YWAN 9

Yɛsu kan’kɔɔr ikwàmii fà mböör ande

1 U mbwo, Yɛsu kàmɛn baal mwɛy wàŋàkwàmii fà mböör ande. 2 Alɔŋki ande bun’fuul naa: « Rabi, nà kàkyer man’be ntɔn nde bun’bör wàŋàkwàmii, nkye nde lɛɛ aböör ande? » 3 Yɛsu kàfuur naa: « Kà nde anki, itàkal aböör ande, wɛɛ ntɔn isal a Nzam imɛnà amu nde. 4 Ibà bi pà u mwäänà, bi ikyer isal a mbuur kan’töm. Làpib làmubwà, taaŋ mpa usal mbuur. 5 Umpal in’wà mɛ pà u mɛɛn, mɛ in’wà pɛɛlà a mɛɛn. » 6 Ungö mutɛn indiir abi, nde kàtsül an’te u mɛɛn, kàkyer twar, waa kàkiir la u mii a ikwamii, 7 waa kàtɛn a nde naa: « Kyen, kaywɛb kà itɛy a Silɔwɛ. » Ikɔb aki ikaswaŋà naa « Ntööm ». Ikwàmii kàkyen kwo, kàywɛy ntabwey, waa kàyimanà mpal kàyàfurà nde. 8 Baar a tsütsü anà nde anà baar bàfun’manà kusà wàmulɔlɔm, bàfuulà naa: « Nkye wà kà mbuur akwà kàkälà wà aŋàbwaay anà kàfalɔ̈lɔ̈mà anki? » 9 Amwɛy bàtɛɛnà naa: « Awà nde. » Bumwɛy naa: « Awà kà nde anki, mbuur asin kàmufwän. » Wɛɛ ikwàmii kàkyey naa: « Ndandaa, wà mɛ. » 10 Abun, ba bun’fuulà naa: « Mii angye myan’dubà aben? » 11 Nde kàfuur naa: « Mbuur awà bàfàbel Yɛsu kàkyer twar, kan’kiir la u mii, waa kàtɛn a mɛ naa: "Kyen Silɔwɛ, kaywɛb". Apan sye in’kyen mɛ, in’ywɛb mɛ, waa in’bulà muman! » 12 Ba bun’fuul naa: « Nde wàken, mbuur wa? » Nde kàfuur naa: « Mɛ in’yöb anki. »