1 Yɛsu kàbel alɔŋki ande bàkwem aŋiyweel, waa kapɛ ikɔ̈b muböŋ an’dweelà an’be anà mukɔɔr an’kyal manswà anà an’too manswà. 2 Le ikɔb a antööm bàkwem aŋiyweel abi: wàtàtwɛb Simɔn, awà bàfàbel naa Petɔlà, anà un’tɔŋ ande Andre, Zyak anà Ywan, baan a Zebàday, 3 Filipo anà Bàtɛlàmay, Tuma anà Màtay un’füür a itɛr, Zyak mwan a Alfɛ anà Tàday, 4 Simɔn ŋambämà anà Yudasi Isikalyɔt, mbuur kun’yälà.

5 Yɛsu kàtöm alɔŋki abà bàkwem aŋiyweel mukàsal isal anà musyääl nswɛŋ yi: « Twon lan’kyà akà baar mpa abà Ayudà anà twon lan’bilà kan’bul a Samàlya. 6 Wɛɛ bɛ, làkyen akà in’kɔk a un’sɛŋ a Isàlɛl amyà myàdiimà. 7 U mbwo làkyà bɛ, làlɔŋ naa Imwol a du kyà tsütsü. 8 Làkɔɔr abɛy, làwiy akü, làpöŋ aŋukyal a bay, làböŋ an’dweelà an’be. Bɛ, bɛ làwɛl byàngway, làpɛ sye byàngway. 9 Twon lan’syen itàkal wɔl, itàkal ngim, itàkal itɛr a ishabà ntɔn bɛ làsi kà in’di abɛ, 10 itàkal bɔ̈n ntɔn nkyeen, itàkal an’kàzak an’mɔ̈ɔ̈l, itàkal idyäär, itàkal unsɔk, ntɔn un’syääl afàdyà unsà isal ande. »

11 « U bul a kölàköl itàkal là ikikye làbilà bɛ, làleŋ naa nà kan’kwo mukàlawal, làbwaay apà nde tii mpal làsàkyà bɛ. 12 Umpal làbilà bɛ u ndwà, làpɛ ya mbɔr, 13 isàkal naa ndwà ayin yàmàlawal, wɛy duu abɛ làkäl udu a ya, wɛɛ isàkal naa ya yàlawɛl anki, wɛy duu abɛ làfurà akà bɛ. 14 Isàkal naa bàlawɛl anki anà bàlawem anki, làtoo u ndwà ayin itàkal u bul alan anà làkɔɔb un’twà a in’kɔl abɛ. 15 Ndandaa mɛ alàkyään: ilä a nsaŋ, nsi a Sɔdɔm anà Gɔmɔr bàsawem kingyɛb akɔ̈ɔ̈n naa bul alan. »

16 « Mɛ, mɛ amàlatɔm asànaa in’kɔk uboboo a an’kyɛŋbɔl. Làkäl unsà igyɛɛŋ asànaa ntäy anà aŋàlàbɔ̈ɔ̈n asànaa nkokà. 17 Làkäl unsà igyɛɛŋ akà baar, ntɔn baar bàsàlasyen u làbay a nsaŋ a kölàköl anà bàsàlakam an’füm uboo a ndwà a nköŋ aba, 18 ba bàsàlafüün akà an’kuvɛrnɔ̈ɔ̈r anà akà amfum a nsi ntɔn mɛ, ntɔn bɛ làtɛ imbäl akà ba anà akà baar mpa abà Ayudà. 19 Wɛɛ mpal bàsàlafüün ba, twon lan’man mpay muyöb naa bɛ làtɛn aben itàkal naa ininà bɛ làtɛn. Ndaa yanswà làsàtɛn bɛ, ya bàsàlapà taaŋ nsil la. 20 Ntɔn ya isàfà anki akà bɛ, wɛɛ Dweelà In’kyɛɛl a Taaràbɛ asàtɛn uboo a bɛ. 21 Un’tɔŋ asàyälà un’tɔŋ ande ntɔn bun’dwä, taa asàyälà mwan ande, baan bàsàsà un’tswe ngwal akà aböör aba anà bàsàkwen naa badwä. 22 Baar banswà bàsàkyer alayiiŋ ntɔn ikɔb amɛ. Wɛɛ mbuur asàtsim tii u ntsüü asàwà mɔ̈ɔ̈. 23 Mpal bàsàlamɛɛy nkwaaŋ u bul làmwɛy, kàlayee u bul asin. Mɛ ndandaa alàkyään, bɛ làsàkal aŋàtàmay anki muyilyaŋ kà an’bul a Isàlɛl manswà mpal usàyà Mwan a mbuur. »

24 « Un’lɔŋki ufàlyaŋ anki un’lɔɔŋ ande, itàkal un’syääl ufàlyaŋ anki nkum ande. 25 Yan’kwo naa un’lɔŋki ukäl asànaa un’lɔɔŋ ande anà un’syääl asànaa nkum ande. Ntɔn ba ŋandwà bun’beelà Bɛlzàbul, nkye byan’kɔɔn ba mubel baar a ndwà ande abwɛy! »

26 « Twon làmatiin bɔɔmà. Ntɔn undiir aŋàyee wanswà akyer asàmɛnà u leŋ, anà ndaa yanswà yà unku bàkyer asàyöb. 27 Ndaa amàlakyään mɛ u làpib, wɛy bɛ làtɛn ya u mwäänanswà, ndaa bàmàlalwɛɛŋ u tsü, làlɔŋ ya udu a isaŋ. 28 Twon lan’tiin bɔɔmà baar akwà bàfàdwa nà ndür mpɛl, wɛɛ bɛ, bɛ bɔɔmà làtiin mbuur akwà afàdwa ndür anà mɔ̈ɔ̈ uboo a yaaŋ a mbaa. 29 Nkye bàfàyälà anki insɔɔr ibyeel u falà làmwɛy? Mpalàbà, akà imwɛy uboo a bya ifàbwà tɛy u mɛɛn naa Taaràbɛ ukɔɔn ayöb. 30 Wɛɛ akà bɛ, itàkal ntswe abɛ yanswà yaŋàtaŋ. 31 Twon lan’man bɔɔmà: bɛ, bɛ lan’söön insɔɔr mbɔɔn. »

32 « Mbuur wanswà asàkyey u mii a baar naa nde wà un’lɔŋki amɛ, mɛ sye in’sun’kyey u mii a Taaràmɛ awà u du. 33 Wɛɛ isàkal naa mbuur aman’tɔn u mii a baar banswà, mɛ sye in’sun’tɔn u mii a Taaràmɛ awà u du. »

34 « Twon lan’si naa mɛ kàyàtwaal duu u mɛɛn: mɛ, mɛ kà duu kàyàtwaal anki, wɛɛ kɔm. 35 Mɛ kayi ntɔn muyàkaab mbuur anà taarànde, mwan un’kaar anà ngwän, mwan un’kaar àna ukwà ande wà un’kaar. 36 Aŋankir a mbuur bàfàfà uboo a ywar ande ŋakwo. 37 Mbuur akwen taarànde itàkal ngwän aŋàsöön mɛ, nde ukwe anki mukal wàmɛ, mbuur akwen mwan ande wàbaal itàkal wà un’kaar aŋàsöön mɛ, nde ukwe anki mukal wàmɛ. 38 Mbuur mpa usɛn kulunsi ande anà ukɔɔn ayan’lab, nde ukwe anki mukal wàmɛ. 39 Mbuur asàyee mɔ̈ɔ̈ ande, wa asàkyà bwà. Wɛɛ mbuur asàpiy mɔ̈ɔ̈ ande ntɔn mɛ, nde akyer afàsàman wa. »

40 « Mbuur usàlawal, nde mɛ kan’wal, mbuur usan’wal, nde kan’wal mbuur kan’töm. 41 Mbuur kan’wal ŋangɔɔm ntɔn nde wà ŋangɔɔm, nde asàwal bweel a ŋangɔɔm. Mbuur kan’wal mbuur a balàbal ntɔn nde wà wàbalàbal, nde asàwal bweel a mbuur a balàbal. 42 Mbuur wanswà asàpà indiir anwà, itàkal naa kɔɔb a an’dà a mpye làmwɛy akà umwɛy uboo a baan ambɛy bà ntɔn nde wà un’lɔŋki amɛ, bweel ande bwà làsàkyà anki. »