LUKÀ 2

Yɛsu bàmàkun’swaŋ u ndwà a Nzam

22 Apan, taaŋ mupöŋ ndür làkwe la ntɔn Yɔsefi anà Màlye asànaa kàswɛŋà un’kɔɔn a Mɔsɛ, ba bàsyen mwan u ndwà a Nzam a Yɛlusàlɛm ntɔn mukun’swaŋ akà Mwol, 23 ntɔn bàsön uboo a un’kɔɔn a Mwol abà: « Mwan baal a nswɛm wanswà bun’sà ukɔl ntɔn Mwol. » 24 Yàlɔ̈m sye naa ba bàpɛ ibɔɔn asànaa ukalɔɔmà un’kɔɔn nsil awà, « nkokà un’kyay anà un’dim, itàkal in’tö a an’yem myeel. »

25 U Yɛlusàlɛm kàkäl anà mbuur mwɛy ikɔb ande Simɛyɔ. Mbuur awà kàkäl wàbalàbal anà inzaam, nde kàfadilà mbuur ayàlwom ngyɛb a Isàlɛl. Dweelà In’kyɛɛl kàkäl anà nde, 26 waa kun’kyään naa nde usàkwà anki kusà muman Klistɔ a Mwol. 27 Dweelà kun’syen u ndwà a Nzam. Umpal bàyàtwaal aböör a Yɛsu mwan aba ntɔn mukyer ndaa kàlɔ̈ɔ̈mà un’kɔɔn, 28 Simɛyɔ kun’wɛl kà an’kɔɔ ande, waa kàsyäŋà Nzam, waa kàtɛn naa:

29 « Mwol, mpalàbà ngye an’kwey ilää angye:

ngye an’kwo awɛy un’tsüüŋ angye ukü a duu.

30 Ntɔn mɛ an’man Un’tswää a mɔ̈ɔ̈ amɛ u mii,

31 Un’tswää a mɔ̈ɔ̈ kàlɔ̈ɔ̈n ngye ntɔn in’sɛŋ myanswà,

32 Nde wà pɛɛlà ntɔn mupà kyɛɛy akà in’sɛŋ a mɛɛn anà nde asàkal làkoo ntɔn un’sɛŋ angye Isàlɛl. »

Ngɔɔm a Simɛyɔ

33 Taarànde anà ngwän bàkäl mubem indiir kàtɛɛnà Simɛyɔ ntɔn Yɛsu. 34 Simɛyɔ kun’si kɔɔ, waa kàtɛn a Màlye ngwän a Yɛsu naa: « Le! Mwan wà ayàkal mbuur ayàtyeey, taaŋ lumwɛy ayàmbaar baar mbɔɔn kà Isàlɛl. Nde ayàkal isi a Nzam iyàtwaal nkaabà, 35 abun an’kyän aŋàyee u mpem a baar mbɔɔn màsàmɛnà u leŋ. Wɛɛ akà ngye ŋakwo Màlye, usaay bàsapfuul mpem asànaa kɔm. »

Anà, ŋangɔɔm un’kaar

36 Kàkäl sye anà ŋangɔɔm un’kaar ikɔb ande Anà, mwan a Fanwel, mbuur a un’sɛŋ a Asɛr. Nde kàkäl un’nün. Nde kàkäl mbul nsambwaar anà un’dim kàbääl nde kà isyee ande, 37 ungö, nde kàbulà un’kweel un’dim. Nde kàkäl ayà mbul an’kwem naan aŋinà. U mɔ̈ɔ̈ ande wanswà nde kàbwaayà u ndwà a Nzam musyäälà Nzam mpib anà mwäänà: nde kàkälà mukin mbɔr anà muyamà. 38 Nde kàyàkɔlà sye taaŋ nsil alan, wàmuyisyäŋà Nzam. Nde kàkäl mukyään ndaa a Yɛsu akà baar banswà bàkälà mudilà naa Nzam ukɔɔr Yɛlusàlɛm.