MALAKƆ 5

Mwan a Zayirɔs wà un’kaar anà un’kaar kàbä ipfɛy a Yɛsu

21 Mpal kàfurà Yɛsu sim lumwɛy u bwaar, un’sɛŋ a baar mbɔɔn kàyàkɔ̈ŋ apà nde. Nde kàkäl kà un’kɔɔl a ɛwà. 22 Apan umwɛy uboo a amfum a ndwà a nköŋ a Ayudà, ikɔb ande Zayirɔs, umpal kàmɛn nde Yɛsu, nde kàbü kà in’kɔl ande, 23 waa kun’bɔ̈ɔ̈n mbɔɔn, mutɛn naa: « Mwan un’kye amɛ wà un’kaar wà tsütsü mukwà, yun’si an’kɔɔ ntɔn nde ukɔɔrà, uwü mɔ̈ɔ̈! » 24 Yɛsu kàkyen mbwo mwɛy anà nde. Un’sɛŋ a baar mbɔɔn kàyun’labà, waa kàyun’bàbääbà.

25 Kyekà kàkäl anà un’kaar mwɛy kàyitoo an’kil mbul kwem aŋiyweel. 26 Nde kàmɛn mpay mbɔɔn muyikyà akà ingaŋ mbɔɔn, kàmay indiir ande byanswà, ukɔɔn aman ubwaŋ. Wɛɛ ukyal ande bàkyer afàsöönà mbɔɔn. 27 Umpal kàwem un’kaar awà ndaa bàtɛɛnà baar ntɔn Yɛsu, nde kàkül ungö, uboo a un’sɛŋ a baar, waa kàbä ipfɛy ande. 28 Ntɔn nde kàtɛɛnà nde ŋàkwo naa: « Isàkal naa mɛ in’tàba akà ipfɛy ande mpɛl, mɛ in’kyɛr awà mɔ̈ɔ̈. » 29 Taaŋ nsil alan sye an’kil ande waa màtsü mutoo, nde kàyöb u ndür ande naa nde kan’kɔɔrà unsà ukyal ande. 30 Apan sye, Yɛsu waa kàyöb naa ngwal mwɛy yan’too u ndür ande, nde kàbulà uboboo a un’sɛŋ a baar, waa kàfuulà naa: « Nà kan’ba ipfɛy amɛ? » 31 Alɔŋki ande bàtɛɛnà a nde naa: « Ngye akimanà naa un’sɛŋ a baar wàmukabàbääbà, wɛɛ ngye afuulà naa: "Nà kàman’ba?" » 32 Wɛɛ nde kàleerà umbil ande ntɔn muyöb naa un’kaar nà kan’kyer abà. 33 Apan, abà kàyöb un’kaar awun ndaa yun’yeel, unsà bɔɔmà anà matɛɛr, nde kàyàbwà kà in’kɔl a Yɛsu, waa kàtɛn a nde ndandaa yanswà. 34 Yɛsu kàtɛn a nde naa: « Mangwa, làkwikilà angye làmatswà mɔ̈ɔ̈. Kyen a duu, wɛy naa ngye akɔɔrà unsà ukyal angye. »

35 Nde kàkäl aŋàtàmay anki muyääm, umpal bàyi baar bàfü ndwà a mfum a ndwà a nköŋ a Ayudà, waa bàtɛn naa: « Mwan angye wà un’kaar kan’kwà. Ntɔn nkye mufàtwääl Un’lɔɔŋ nkwom? » 36 Wɛɛ Yɛsu kàsàlab anki ndaa ayi, waa kàtɛn a mfum a ndwà a nköŋ a Ayudà naa: « Twon an’man bɔɔmà, sà làkwikilà mpɛl. » 37 Abun, nde kàpɛ anki mbwo akà mbuur mukun’swà, nà Petɔlà, Zyak, anà un’tɔŋ ande Ywan mpɛl. 38 Ba ban’kɔlà u ndwà a mfum a ndwà a nköŋ a Ayudà. Yɛsu kan’man baar ban’kal udu udu, bàmulel, bàmusà in’kwɛŋ mbɔɔn. 39 Nde kan’bilà, waa kan’tɛn a ba naa: « Ntɔn nkye minii ami anà ilel abi? Mwan kà wàŋàkwà anki, nde wàŋàbɔ̈ɔ̈n. » 40 Ba bàkyer un’sɛɛ. Wɛɛ nde kàtwey baar banswà, waa kàwɛl nà taarande anà ngwän a mwan anà baar bàyun’swà. Apan nde kan’bilà u suk kàkäl mwan. 41 Nde kan’tà kɔɔ a mwan mpi, waa kan’tɛn a nde naa: « Mwan un’kaar, mɛ amaswaŋ, wiyà! » 42 Apan sye, mwan un’kaar waa kàmbarà, waa kàsemà mukyà, - nde kàkäl ayà mbul kwem aŋiyweel. Apan, ba bàkäl unsà ubem mbɔɔn. 43 Yɛsu kaswɛŋ a ngwal naa akà mbuur mwɛy ukɔɔn ayöb, waa kàtɛn naa ba bun’pɛ isaa adyà.