Mateus 21

Yɛsu kan’bilà u Yɛlusàlɛm

1 Umpal bàsin ba tsütsü a Yɛlusàlɛm, anà bàtöl ba tsütsü a Bɛtefazɛ, udu a mɔŋ a In’te a olive, apan Yɛsu kàtöm abɔ̈ɔ̈l uboo a alɔŋki ande, 2 waa kàtɛn a ba naa: « Làkyen u bul lanà kusà a bɛ, pa làkàkɔlà bɛ, bɛ làkàman ntsür bàfàbel anɛs wàŋàbäm un’siŋ anà mwan awa ukɔl. Làtsuuŋ wa, lan’twääl ayà pà. 3 Isàkal naa mbuur kan’tɛn undiir anà bɛ, lun’fuur naa: "Mwol we anà mfun aya". Làgyägyä, ba bàyàwɛy ya ntɔn mukyà. »

4 Yàkäl ya abà, ntɔn ndaa kàtɛn ŋangɔɔm yi ikwe:

5 « Tɛn a un’sɛŋ a Siyɔnà naa:

Le, mfum angye wàmuyà akà ngye,

wàŋàyɔl a làbɔ̈ɔ̈n anà wàŋàlaar udu a ntsür bàfàbel an, anà udu anɔ, mwan a ntsür afàsyen buur. »

6 Alɔŋki bàkyen ba, ba bàkyer asànaa kaswɛŋ Yɛsu. 7 Ba bàtwääl ntsür bàfàbel an anà mwan awa, waa bàyɛɛl ipfɛy aba udu a ya. Yɛsu kàbwaay udu a ya. 8 Un’sɛŋ a baar kàyɛɛl ipfɛy awa u mbwo, bumwɛy bàtsüülà an’kɔkà a in’te waa bàyɛɛlà ma u mbwo. 9 In’sɛŋ a baar myàyikyeenà kusà a Yɛsu anà myàyun’labà myàkäl muyisà in’kwɛŋ naa: « Ɔsana akà Mwan a David! Wɛy mbuur awà ayà kà ikɔb a Mwol ukäl wàŋàsaak! Ɔsana kà ikal a dudu! » 10 Mpal kàbilà nde u Yɛlusàlɛm, bul lanswà làkyer ani anà làkäl mufuulà naa: « Nà wawà? » 11 In’sɛŋ waa myàfuurà naa: « Ŋangɔɔm Yɛsu, un’nsi Nasàlɛr u Ngalilɛ. »