Lucas 16

Ŋun’naaŋ anà Lazar

19 « Taaŋ mwɛy kàkäl anà ŋun’naaŋ mwɛy kàfàbwaarà ubwaŋàbwaŋ ipfɛy a ntal. Ilä byanswà isal ande udyà anà utaam. 20 Ŋàlàmbwà mwɛy ikɔb ande Lazar kàfabɔ̈ɔ̈nà u mun a làpaŋ a ŋun’naaŋ awà, nde kàkäl anà inkyar u ndür ande. 21 Nde kàlàkwen mudyà mfür a mampà yàbwee u mɛsà a ŋun’naaŋ. Apan sye mbwà yàyee mulɛɛr inkyar ande. 22 Yàmɛnà naa ŋàlàmbwà waa ukü, akyeey a Nzam laa bun’syen ba akà Abàlam. Ŋun’naaŋ sye waa ukü, waa bun’dyee. 23 Kà an’lɔŋ, ŋun’naaŋ kàkäl uboo a mpay yà mbɔɔn. Mpal kàler nde u du laa kàmɛn nde ukwɛl Lazar tsütsü apà Abàlam. 24 Apan nde kàlaal in’kwɛŋ: "Taaràmɛ Abàlam, ngwem ngyɛb! Tɔm Lazar, nde udüma nswɛŋ a làpin ande kà an’dà, nde kan’nɔ̈ lànyaŋ a an’dà u làlem amɛ, ntɔn mɛ in’wà u mpay mbɔɔn uboo a mbaa yi." 25 Wɛɛ Abàlam kun’fuur naa: "Mwan amɛ, yɔbà ubwaŋ banswà kàmɛn ngye u mɔ̈ɔ̈ angye taaŋ kàkäl ngye u mɛɛn, wɛɛ Lazar kàkäl u mpay taaŋ lanswà. Mpalabà, apà, Lazar wà kà un’sak, wɛɛ ngye awà u mpay aŋasöönà. 26 Yumwɛy ayi: Uboo a bi anà bɛ we anà un’baan a kölàköl. Ilàtàkal naa ukwen bàkäl, bi ikwe anki musoonà wa, itàkal naa mufà akà bi muyà akà bɛ, itàkal naa mufà akà bɛ muyà akà bi." 27 Ŋun’naaŋ waa kàtɛn naa: "Isàkal abwɛy, mɛ amabɔɔn, taa, tɔm Lazar u ndwà a taaràmɛ, 28 ntɔn mɛ in’we abà atɔŋ abaal atyeen, nde ukakyään, manà ba sye bàyàlab mbwo a mpay ayi." 29 Abàlam naa: "Atɔŋ angye bye anà Mɔsɛ anà aŋangɔɔm, wɛy ba bawem." 30 Nde naa: "Ŋaa, taa Abàlam, manà mbuur kan’fà an’lɔŋ, kan’kyà akà ba, ba bàkyer ayàbuul mpem." 31 Abàlam waa kun’fuur naa: "Isàkal naa ba bàkwe anki muwem Mɔsɛ anà aŋangɔɔm, ba sye bàyàkwo anki muwem akà ikikye mbuur kan’fà an’lɔŋ." »