1 Yàmɛnà naa ilä a saba mwey, Yɛsu kàkäl mulyaaŋ uboo a an’ywaŋ a blɛ. Alɔŋki ande bàbwee imfà, ungö mupfipfiy bya kà an’kɔɔ aba, waa bàdyee mbɛŋ a bya. 2 Amfarisi amwɛy bàkäl paa bàtɛn a ba naa: « Ntɔn nkye làkyerà bɛ ndaa mpa bàfàkyer kà ilä a saba? » 3 Yɛsu kafuur naa: « Nkye bɛ làtäŋ anki ndaa kàkyer David mpal kàwem nde ngyal anà baar bàkäl anà nde? 4 Nde kàbilà u ndwà a Nzam, kàwɛl mampà ufàpà ibɔɔn akà Nzam laa kàdi nde, mumwɛy nde kàpɛ akà baar bàkäl anà nde, itàkal naa ma angaŋ mpɛl bàfàdyà. » 5 Nde waa kàfàkwɛy abà: « Mwan a mbuur wà mfum a saba. »

6 Yàmɛnà sye naa ilä a saba kyumwɛy Yɛsu kàbilà u ndwà a nköŋ a Ayudà, waa kàlɔɔŋà. Uboo kwo kàkäl anà mbuur kàkäl anà kɔɔ ibaal làŋàkwɛkà. 7 Alɔɔŋ a in’kɔɔn anà Amfarisi bàkäl musyebà Yɛsu a duu ntɔn muyöb naa nkye nde akyer akɔɔr mbuur ilä a saba, ntɔn ba bun’bämà ndaa. 8 Wɛɛ nde kàkyer ayöb an’kyän aba, waa kàbel mbuur kàkäl anà kɔɔ aŋàkwɛkà: « Mbarà, mbar uboboo pà. » Mbuur awà waa kàmbarà, waa kàmbär uboboo a baar. 9 Yɛsu waa kafuul naa: « Mɛ in’kwen muyöb: Nkye yubwaŋ mukyer ubwaŋ lɛɛ mukyer ube ilä a saba? Mutswà mɔ̈ɔ̈ a mbuur lɛɛ mukɔɔn atswà wa ilä a saba? » 10 Ungö apan, Yɛsu kàler ba banswà, waa kàtɛn a mbuur awun naa: « Sen kɔɔ angye. » Nde sye waa kàsen la, laa làkɔɔrà la. 11 Alɔɔŋ a Un’kɔɔn anà Amfarisi bàwem nkyɛl, waa bàsɛmà mutɛn ba a ba naa ba ininà bàkyer akà Yɛsu.

12 Mpal ayin Yɛsu kàlär udu a mɔŋ ntɔn mukàyamà. Nde kwo kàkyer mpib aŋun’kiinà muyamà Nzam. 13 Taaŋtyà, nde kàbel alɔŋki ande, waa kàsɔ̈ɔ̈l kwem aŋiyweel uboo a ba, nde kapɛ ikɔb naa antööm: 14 Simɔn, nde kun’pɛ ikɔb a Petɔlà, un’tɔŋ ande Andrɛ, Zyak, Ywan, Filipo, Bàtelàmay, 15 Màtay, Tuma, Zyak mwan a Alfɛ, Simɔn mbuur a mankay, 16 Yudà mwan a Zyak, anà Yudas Iskaryɔt, mbuur ayun’yälà.

17 Ungö apan nde kàyàtyà anà ba, waa bàmbär kà ikal mwɛy kyà ibär, ikal bàkäl alɔŋki ande mbɔɔn anà un’kàbɔ a baar: baar a Yuday lanswà, bà Yɛlusàlɛm, anà baar bàfü un’kɔɔl a an’dà, a Tir anà Sidɔn. 18 Ba bàyi ntɔn mukun’wem anà ba bàkɔɔrà unsà an’kyal aba. Baar bàkäl anà an’dweelà an’be, bàkyer akɔɔrà. 19 Baar banswà bàleŋà muba nde u ndür, ntɔn ngwal mbɔɔn yàkatoo u ndür ande, ya yàkɔɔrà ba banswà.

20 Apan Yɛsu kàler alɔŋki ande, waa kàtɛn naa:

« Un’sak akà bɛ aŋàlàmbwà, ntɔn imwol a Nzam kye anà bɛ!

21 Un’sak akà bɛ baar làwe anà ngyal mpalàbà,

ntɔn bɛ làkyer asàyuur!

Un’sak akà bɛ baar làlelà ŋàbawà,

ntɔn bɛ làkyer asàsɛ!

22 « Un’sak asàkal akà bɛ isàkal naa ba bàmàlàyiiŋ, bàmàlàböŋ, bàmàlato, bàmàlapiy asànaa undiir a ŋingyäy ntɔn Mwan a mbuur! 23 Làkäl unsà un’sak mpal isàkwo ndaa ayin ntɔn bweel abɛ làsàkal mbɔɔn u du, ntɔn bànkaa aba bàkyerà abà akà aŋangɔɔm. »

24 « Wɛɛ ngyɛb akà bɛ, aŋun’naaŋ, ntɔn bɛ ndɛɛl abɛ lan’wal nsil apà.

25 Ngyɛb akà bɛ baar lan’yuur mpalàbà,

ntɔn bɛ làsàwem ngyal.

Ngyɛb akà bɛ baar làsɛɛ mpalàyi,

ntɔn bɛ làsàkal kun’saabà anà uboo a ilel.

26 Ngyɛb, isàkal naa baar bàfàtɛn ndaa aŋàbwaŋ mpɛl akà bɛ, ntɔn bànkaa aba bàkyerà abà akà aŋangɔɔm a loor.

27 « Wɛɛ bɛ baar banswà làweemà mɛ, mɛɛ alàkyään abà: Lakwen ayiiŋ abɛ, làkyer ubwaŋ akà baar bàfàlakyer ube, 28 làfuum làpɛɛm akà baar bàfàlaküül anà làyamà ntɔn baar bàfàlatwee. 29 Isàkal naa mbuur kàmapà mbar u twam, fàlɛɛ twam lumwɛy. Isàkal naa mbuur kan’gyɔɔr inkur angye, twon amun’tsuŋ muwal kàzak angye. 30 Pà akà mbuur wanswà kan’lɔm, wɛɛ twon an’lɔm undiir angye akà mbuur kan’gyɔɔr wa. 31 Undiir wanswà akwen ngye naa baar bàkyer akà ngye, kyer abun sye akà baar bumwɛy. 32 Isàkal naa ngye afàkwen baar bàfakwen, ngye bweel nà an’wal uboo kwo? Baar abɛ sye bàfàkwen baar bàfakwen. 33 Isàkal naa ngye ubwaŋ afàkyer akà baar bàfakyer ubwaŋ, ngye bweel nà an’wal uboo kwo? Baar abɛ sye bàfàkyer abun. 34 Isàkal naa ngye afàsɔɔm baar an’sà ngye làkyän naa ba bàkyer asafuur, bweel nà ngye an’wal? Ntɔn baar abɛ sye bàfàpà akà baar abɛ ntɔn ba sye bàfàwal asànaa ban’pà ba. 35 Làkwen ayiiŋ abɛ, làkyer ubwaŋ, làpɛ ukɔɔn adil bweel. Waa bweel abɛ làsàkal làkölàköl, bɛ sye làsàkal baan a Mwol a du, ntɔn nde afàswaŋ ubwaŋ ande akà baar bàfàfuur ube kà ikal a ubwaŋ anà akà baar abɛ. 36 Làkäl baar aŋàyɔl a ukwen ntɔn Taaràbɛ wàŋàyɔl a ukwen. »

37 « Twon lan’tsüül baar nsaŋ, waa bɛ sye mpa bàsàlatsüül nsaŋ. Twon lan’pà baar ikwàndwà, waa bɛ sye mpa bàsàlapà ikwàndwà. Làdwääl nkul, waa bɛ sye bàsàladwääl nkul. 38 Làpɛ, waa bɛ bàsàlapà: bàsàyööl mpàkɔr a kölàköl a ipfɛy abɛ a mbäl aŋàbwaŋ, yàŋàkinà, yàŋàndyeer, yàŋàpää. Ntɔn Nzam an’kab ande akà bɛ nde asàsi unsà isii làfàsyääl bɛ ntɔn baar bumwɛy. »

39 Yɛsu kàfàtɛn a ba u itim naa: « Nkye ikwàmii kan’kwo musyen ikwàmii wumwɛy? Nkye ba bàbɔ̈ɔ̈l bàkàbwà anki u fu? 40 Un’lɔŋki ukwe anki mulyaaŋ un’lɔɔŋ ande. Wɛɛ un’lɔŋki afàsyääl ndaa a un’lɔɔŋ ande afàbulà asànaa un’lɔɔŋ ande. 41 Ntɔn nkye amanà ngye isɛrà a un’lɛŋ akyà u dii a un’tɔŋ angye, wɛ ngye amanà anki kyɔɔl là u dii angye? 42 Ngye an’kwo aben mutɛn a un’tɔŋ angye naa: "Un’tɔŋ, yà mɛ alwom isɛrà a un’lɛŋ ki u dii angye", ngye mbuur mpa akamanà kyɔɔl alà u dii angye? Mbuur a mpem yweel, twab atàlwom kyɔɔl là u dii angye, ungö apan ngye waa ayàman ubwaŋàbwaŋ ntɔn ngye alwom isɛrà a un’lɛŋ ki u dii a un’tɔŋ angye. »

43 Yɛsu kàfàtɛn naa: « Un’te aŋàbwaŋ ufàbɔr anki mbɛŋ ambe, un’te un’be sye ufàbɔr anki mbɛŋ aŋàbwaŋ. 44 Ntɔn un’te wanswà bàfàyöb unsà mbɛŋ a wa. Fige bàfàkwol anki unsà ibwiy a nsyeenà, rɛzɛ sye bàfàbwo anki u mikyɛl. 45 Mbuur aŋàbwaŋ afàwal ndaa aŋàbwaŋ unsà an’kyän aŋàbwaŋ màfàtoo u mpem ande, wɛɛ mbuur un’be afàwal ndaa a mbe unsà an’kyän ande mube. Ntɔn ndaa yanswà ufàtɛn mbuur ifàfà u mpem ande. »

46 « Wɛɛ Ntɔn nkye lan’beelà bɛ naa Mwol, Mwol, wɛɛ bɛ ndaa amɛ làfàlab anki? 47 Mɛ in’kyer ayàlàswaŋ naa mbuur afàwem ndaa amɛ anà afàsyääl ya, nde wà nà: 48 Nde wà asànaa mbuur kàkwen mutoŋ ndwà ande, kàkyer atim, ufàtim, waa kàmɛn nkɔŋ ntɔn musà un’bään a ntööŋ udu a nkɔŋ ayi. Mbul a ngwal kànɔ̈ wa, un’pöb a ngwal kàni wa ndwà ayin, wɛɛ ndwà ayin yàbü anki ntɔn ya bàtɔ̈ŋ udu a nkɔŋ. 49 Wɛɛ mbuur afàwem ndaa amɛ wɛɛ nde ya ufàsyääl anki, wà asànaa mbuur kàtɔ̈ŋ ndwà ande udu a ansɛŋ ukɔɔn un’bään, ibɔɔ a an’dà laa byà ni bya ndwà ayin, laa yàbwabà ya. »