Marcos 9

17 Baal mwɛy uboo a un’sɛŋ a baar kun’fuur naa: « Un’lɔɔŋ, mɛ amatwääl mwan amɛ wàbaal: nde we anà dweelà a nkiin. 18 Ikal kyanswà lun’kaar la, la lun’bwiy u mɛɛn, mwan ugyɔrà an’te, laa ukwoor nde an’din ande, waa ubwà un’sey. Mɛ an’tɛn a alɔŋki angye naa ba bàböŋ la, wɛɛ ba bàsàkal anki anà ngwal. » 19 Nde waa utɛn a ba naa: « Nkööl ikɔ̈ɔ̈n làkwikilà, tii nkye taaŋ mɛ insàkal anà bɛ? Tii mpal nà mɛ in’sàkaŋ mpem ntɔn bɛ? Lan’twääl awà. » 20 Ba waa bun’twääl. Umpal làmɛn dweelà a làbe Yɛsu, la làni mwan a ngwal, mwan kàbü u mɛɛn, waa kàyisilà wàmuyigyɔrà an’te. 21 Yɛsu kàfuul taarànde naa: « Sɛmà taaŋ nà ya ifun’yeel? » Nde waa kàten naa: « Sɛmà imbɛy ande. 22 Mbalà mbɔɔn la làfun’tɔɔm u mbaa anà kan’dà ntɔn mukun’dwa. Wɛɛ, isàkal naa ngye an’kwo mukyer undiir, yà ibay, ntɔn ngyɛb angye akà bi! » 23 Yɛsu waa kàtɛn a nde naa: « Isàkal naa ngye an’kwo! ... Indiir byanswà byàŋàkwo akà mbuur awe anà làkwikilà. » 24 Apan sye, taar a mwan kàsi un’kwɛŋ naa: « Mɛ an’sà làkwikilà! Mbay ntɔn an’kɔɔn mɛ làkwikilà! »

25 Yɛsu, abà kàmɛn nde un’sɛŋ a baar wàmuyàkɔ̈ŋ, nde kàswɛŋ dweelà a làbe, waa kàtɛn naa: « Dweelà a nkiin anà ikwan’tsü, mɛ amaswaŋ, too ubɔɔ a mwan wà, twon an’fyefurà! » 26 Dweelà làsi in’kwɛŋ, waa lun’ni a ngwal. Mwan kàbulà asànaa wàŋàkwà, lalan bàmbɔɔn bàteenà ba naa: « Nde kan’kwà. » 27 Wɛɛ Yɛsu kun’tɛ mpi u kɔɔ, kun’mbaar, nde waa kàmbarà.