MÀTAY 9

Mwan a mfum a un’yudà wun’kaar anà un’kaar kàtɛ ipfɛy a Yɛsu mpi.

18 Umpal kàtɛɛnà Yɛsu a ba abà, un’byääl mwɛy kàyàbwà an’köm kusà a nde, waa kàtɛn a nde naa: « Mwan amɛ wà un’kaar kan’kwà itaan a mbɔɔn tɛy. Wɛɛ yun’si an’kɔɔ, waa nde ufàyàkal anà mɔ̈ɔ̈. » 19 Apan, Yɛsu waa kàmbarà, waa kun’läb anà alɔŋki ande.

20 Taaŋ nsil alan, un’kaar mwɛy awàkàyitoo an’kil mbul kwem aŋiyweel, kàyàsin tsütsü ungö a Yɛsu, waa kàtɛ làpaan a ipfɛy ande mpi. 21 Ntɔn nde kàtɛɛnà naa: « Isàkal naa mɛ an’tà làpaan a ipfɛy ande mpi, mɛ in’kyer akɔɔrà. » 22 Mpal kàbulà Yɛsu anà kun’mɛn nde, nde kàtɛn a nde naa: « Mwan amɛ, sà un’kanà! Làkwikilà angye làmakɔɔr. » Taaŋ nsil alan, un’kaar awà waa kàkɔɔrà.

23 Umpal kàkɔlà Yɛsu u ndwà a un’byääl awà anà kàmɛn nde abɛɛrà a mfuŋ anà mini a iköŋ a baar, 24 nde kàtɛn a ba naa: « Làlwomà, ntɔn mwan un’kaar ŋàkwà tɛy, nde wàmubɔ̈ɔ̈n. » Wɛɛ ba waa bun’sɛɛ. 25 Ungö bàtwey ba iköŋ a baar, nde waa kàbilà, kàtɛ kɔɔ a mwan un’kaar awun mpi, mwan un’kaar waa kàwiyà. 26 Làsaŋ a ndaa ayi làkyer apää kun’tà awun.