21 Apan, Petɔlà kàsin tsütsü apà Yɛsu, waa kun’fuul naa: « Mwol, mbalà kwe mɛ an’kwo mudwääl un’tɔŋ amɛ nkul isàkal naa nde kàman’kyer ube? Nkye mbalà nsambwaar? » 22 Yɛsu naa: « Mɛ in’tɛn anki a ngye naa tii mbalà nsambwaar, wɛ, tii u mbalà an’kwem nsambwaar mbalà nsambwaar. 23 Abun, Imwol a du kyà asànaa mfum mwɛy kàkwen mulɔn ndaa a ngim ande anà asyääl ande. 24 U nsɛmà, ba bun’twääl umwɛy kàlun’fuur itɛr nsaab kwem. 25 Wɛɛ nde ngim afuur kàkäl ayà anki. Apan, nkum ande kàswɛŋ naa bayälà asànaa asɔ, nde anà un’kyay ande anà baan ande, anà indiir ande byanswà ntɔn mufur nkul ayin. 26 Apan, un’syääl awà kàbü an’köm kusà a nkum ande, waa kàtɛn naa: "Nkum, kaŋ mpem ntɔn mɛ, mɛ in’kyer ayàfur nkul angye yanswà." 27 Nkum ande kun’wem ngyɛb, waa kun’wɛy ungö akun’dwääl nkul ande. 28 Un’syääl awà kàtoo nde, nde kàbwey a umwɛy uboo a baar bàfàsal anà nde, awà kàlun’pà itɛr a ngim nkam mwɛy. Nde kun’si mpi a mpà anà mutɛn naa: "Fur nkul amɛ!" 29 Abun, mbuur awun kàbü an’köm, waa kun’bɔ̈ɔ̈n naa: "Kaŋ mpem ntɔn mɛ, mɛ in’kyer ayafur!" 30 Wɛɛ un’syääl awun waa kàtön, kàkun’sà u bɔlokà tii mpal kàlàfur nde nkul ayin. 31 Mpal bàmɛn asyääl bumwɛy ndaa ayi, laa bàkyɛɛr ba, waa bàkàkyään nkum aba ndaa yanswà yàlyaŋ. 32 Apan, nkum kàbel un’syääl awun, waa kàtɛn a nde naa: "Un’syääl un’be! Nkul angye yanswà mɛ kàkyer apiy bwà, ntɔn ngye kàkyer an’bɔɔn. 33 Nkye ngye sye un’tɔŋ angye alun’wem anki ngyɛb asànaa kawem mɛ ngyɛb?" 34 Nkum ande kàwem nkyɛl, waa kun’pɛ akà aŋangwal tii mpal kàlàfur nde nkul ande yanswà.

35 « Taaràmɛ awà u du asàlakyer sye abun isàkal naa umwɛy umwɛy uboo a bɛ udwääl anki un’tɔŋ ande nkul a ibii ande unsà mpem ande wanswà. »