Mateus 23:12 | Versão YNS

Yɛsu kan’sà alɔɔŋ a un’kɔɔn anà Amfarisi unsà igyɛŋ

1 Apan, Yɛsu kàtɛn a un’sɛŋ a baar anà alɔŋki ande naa: 2 « Alɔɔŋ a Un’kɔɔn anà Amfarisi bàkyàbwaay u kir a Mɔsɛ. 3 Undiir awun, làler yinà yanswà ban’kwo mutɛn ba a bɛ. Wɛɛ twon lan’lab nkyeer aba, ntɔn ba bàfàkyer anki ayà bàfàtɛn ba. 4 Ba bàfàbäm indiir a buur anà bàfàtälà bya udu a ipaay a baar. Wɛɛ ba ŋakwo bàfàkwen anki mukaal bya a làpin. 5 Nsyääl aba yanswà yà ntɔn baar bamɛn. Ba bàfàbwaar inkwà abye anà ndaa a Nzam, in’lɛl a ipfɛy aba myà bwɛlàbwɛl. 6 Ba bàfàkwen mubwaay kà ikal atàtwɛb kà in’kyɔm, anà kà an’kir atàtwɛb u ndwà a nköŋ a Ayudà, 7 ba bàfàkwen naa baar bapɛ mbɔr a làkoo kà ikal a un’sɛŋ anà baar babel naa "Un’lɔɔŋ". 8 Wɛɛ bɛ, bɛ twon bàmàlabel "Un’lɔɔŋ", ntɔn bɛ làbye awà Un’lɔɔŋ mwɛy mpɛl, bɛ banswà làbà atɔŋ. 9 Twon lan’bel mbuur u mɛɛn "Taa", ntɔn bɛ làbye awà umwɛy mpɛl, Taa awà u du. 10 Twon bàmàlabel sye "un’lɔɔŋ", ntɔn bɛ un’lɔɔŋ asin watɛy, Klistɔ mpɛl. 11 Mbuur a kölàköl uboo a bɛ asàkal un’syääl abɛ. 12 Mbuur wanswà asàsɛn an’pɛy bàkyer asun’tyeey, wɛɛ mbuur a làbɔ̈ɔ̈n bàkyer asun’sɛɛn. »

Mpem yweel a Amfarisi anà alɔɔŋ a Un’kɔɔn

13 « Ngyɛb akà bɛ, bɛ alɔɔŋ a un’kɔɔn anà Amfarisi a mpem yweel! Bɛ làfàbäm mbwo a Imwol a du akà baar. Bɛ ŋàkwo làfàbilà anki kwo, wɛɛ bɛ làfàtsuŋ baar akwà bàfàkwen mubilà. »

14 [ « Ngyɛb akà bɛ alɔɔŋ a Un’kɔɔn anà Amfarisi, baar a mpem yweel! Bɛ làfàgyɔɔr kà an’kɔɔ a akweel adim indiir aba byanswà, wɛɛ taaŋ nsil la, bɛ làbàmusà ngyamàkà a bwɛlàbwɛl ntɔn baar bàlamɛn. Undiir awun, ntaaŋàmbar abɛ isàkal yàŋàdiir an’din! » ]

15 « Ngyɛb akà bɛ alɔɔŋ a Un’kɔɔn anà Amfarisi a mpem yweel! Bɛ, bɛ làwàmuyikyà ntsü yanswà u mɛɛn anà udu a ngyäl ntɔn mubuul mpem a mbuur mwɛy, wɛɛ nde usàlakyey, apan bɛ làmun’biil u yaaŋ a mbaa mbalà yweel yàŋàsöön bɛ. »

16 « Ngyɛb akà bɛ, asyeen a ikwàmii! Bɛ làfàtɛn naa: "Undiir watɛy isàkal naa mbuur kan’dyà kyän kà idwà. Wɛɛ isàkal naa nde kan’dyà la u wɔl a ndwà a Nzam, apan nde kan’kyey ipepey." 17 Insil, ikwàmii! Undiir nà kan’söön uteer: wɔl, lɛɛ idwà akwà kyan’buul wɔl undiir a in’kyɛɛl? 18 Bɛ làfàtɛn sye naa: "Undiir watɛy isàkal naa mbuur mwɛy kan’dyà kyän udu a mɛsà afub ibɔɔn. Wɛɛ isàkal naa nde kan’dyà kyän unsà kab alà udu a mɛsà afub ibɔɔn, apan nde kan’kyey ipepey." 19 Ikwàmii! Undiir nà kan’söön mfun, ibɔɔn akyà udu a mɛsà a ibɔɔn, lɛɛ mɛsà a ibɔɔn akwà myan’buul ibɔɔn aki undiir a in’kyɛɛl? 20 Lalan, mbuur wanswà afàdyà kyän udu a mɛsà a ibɔɔn, nde sye afàdyà udu a mɛsà a ibɔɔn anà indiir byanswà abyà udu pa, 21 mbuur afàdyà kyän kà idwà, afàdyà kyän kà idwà anà akà mbuur afàkal uboo kwo, 22 mbuur afàdyà kyän u mbwo a du afàdyà kyän u mbwo a kir a Imwol a Nzam anà akà mbuur afàbwaay kwo. »

23 « Ngyɛb akà bɛ, bɛ alɔɔŋ a Un’kɔɔn anà Amfarisi, baar a mpem yweel! Bɛ làfàpà akà Nzam un’te mwɛy uboo a in’te kwem, in’te asànaa mɛntɛ, fɛnwil anà kümin. Wɛɛ bɛ, bɛ làfàpiy indiir byan’söön mfun uboo a Un’kɔɔn asànaa balàbal, nsyääm anà lää: abi indiir lan’kwo bɛ mukyer ukɔɔn apiy byumwɛy. 24 Asyeen aŋàkwàmii! Bɛ làfàkɔr imwe kun’lɛɛ, wɛɛ bɛ làfàmin mpoonà! »

25 « Ngyɛb akà bɛ, alɔɔŋ a Un’kɔɔn anà Amfarisi a mpem yweel! Bɛ làfàsɔŋ nsà a kɔɔb anà yà làlɔŋà, wɛɛ boo a ma làŋàyɔl a indiir a küb anà làmpfɛɛl abɛ. 26 Umfarisi aŋàkwàmii! Tàsɔŋ boo a kɔɔb, ntɔn nsà sye ipɔŋà.

27 « Ngyɛb akà bɛ, alɔɔŋ a Un’kɔɔn anà Amfarisi, baar a mpem yweel! Bɛ làbà asànaa an’dii aŋàkiir un’swɛn a pɛɛl: u nsà ma mye anà ntwɛn, wɛɛ ubɔɔ ma màŋàyɔl a in’kwo a baar aŋàkwà anà ipɔɔn byà ifà ifà. 28 Abun bɛ sye, u nsà bɛ làkamɛnà asànaa baar a balàbal umii a un’sɛŋ, wɛɛ ubɔɔ, bɛ làbà aŋàyɔl a mpem yweel anà an’kyän an’be. »

29 « Ngyɛb akà bɛ, alɔɔŋ a Un’kɔɔn anà Amfarisi a mpem yweel! Bɛ làfàtööŋ aŋangɔɔm abɛ an’dii, anà bɛ làfàsà ntwɛn kà an’dii a baar a balàbal, 30 waa bɛ làfàtɛn naa: "Yàlàkal naa bi ikäl utaaŋ a bànkaa abi, bi kàlàbwà anki mbwo mwɛy anà ba ntɔn mutyaŋ an’kil a aŋangɔɔm." 31 Abun, bɛ lan’tà imbäl bɛ ŋakwo naa bɛ làbà baan a baar bàdwä aŋangɔɔm. 32 Apanà, làkölà isal bàsɛmà bàtaaràbɛ! 33 Ntäy, a iyäy! Nkye bɛ làkyàkwo mutiin ntaaŋàmbar a yaaŋ a mbaa? 34 Undiir awun, làwem: mɛ, mɛ amàlatööm aŋangɔɔm, aŋan’yeerà anà alɔɔŋ a Un’kɔɔn. Bɛ làsàdwa amwɛy anà làsabɛɛrà u kulunsi, làsàkam bumwɛy an’füm u ndwà a nköŋ abɛ anà làsamɛɛy nkwaaŋ u bul a bul, 35 ntɔn an’kil a baar a balàbal màpää u mɛɛn isàbwà udu a bɛ, sɛmà an’kil a Abɛl mbuur a balàbal tii akà an’kil a Zakàlye, mwan a Balaki, awà làdwä bɛ uboboo a idwà anà mɛsà a ibɔɔn. 36 Undiir awun, waa mɛ amàlakyään ndandaa naa: mpay a ube abà banswà isàbwà u du a un’tswe a nkööl a ŋàbà! »

Yɛsu anà Yɛlusàlɛm

37 « Yɛlusàlɛm, Yɛlusàlɛm, ngye, ngye mbuur afàdwa aŋangɔɔm anà afàtà bumwɛy katööm Nzam in’kul. Mbalà kwe kàkwen mɛ muböbà baan angye ikal imwɛy apà mɛ asànaa ngwän a nkɔɔ ufàböbà wa baan awa u ngyɛl a an’paab ande, wɛɛ ngye, ngye kàsàkwen anki! 38 Undiir awun, ndwà angye bàsawɛy yà ipɔl. 39 Kyakin, waa mɛ amakyään ndandaa naa: Sɛmà ŋàbawà, bɛ mɛ làfàsaman anki tii làsàtɛn bɛ naa: "Wɛy nsaak ikäl akà mbuur awà ayà kà ikɔb a Mwol!" »

Mateus 23

Yɛsu kan’sà alɔɔŋ a un’kɔɔn anà Amfarisi unsà igyɛŋ

Mpem yweel a Amfarisi anà alɔɔŋ a Un’kɔɔn

Yɛsu anà Yɛlusàlɛm

Veja também

O que é o Espírito Santo e qual é o seu papel na vida cristã?

Oração para pedir a Deus que aumente a fé quando o coração está cheio de dúvida