1 Mpal kàmɛn Yɛsu iköŋ a baar, nde kàbeenà udu a mɔŋ, waa kàbwaay. Alɔŋki ande bàsin apà nde, 2 nde waa kàsɛmà mukalɔŋ abà:
3 « Un’sak akà baar abye anà mpem a làbɔ̈ɔ̈n,
ntɔn Imwol a du kye anà ba!
4 Un’sak akà baar bàlelà,
ntɔn bàkyer asalɛɛl!
5 Un’sak akà baar a làbɔ̈ɔ̈n, ntɔn mɛɛn mà isàkal kwal aba!
6 Un’sak akà baar abye anà ngyal anà mfwää a balàbal,
ntɔn ba bàkyer asàyuur!
7 Un’sak akà aŋangyɛb,
ntɔn bàkyer asasyääm!
8 Un’sak akà baar abye anà mpem a pɛɛl,
ntɔn ba bàsàman Nzam!
9 Un’sak akà baar bàfàsà duu,
ntɔn bàsabel baan a Nzam!
10 Un’sak akà baar bàŋàmɛɛy nkwaaŋ ntɔn balàbal,
ntɔn imwol a du isàkal kyà ba!
11 Un’sak we anà bɛ isàkal naa bàmàlato, bàmàlamɛɛy nkwaaŋ anà bàmàlaküür ndaa ntɔn mɛ. 12 Làsäŋ, làkäl kun’sak, ntɔn bweel a kölàköl làmukàladilà u du. Abun sye bàmɛɛy ba nkwaaŋ akà aŋangɔɔm bàkäl kusà abɛ. »
13 Nde kàfàtɛn naa: « Bɛ, bɛ làbà muŋ a mɛɛn. Isàkal naa ntsà a muŋ yan’wà, ya bàsàfuur a nkye? Ndöŋ a wa yan’wà, wa bàpiy u nsà, baar waa bàndyäär wa. »
14 « Bɛ, bɛ làbà pɛɛlà uboo a baar. Bul bàtöŋ u du a mɔŋ làfàkal anki làŋàyee. 15 Bàfàkyä anki mwinà ntɔn musà u ngyɛl a kantin. Wɛɛ wa bàfàsà udu a ikɔlà bàfàtɔl mwinà ntɔn wa upɛ kyɛɛy akà baar banswà abà uboo a ndwà. 16 Abun sye, wɛy pɛɛlà abɛ làŋyɛŋ u mii a baar, mpal bàman ba nsyääl abɛ yàŋàbwaŋ, ba bàsà Taaràbɛ awà u du làkoo. »
17 « Twon lan’si naa mɛ kàyi ntɔn mulwom Un’kɔɔn itàkal Aŋangɔɔm. Mɛ kàyii anki muyàlwom mya, wɛɛ ntɔn mukwey wa. 18 Mɛ, mɛ amàlakyään ndandaa naa, kusà du anà mɛɛn mulyaŋ, akà i mwɛy, akà un’tswe a i mwɛy usàlwomà anki unsà Un’kɔɔn tii mpal isàkwo indiir abi byanswà. 19 Undiir awun, mbuur asàbɛy, itàkal kinswɛɛŋ mwɛy uboo a in’kɔɔn ami myanswà anà asàlɔŋ baar mukyer abà, nde asàkal kimbuur uboo a Imwol a du. Wɛɛ mbuur asàsyääl mya anà asàlɔŋ mya akà baar bumwɛy, nde asàkal mbuur a kölàköl uboo a Imwol a du. 20 Mɛ, mɛ alakyään naa: isàkal naa balàbal abɛ làlyaŋ anki balàbal a alɔɔŋ a in’kɔɔn anà Amfarisi, bɛ, bɛ taaŋ asàbilà uboo a Imwol a du latɛy. »
21 « Bɛ làkyàwem, bàtɛn a bànkaa naa: "Ngye mbuur asàdwa anki. Mbuur asàdwa mbuur, bàsun’sà u làbay a nsaŋ." 22 Waa mɛ, mɛ alakyään naa: mbuur wanswà awà kan’wem un’tɔŋ ande nkyɛl, bun’sà u làbay a nsaŋ. Mbuur usàtɛn a un’tɔŋ ande naa: "Ntsür a mbuur!", nde bun’sà u Làbay a nsaŋ a kölàköl. Mbuur usàtɛn a nde naa: "Insil", nde bun’tɔɔm u yaaŋ a mbaa. 23 Abun, isàkal naa ngye an’kàpà ibɔɔn u mɛsà a ibɔɔn, wɛɛ apan ngye asàyɔbà naa un’tɔŋ angye we anà nkyɛl anà ngye, 24 sàwɛy ibɔɔn angye paa kusà a mɛsà a ibɔɔn, kyen katàkàlɔ̈ɔ̈n anà un’tɔŋ angye, ungö apan, yafurà mupà ibɔɔn angye. 25 Lɔɔn agyä anà ŋankir angye, u taaŋ awà ngye u mbwo anà nde, naa tɛy, ŋankir angye awà kapà kan’kɔɔ a ntɛɛn, ntɛɛn kan’kɔɔ a pulusi anà nde katɔɔm u bɔlokà. 26 Mɛ, mɛ akyään ndandaa naa: ngye asàtoo anki kwo isàkal naa ngye ŋàtàfur anki tii u làdiim làntsüü. »
27 « Bɛ, bɛ làkyàwem bàtɛn naa: "Ngye asàtà anki inswem." 28 Mɛ, mɛ alàkyään naa: mbuur wanswà kan’ler un’kaar anà an’kyän an’be, nde kan’furàtà inswem anà nde u mpem ande. 29 Isàkal naa dii angye libaal làkwen mukabwiy, kwol la, piy la ukwɛl: ntɔn yà ubwaŋ akà ngye naa itiir a ndür angye mwɛy ikɔ̈ɔ̈n, akwà naa bàtɔɔm ndür angye yanswà u mbaa a mbul a in’tye. 30 Wɛɛ isàkal naa kɔɔ angye libaal làkwen mukabwiy, tsul la, piy la ukwɛl: ntɔn yà ubwaŋ naa ngye akɔ̈ɔ̈n itiir a ndür angye, akwà naa ndür angye yanswà ikyen u mbaa a mbul a in’tye. »
31 « Bàtɛn sye naa: "Isàkal naa mbuur kan’böŋ un’kyay ande, wɛy nde kun’pɛ un’kaan a ndwääl a bɔr". 32 Waa mɛ, mɛ alakyään naa: Yan’kwo bàböŋ un’kaar kan’tà inswem mpɛl. Mbuur wanswà kan’böŋ un’kyay ande mpa kàtɛ nde inswem, nde kàmusiinà mutà inswem. Mbuur usàbääl un’kaar ban’böŋ u bɔr, nde kan’tà inswem. »
33 « Bɛ làkyàwem sye naa bàtɛn a bànkaa abi naa: "Twon an’sàbɛy kyän angye, wɛɛ ngye asàkwey kyän angye kusà a Mwol." 34 Waa mɛ, mɛ alàkyään naa twon lan’dyà kyän akà ikikye: itàkal naa u du, ntɔn du là kir a imwol a Nzam, 35 itàkal naa u mɛɛn, ntɔn mɛɛn mà ikal ufàtɔl nde in’kɔl ande, itàkal naa u Yɛlusàlɛm, ntɔn la là bul a Mfum a kölàköl. 36 Twon an’dyà sye kyän kun’tswe angye, ntɔn ngye akwe anki mubuul làtswe a un’tswe angye làpɛɛl, itàkal làpiil. 37 Wɛy naa ɛ angye làkäl "ɛ", itàkal naa ŋaa angye ukäl "ŋaa": ayà bàfàkwɛy udu pa ifàfà akà Un’be. »
38 « Bɛ làkyàwem ayà bàtɛn naa: "Dii ntɔn dii, anà din ntɔn din." 39 Waa mɛ, mɛ alàkyään naa twon lan’sà impeenà akà mbuur un’be. Isàkal naa mbuur kàmakam mbar u twam a ibaal, fun’lɛɛ sye lumwɛy. 40 Akà mbuur akwen mukasyen u làbay a nsaŋ ntɔn mugyɔɔr inkur angye, un’wɛy alà sye kàzak angye. 41 Isàkal naa mbuur amasiinà a ngwal mukyer kilɔmɛtre imwɛy, kyer an’kilɔmɛtre mɔ̈ɔ̈l mbwo mwɛy anà nde. 42 Pà akà mbuur kàmalɔ̈ɔ̈m. Twon an’pà ngö akà mbuur akwen musɔɔm akà ngye. »
43 « Bɛ làkyàwem ayà bàtɛn naa: "Ngye asàkwen un’tɔŋ angye anà ngye asàtɔn ŋankir angye." 44 Wɛɛ mɛ, mɛ in’tɛn a bɛ naa: Lakwen aŋankir abɛ, làsaak baar bàfàlaküül, làkyer ubwaŋ akà baar bàfàlayiiŋ, anà làyamà ntɔn baar bàfàlatà an’kaal anà bàfàlamɛɛy nkwaaŋ. 45 Abun bɛ làsàbulà baan a Taaràbɛ awà u du. Ntɔn nde afàbaal mwäänà ande udu a baar abe anà udu a baar aŋàbwaŋ, anà afàtɔ̈ɔ̈l mbul udu baar a balàbal anà udu a baar mpa abà balàbal. 46 Kya isàkal naa bɛ, bɛ làfàkwen nà baar bàfàlakwen, bweel nà bɛ làsàwal? Nkye afüür a itɛr ba ŋakwo kà bàfàkyer anki abà? 47 Kya isàkal naa bɛ, bɛ mbɔr làfàpà nà atɔŋ abɛ mpɛl, undiir nà wà nsöön làfàkyer bɛ? Nkye baar mpa abà Ayudà sye bàfàkyer anki abun? 48 Undiir awun, làkäl bàlää asànaa Taaràbɛ awà u du awà nde wàlää. »
/images/a/Tcg2NiV7ce24OT6kCIQGR)
/images/a/qHG3xNP8jqR-HqIiucz0L)