1 Kà ilä abin un’sɛŋ a baar mbɔɔn kàkyer afàköŋ. Wa kàkäl anki anà indiir adyà, Yɛsu kàbel alɔŋki ande, waa kàtɛn a ba naa: 2 « Mɛ aman ngyɛb mbɔɔn ntɔn un’sɛŋ a baar wà, ntɔn, le, ŋàbà ilä itär abà ba anà mɛ, wɛɛ ba undiir adyà watɛy. 3 Wɛɛ, kya mɛ in’safuur an’bul aba anà ngyal, ba bakyer akàyɔn u mbwo. Bàmbɔɔn uboo aba bàfü kwɛl. » 4 Alɔŋki ande bun’fuur naa: « U nsi ipɔl ayi, ntsü nà ban’kwo bi muman undiir adii ba, waa ba bàyuur? » 5 Nde kafuul naa: « Bɛ làwe amà mampà an’kwe? » Ba bàtɛn naa: « Nsambwaar ». 6 Apan nde kàswɛŋ un’sɛŋ a baar mubwaay u mɛɛn. Ungɔ̈ apan nde kàwɛl mampà nsambwaar, kàfuur an’tɔɔn, kàtsül ma, waa kàpɛ ma akalɔŋki ntɔn ba bàkäb. Ba bàkäb ma akun’sɛŋ a baar wanswà. 7 Ba bàkäl sye anà binsö imwɛy. Ungɔ̈ musaak bya, nde kàtɛn naa ba bàkäb bya sye. 8 Baar waa bàdi, waa bàyüür. Ba bàsyen in’lwaŋ, in’lwaŋ nsambwaar myà itsü byàsäl. 9 Kyekà baar bàkäl isii a nsaab nà. Ungö apan nde wakapay, 10 apan sye nde kàbilà u bwaar anà alɔŋki ande, waa bàkyen itiir a Dalmanutà.

11 Amfarisi bàyi ba, waa bàsɛmà musà mbaaŋ anà Yɛsu ntɔn mukun’lwab ndaa. Ba bun’lɔ̈ɔ̈m impà kyan’fà du. 12 Nde kàŋyäm mbɔɔn unsà an’kyän ande, waa kàtɛn naa: « Ntɔn nkye baar a nkööl ayi bàlɔɔmà ba impà? Ndandaa mɛ alàkyään, baar a nkööl ayi akidiim a impà mwɛy bàsapà anki. » 13 Ungö apan kàsawɛy nde, nde kàfàbilà u bwaar, waa kàkyen sim a ɛwà lumwɛy.

14 Alɔŋki bàkyärà mpiim muwal mampà, waa bàkäl alà làmwɛy mpel u bwaar. 15 Yɛsu kaswɛŋ naa: « Le, làkäl kigyɛɛŋ ntɔn ful a Amfarisi anà là Ɛlɔdi. » 16 Ba bàsyeelà mbaaŋ ba a ba ntɔn ba bàkäl anki anà mampà. 17 Yɛsu kàmɛn nde abun, waa kàtɛn a ba naa: « Ntɔn nkye làsyeelà bɛ mbaaŋ ntɔn lan’kɔɔn bɛ mampà? Nkye bɛ ŋàtàwal anki un’yɛnà, waa bɛ mpa làyöbà? Nkye mpem abɛ yàŋàbwà bwoor? 18 Bɛ làwe anà mii, nkye bɛ làkamanà anki? Bɛ làwe anà an’tsü, nkye bɛ làkawɛɛmà anki? Nkye bɛ làfàkayöbà anki: 19 mpal kàtsül mɛ mampà an’tyeen ntɔn abaal nsaab tyeen, in’lwaŋ aŋàyɔl a itsü in’kwe bɛ làsyen? » Ba bàtɛn a nde naa: « Kwɛm aŋiyweel. » 20 « Wɛɛ mpal kàtsül mɛ mampà nsambwaar ntɔn abaal nsaab nà, in’lwaŋ in’kwe myàŋàyɔl a itsü bɛ làsyen? » Ba waa bàtɛn naa: « Nsambwaar. » 21 Nde waa kàtɛn a ba naa: « Nkye bɛ ŋàtàyöb anki? » 22 Ba ban’tol Bɛtesayidà. Waa bun’twääl ikwàmii mwɛy, bun’bɔ̈ɔ̈n naa nde kun’bä. 23 Nde kàtɛ ikwàmii mpi u kɔɔ, waa kun’twey u nsà a bul. Nde kun’fül an’te u mii, kun’si an’kɔɔ, waa kun’fuulà naa: « Nkye ngye akimanà undiir? » 24 Nde kun’duub mii, waa kàtɛɛnà naa: « Mɛ in’täälà baar, mɛ ba amanà asànaa in’te, wɛɛ ba bàmuyikyà. » 25 Apan Yɛsu kàfun’sà an’kɔɔ udu a mii. Baal awà waa kàmɛn ubwaŋàbwaŋ. Nde kàkyer akɔrà, waa kamɛnà indiir byanswà umwɛy umwɛy. 26 Lalan Yɛsu kun’fuur nde ndwà ande, waa kun’kyään naa: « Twon an’bilà akikikye uboo a bul. »

27 Yɛsu kàkyen anà alɔŋki ande u ntsü an’bul a tsütsü anà Sɛzarɛ a Filipo. U mbwo, nde kàfuul alɔŋki ande naa: « Baar bàfàtɛn naa mɛ in’wà nà? » 28 Ba waa bun’fuur naa: « Ywan Un’düümà, bumwɛy, Ɛli, bumwɛy naa umwɛy uboo a aŋangɔɔm. » 29 Nde waa ufàfuul: « Wɛɛ bɛ ŋakwo làtɛn naa mɛ in’wà nà? » Petɔlà waa ufuur: « Ngye awà Klistɔ. » 30 Yɛsu kaswɛŋ a ngwal naa ba bàkɔɔn ayäm akà mbuur mwɛy ntɔn nde.

31 Apan, nde kàsɛmà mukalɔŋ naa: « Mwan a mbuur akyer aman mpay mbɔɔn. Andwer, amfum a angaŋ anà alɔɔŋ a in’kɔɔn bàkyer un’tɔn, bàkyer un’dwa, waa ungö ilä itär nde akyer awiyà. » 32 Ndaa ayi nde kàtɛɛnà kimii imii. Apan Petɔlà kun’naan ukɔl, waa kàsɛmà mukun’ŋän. 33 Wɛɛ nde waa kàbulà, kàler alɔŋki ande, kàŋän Petɔlà, waa kàtɛn naa: « Satanà, kyen ungö a mɛ! Ntɔn ngye akayweerà anki indiir a Nzam, wɛɛ indiir a baar. »

34 Ungö nde kàbel un’sɛŋ a baar anà alɔŋki ande, waa kàtɛn a ba naa: « Isàkal naa mbuur akwen mukan’lab, wɛy nde ukɔɔb ndür ande, usɛɛn kulunsi ande, waa kan’lab. 35 Ntɔn mbuur usàkwen mutii mɔ̈ɔ̈ ande, wa asàkyà bwà, wɛɛ mbuur usàpiy mɔ̈ɔ̈ ande ntɔn mɛ anà làsaŋ aŋàbwaŋ, nde asàtswà wa. 36 Bweel nà mbuur kan’kwo muwal uman naa nde kan’wal mɛɛn manswà, wɛɛ mɔ̈ɔ̈ ande ukyà bwà? 37 Abun, ininà mbuur kan’kwo mupà ntɔn musɔɔm mɔ̈ɔ̈ ande? 38 Ntɔn mbuur usàwem mɛ nswɛn anà ndaa amɛ uboo a nkööl ayi yinswem anà yube, Mwan a mbuur sye asun’wem nswɛn mpal usàyà nde unsà làkoo a Taarànde, anà akyeey in’kyɛɛl. »