Lucas 7

Yɛsu kan’kɔɔr un’syääl a mfum a aŋità a Lɔmà

1 Ungö mutɛn a baar ndaa yanswà kàkwen nde mutɛn, Yɛsu kàkyen Kapɛrnawum. 2 Un’tsüüŋ a kaptɛn mwɛy aŋità a Lɔmà kàfakweenà nde mbɔɔn kàkäl anà ukyal, tsütsü mukwà. 3 Mpal kàwem nde làsaŋ a Yɛsu, nde kàtöm abyääl a Ayudà ntɔn ba bàkun’bɔɔn naa nde uyàkɔɔr un’tsüüŋ ande. 4 Ba waa bàyi akà Yɛsu, bun’bɔ̈ɔ̈n, waa bàtɛn naa: « Mbuur wà kan’kwo muwal bweel aŋàkwo, 5 ntɔn nde afàkwen nsi abi, nde sye kàtöŋ ndwà a nköŋ abi a ngim ande ŋakwo. » 6 Yɛsu kàkyen anà ba. Mpal kàkäl nde tsütsü a ndwà a mbuur awun, mbuur wa kàtɔ̈m asam ande ntɔn mutɛn naa: « Mwol, twon an’pà ndür ngye mpay. Mɛ in’wà mbuur a man’be, mɛ in’kwe anki muwal ngye u ndwà amɛ. 7 Lalan mpa in’yi mɛ, mɛ ŋakwo. Tɛn ngɔk mwɛy ntɔn un’tsüüŋ amɛ ukɔɔrà. 8 Ntɔn mɛ ŋakwo in’wà mfum u ngyɛl, wɛɛ mɛ in’we anà aŋità in’fàler mɛ, mɛ in’sàtɛn a umwɛy naa: "Kyen", laa ukyà nde. Mɛ in’sàtɛn a wàsin naa: "Yà", laa uyà nde. Mɛ in’sàtɛn a un’tsüüŋ amɛ naa: "Kyer abà", laa ukyer nde. » 9 Mpal kàwem Yɛsu ndaa ayi, nde kàkyey kaptɛn awà, waa ubulà, uler baar banswà bàyun’labà, waa kàtɛn naa: « Mɛ, mɛ alàkyään, itàkal kà Isàlɛl mɛ ŋàtàman anki làkwikilà a mbɔɔn abà. » 10 Baar kàtöm kaptɛn, bàfurà ba ndwà ande, ba bàmɛn un’tsüüŋ ande wàŋàkɔɔrà.