MÀTAY 25:31-46 | YNS | Bíblia Online

Nsaŋ a ntsüü

31 « Mpal usàyà Mwan a mbuur unsà làkoo ande anà akyeey banswà, apan nde asàbwaay udu a kir a làkoo ande. 32 In’sɛŋ myanswà myàsàköŋ kusà ande. Nde asàkaab baar amwɛy anà bumwɛy, asànaa un’seey ufàkaab nde in’kɔk anà ntab. 33 Nde in’kɔk asasà u kɔɔ ande libaal, ntab u kɔɔ ande likaar. 34 Apan, mfum asàtɛn a baar bàsàkal u kɔɔ ande libaal naa: "Làyi, bɛ baar kàsaak Taaràmɛ. Làbilà ubɔɔ a imwol akyà bàlɔ̈ɔ̈n ntɔn bɛ sɛmà bàkyer mɛɛn. 35 Ntɔn mɛ, mɛ kàkäl anà ngyal, bɛ lan’pɛ isaa adyà. Mɛ kàkäl anà mfwää, bɛ lan’pɛ undiir anwà. Mɛ kàkäl ungyey, bɛ waa lan’wɛl, 36 mɛ kàkäl wànsàpɔl, bɛ waa lan’bwää. Mɛ kàkäl anà ukyal, bɛ waa làyan’ler. Mɛ kàkäl u bɔlokà, bɛ waa làyan’ler." 37 Apan, baar a balàbal bàsun’fuur naa: "Mwol, mpal nà kamɛn bi anà ngyal, waa bi kapɛ isaa adyà, itàkal anà mfwää, waa bi kapɛ undiir anwà? 38 Mpal nà kamɛn bi ungyey, waa bi kawɛl, itàkal wànsàpɔl waa bi kabwää? 39 Mpal nà kamɛn bi anà ukyal itàkal u bɔlokà, waa bi kàyaler?" 40 Mfum usafuur naa: "Mɛ, mɛ alakyään ndandaa: mbalà yanswà ayà làkyer bɛ indiir abi akà umwɛy ubɔɔ a bibaan akye bà, abà atɔŋ amɛ, bɛ bya làkyer akà mɛ." »

41 « Abun, nde asàtɛn a baar bàsàkal u kɔɔ ande likaar naa: "Baar aŋàküül! Làkyà kunà! Làkyen u mbaa a mbul a in’tye ayà bàyöŋà ntɔn ileŋ anà akyeey ande! 42 Ntɔn mɛ kàkäl anà ngyal, wɛɛ bɛ udyà lan’pɛ anki. Mɛ kàkäl anà mfwää, wɛɛ bɛ undiir anwà lan’pɛ anki. 43 Mɛ kàkäl ungyey, wɛɛ bɛ lan’wɛl anki, wànsàpɔl, wɛɛ bɛ lan’bwää anki. Mɛ kàkäl anà ukyal anà u bɔlokà, wɛɛ bɛ làyan’ler anki." 44 Apan ba bàsun’fuur naa: "Mwol, mpal nà kamɛn bi anà ngyal itàkal anà mpfwää, itàkal un’ngyey, itàkal wànsàpɔl, itàkal anà ukyal, itàkal u bɔlokà, waa bi mpa kabay?" 45 Mfum waa usafuur naa: "Mɛ, mɛ alàkyään ndandaa: mbalà yanswà mpa làkyer bɛ indiir abi byanswà akà umwɛy ubɔɔ a bibaan abi, bɛ bya sye làkyer anki akà mɛ." 46 Baar abà bàsàkyà u ntaaŋàmbar a mbul a in’tye, wɛɛ baar a balàbal u mɔ̈ɔ̈ a mbul a in’tye. »

MÀTAY 25

Nsaŋ a ntsüü

Estes versículos te tocaram? Ore agora!

Veja também

A genealogia de Jesus e sua importância para o natal

Liderança cristã: como delegar responsabilidades de maneira eficaz?