MÀTAY 22

Ngwiiyà a akü.

23 Ilä nsil akin, Asadusi bàsin tsütsü apà Yɛsu. Ba bà baar bàfàtɛn naa ngwiiyà kà ukwà yatɛy. Ba bun’fuul naa: 24 « Un’lɔɔŋ, Mɔsɛ kàtɛn naa: "Isàkal naa mbuur kan’kwà ukɔɔn baan, un’tɔŋ ande asàbääl un’kweel a un’dim, ntɔn nde uböör un’tɔŋ ande baan." 25 Akà bi bàkäl anà atɔŋ nsambwaar. Wàtàtwɛb kàkäl wàŋàbääl. Nde kàkü ukɔɔn abɔr, waa kàsàwɛy un’kyay ande akà un’tɔŋ ande. 26 Ya yàkäl abà akà wàyweel, wàtär, tii akà wànsambwaar. 27 Ungö a ba banswà, un’kaar awun waa kàkü. 28 Mpal bàsàwiyà baar kukwà, uboo a ba bànsambwaar, un’kaar awà asàkal un’kyay anà? Ntɔn ba banswà bàkäl adim ande! » 29 Yɛsu kafuur naa: « Bɛ, bɛ làbaŋàdiimà mbwo, ntɔn bɛ làyöb anki itàkal Ndaa Aŋàsɔn, itàkal ngwal a Nzam. 30 Ntɔn, mpal bàsàwiyà baar, abaal anà akaar bàfàsàtà anki bɔr, wɛɛ ba bàsàkal asànaa akyeey u du. 31 Unsà ndaa iler ngwiiyà a baar kà ukwà, nkye bɛ làtäŋ anki ndaa kàtɛn Nzam a bɛ naa: 32 "Mɛ, mɛ in’wà Nzam a Abàlam, Nzam a Isak anà Nzam a Yakɔb?" Nde kà wà Nzam a akü anki, wɛɛ wà baar a mɔ̈ɔ̈. » 33 In’sɛŋ a baar bàwem an’lɔɔŋ ande, ma màkyer atwà.