MALAKƆ 5

Yɛsu kan’kɔɔr aŋadweelà an’be

1 Ungö apan ba bàkɔlà u sim lumwɛy là ɛwà, u nsi a Bàngɛlàsà. 2 Pa kàtoo Yɛsu u bwaar, baal mwɛy wàŋàyɔl a an’dweelà an’be kàyàtoo kà an’dii, waa kàyàbwey anà nde. 3 Nde kàfabwaayà kà an’dii. Akà mbuur mwɛy kàfàkwo anki mukun’bäm itàkal dwaaŋ. 4 Ntɔn mbalà mbɔɔn ba bàfun’bäämà iswɛɛy anà dwaaŋ, wɛɛ nde kàtsüülà mya. Akà mbuur mwɛy kàkwe anki mukun’kyäämà. 5 Taaŋ lanswà, mpib anà mwäänà, nde kàkäl muyità nsay uboo a an’dii anà u myɔŋ, wàmuyikuub in’kwɛŋ anà muyikàkaam ndür a in’kul. 6 Umpal kàmɛn nde Yɛsu ukwɛl, nde kàkyen ntiin, waa kàbü an’köm kusà a nde, 7 waa kàkuub in’kwɛŋ anà mutɛn naa: « Ininà akà mɛ anà ngye, Yɛsu, Mwan a Nzam a Dudu? Mɛ amabɔɔn kà ikɔb a Nzam, twon aman’pà mpay! » 8 Ntɔn Yɛsu kàtɛɛnà a nde naa: « Dweelà a làbe, too unsà mbuur wà! » 9 Nde kun’fuul naa: « Ikɔb angye nà? » Nde kun’fuur naa: « Ikɔb a mɛ "Un’kàbɔ", ntɔn bi ibà mbɔɔn. » 10 Nde waa kun’bɔ̈ɔ̈nà mbɔɔn, ntɔn nde ukɔɔn akaböŋ u nsi ayin.

11 Kyekà, mper akà mɔŋ, làkäl anà làböl a kölàköl là ngul làkäl muyidyà. 12 An’dweelà an’be màbɔ̈ɔ̈n Yɛsu naa: « Itöm uboo a ngul ntɔn bi ibilà amu ya! » 13 Yɛsu kapɛ mbwo. Apan laa màtoo ma, màbilà ma uboo a ngul, làböl, fà iköl a mɔŋ, làkàbwà kà ɛwà. Ya yàkäl isii a nsaab yweel, waa làminà. 14 Aseey a ngul batiin ba, ba bàkàpay làsaŋ uboo a bul anà kà itsuŋ a ndwà. Apan baar waa bàyi muman ndaa yàlyaaŋ. 15 Mpal bàyàtol ba tsütsü apà Yɛsu anà bàmɛn ba aŋadweelà an’be akyàbwaay, akyàbwaar anà akyàkal a duu, nde mbuur kàkäl anà Un’kàbɔ, ba bàmɛn bɔɔmà. 16 Baar bàmɛn ya yanswà yàlyaŋ, ba bakyäänà ndaa yàbweel mbuur aŋadweelà an’be anà ngul. 17 Apan ba bàsɛmà mukun’bɔɔn naa nde ulwomà kà itiir a nsi aba. 18 Umpal kàkäl Yɛsu mubilà u bwaar, mbuur awà kàkäl anà an’dweelà an’be kun’lɔ̈ɔ̈m naa 19 Yɛsu kun’pɛ anki mbwo, wɛɛ nde kàtɛn a nde naa: « Furà ndwà a ngye, ntsü akà atoŋ angye, waa akakyään ndaa yanswà kàmakyer Mwol unsà ngyɛb ande. » 20 Apan, baal awà kàkyen nde, nde kàsɛmà mukyään indiir a kölàköl byanswà kàkyer Yɛsu akà nde u Dɛkapɔl. Baar banswà bakyer abemà.