apanà, bi kan’yöb naa ngye awe anà unsɔŋà! Abàlam kàkyàkwà anà aŋangɔɔm sye, wɛ ngye atɛn naa: "Isàkal naa mbuur an’kaar ndaa amɛ, nde usàkwà anki akà ikikye." 53 Nkye ngye, ngye an’söön taaràbi Abàlam awà kàkü itaan? Aŋangɔɔm sye bàkyàkwà! Ngye, ngye akasii naa ngye awà nà? » 54 Yɛsu kafuur naa: « Isàkal naa mɛ, mɛ in’fàsà làkoo akà mɛ ŋakwo, la ndöŋ latɛy. Mɛ, mɛ in’fàsà làkoo a Taaràmɛ, nde akwà làfàtɛn bɛ naa: "Nde wà Nzam abi". 55 Bɛ nde lun’yöb anki, wɛɛ akà mɛ, mɛ in’kyun’yöb. Kya mɛ in’sàtɛn naa mɛ un’yöb anki, mɛ in’sàkal mbuur a loor asànaa bɛ. Mɛ in’kyun’yöb anà mɛ sye in’fàkaar ndaa ande. 56 Taaràbɛ Abàlam kàkäl kà un’sak unsà an’kyän muman ilä amɛ: nde kàkyàman kya, waa kàkü unsà un’sak. » 57 Ayudà waa bàtɛn a nde naa: « Nkye ngye akà mbul an’kwem an’tyeen awe ayà, waa ngye kàmɛn Abàlam! » 58 Yɛsu naa: « Ndandaa, ndandaa, mɛ alàkyään: kusà a mböör a Abàlam, "Mɛ In’wà". » 59 Apan, ba b 1 bür in’kul ntɔn mukun’kam. Wɛɛ Yɛsu laa kàkàyee nde, waa kàtoo u ndwà a Nzam.