1 Apan, Amfarisi anà alɔɔŋ a in’kɔɔn bàfü Yɛlusàlɛm, bàyi akà Yɛsu, waa bun’fuul naa: 2 « Ntɔn nkye alɔŋki angye bàfàbɛy ba nkääl abi? Ntɔn ba bàfàywɛy anki an’kɔɔ mpal bàfàdyà ba. » 3 Nde kafuur naa: « Atöl bɛ, ntɔn nkye làfàbɛy bɛ nswɛɛŋ a Nzam ntɔn nkääl abɛ? 4 Ntɔn Nzam kàtɛn naa: "Sà làkoo akà taaràŋà anà akà ngwa", anà: "Mbuur asàküül taarànde anà ngwän, bàkyer asun’dwa." 5 Wɛɛ bɛ, bɛ làfàtɛn naa: "Mbuur wanswà afàtɛn a taarànde itàkal a ngwän naa: Undiir in’lapà mɛ, mɛ wa in’kyàpà akà Nzam", 6 mbuur awun, nde kun’kömà anki taarànde." Abun, bɛ làkyàpiy Ndaa a Nzam, ntɔn nkääl abɛ. 7 Baar a mpem yweel! Yɛsay we anà iböŋ kàtɛ nde ngɔɔm ntɔn bɛ, mpal kàtɛn nde naa:

8 "Un’sɛŋ wà afan’pà làkoo a mun,

wɛɛ mpem awa yà ukwɛl anà mɛ.

9 Ngyamàkà bàfan’sà ba yà bunàbun,

ntɔn ndaa bàfàlɔŋ ba, yà ndaa a imbuur mpɛl." »

10 Apan,Yɛsu kàbel iköŋ a baar, waa kàtɛn a ba naa: « Làwem anà làyöb! 11 Kà indiir byàfàbilà u mun a mbuur byàfun’buul ŋingyäy anki, wɛɛ indiir byàfàtoo u mun byàfun’buul ŋingyäy. » 12 Apan, alɔŋki bàyi akà Yɛsu, waa bàtɛn a nde naa: « Nkye ngye akyàyöb naa Amfarisi bàwem ba ndaa ayi, ya yapɛ mpay? » 13 Nde waa kàfuur naa: « Kite kyanswà mpa kàkön Taaràmɛ awà u du, bàkyer asàtsuum kya. 14 Lawɛy: ba bà ikwàmii bàyisyen ikwàmii bumwɛy! Isàkal naa ikwàmii wàmuyisyen ikwàmii wumwɛy, ba bàbɔ̈ɔ̈l bàkàbwà u fu. » 15 Petɔlà kàwɛl ndaa, waa kàtɛn a nde naa: « Ibuul nsim ayi. » 16 Yɛsu kàtɛn naa: « Nkye anà bɛ, bɛ sye un’yɛnà watɛy? 17 Nkye bɛ làyöb anki naa undiir wanswà afàbilà u mun, afàlyaŋ uboo a an’bäl, ungö waa bàkàpiy u kàbenà? 18 Wɛɛ ndaa ifàtoo u mun ifàfà u mpem, ya ifàbuul mbuur ŋingyäy. 19 Ntɔn an’kyän an’be, ndwää a baar, inswem, ipasàsɛ, küb, imbäl ibe, ntwee byàfàfà u mpem. 20 Le, byabi byà indiir byàfàbuul mbuur ŋingyäy! Wɛɛ mudyà ukɔɔn aywab mpin ifàbuul anki mbuur ŋingyäy. »

21 Ungö apan, Yɛsu kàlwomà paa, waa kàkyen itiir a nsi a Tir anà kyà Sidɔn. 22 Waa le, un’kaar mwɛy un’nsi Kanana kàfü ntsü ayin, waa kàsi in’kwɛŋ: « Mwol, Mwan a David, nsyääm! Mwan amɛ wà un’kaar we anà unsɔŋà mwɛy afun’sà lingyoomà mbɔɔn. » 23 Wɛɛ Yɛsu kun’fuur anki akà ndaa mwɛy. Alɔŋki ande laa bàsin ba, waa bun’lɔ̈ɔ̈m naa: « Un’böŋ, ntɔn nde wàmuyilab bi anà in’kwɛŋ ande. » 24 Yɛsu kàfuur naa: « Mɛ, mɛ ban’töm akà in’kɔk a Isàlɛl myàŋàdiimà mbwo mpɛl. »

25 Wɛɛ un’kaar awà kàyàbwà an’köm kusà a nde, waa kàtɛn naa: « Mwol, yambay! » 26 Yɛsu kàfuur naa: « Ubwaŋ batɛy muwal mampà a baan anà mutɔɔm ma akà bibaan a mbwà. » 27 Un’kaar awà kàfuur naa: « Inye, ndandaa Mwol, wɛɛ mbwà sye ifàdyà mfür ifàbwà u ngyɛl a mɛsà a nkum aba. » 28 Apan, Yɛsu kun’fuur naa: « Ɔɔ un’kaar! Làkwikilà angye là làkölàköl! Wɛy ya ikäl asànaa ikwen mpem angye. » Taaŋ nsil alan, mwan ande waa kàkɔɔrà.

29 Fà apan, Yɛsu kàyikyenà kà un’kɔɔl a ɛwà a Ngalilɛ. Nde kàlär udu a mɔŋ, waa kàbwaay. 30 Baar mbɔɔn bàyàköŋ apà nde, waa bàtwäälà ikar, ikwàmii, aŋatoo, nkiin, anà abɛy asin bàmbɔɔn. Ba batɔ̈ɔ̈là kà in’kɔl a Yɛsu, nde waa kakɔɔrà. 31 Baar bàkyer abem mpal bàmɛn ba naa nkiin ban’sà ndaa, aŋatoo ban’kɔɔrà, akyeen a ibweel ban’dyäär, ikwàmii ban’man. Waa bàsɛmà mukömà Nzam a Isàlɛl.

32 Yɛsu kàbel alɔŋki ande, waa kàtɛn a ba naa: « Mpem amɛ yan’kyɛɛr ntɔn baar bà, ntɔn ŋàbà byan’kwo ilä itär abà ba anà mɛ apà. Wɛɛ ba, ba undiir adyà watɛy. Mɛ in’kwen anki mukapay anà ngyal, manà ngwal aba ikàwà u mbwo. » 33 Alɔŋki bun’fuul naa: « U nsye a ipɔl yi bi mampà ifà ken mudii un’kàbɔ a baar a tub awà? » 34 Yɛsu kafuul naa: « Bɛ làbye amà mampà an’kwe? » Ba bàfuur naa: « Nsambwaar anà binsö imwɛy. » 35 Apan, nde kàswɛŋ iköŋ a baar mubwaay u mɛɛn. 36 Nde kàwɛl mampà aman mà nsambwaar anà nsö, kàkömà Nzam, kàtsül ma, waa kàpɛ alɔŋki mukab akà baar banswà. 37 Ba banswà waa bàdi, waa bàyüür. Ba bàsyen in’lwaŋ nsambwaar myàŋàyɔl a itsü byàsäl. 38 Baar banswà bàdi bàkäl isii a nsaab nà, ukɔɔn ataŋ akaar anà baan. 39 Ungö kàpay nde iköŋ a baar, Yɛsu kàbilà u bwaar, waa kàkyen itiir a nsi a Makadan.