1 Bi baar ibà ngwal, bi ikyer asɛɛn gyɔ̈ɔ̈là a baar mpa abà ngwal anà mukɔɔn aleŋ ubwaŋ abi ŋakwo. 2 Wɛy mbuur mbuur uboo a bi uleŋ mupà un’sak akà un’tɔŋ ande ntɔn mukun’bay muyɛl unsà làkwikilà. 3 Lalan, Klistɔ kàleŋ anki indiir byàpɛɛ nde un’sak, wɛɛ, asànaa bàsön naa: « In’tswe a abweel in’tswe angye myàkyàbwà udu a mɛ. » 4 Kyekà, indiir byanswà bàsön kusà byàkäl ntɔn an’lɔɔŋ abi, ntɔn naa, u mbwo a muküünà anà ndɛɛl yàtwääl Ndaa Aŋàsɔn, bi ikäl anà làkyän. 5 Wɛy Nzam a muküünà anà ndɛɛl, kàlapɛ mukal un’tüüb uboo a bɛ, asànaa ukwen Klistɔ Yɛsu, 6 ntɔn, u mpem mwɛy anà u mun mwɛy, bɛ làsi làkoo akà Nzam, Taar a Mwol abi Yɛsu Klistɔ.

7 Làkäl anà un’kaay bɛ a bɛ, asànaa Klistɔ kàlawɛl nde, ntɔn làkoo a Nzam. 8 Abun, mɛ alàkyään naa, kà ikɔb a lää a Nzam waa Klistɔ kàbulà un’syääl a baar aŋàkyɛy, ntɔn mukwey ilää kàpɛ nde akà bàtaa. 9 Akà baar mpa abà Ayudà, ba bàfàpà Nzam làkoo ntɔn nsyääm ande, asànaa bàsön naa:

« Kyakin, mɛ in’sasyäŋà uboo a in’sɛŋ a baar mpa abà Ayudà,

mɛ in’sàtɔɔl diim ntɔn ikɔb angye. »

10 Nde kàfàtɛn naa:

« In’sɛŋ a mpa abà Ayudà, làsäŋ anà un’sɛŋ ande! » 11 Itàkal sye:

« In’sɛŋ a mpa abà Ayudà, bɛ banswà làsyäŋà Mwol,

in’sɛŋ myanswà lun’syäŋà! »

12 Yɛsay kàfàtɛn naa:

« Kà itoo a Zesɛ, mbuur akyer asàyà,

nde akyer asàmbarà ntɔn muyaal in’sɛŋ a baar mpa abà Ayudà.

Baar mpa abà Ayudà bàsàsà làkyän amu nde. »

13 Wɛy Nzam a làkyän kàlayööl a un’sak wanswà anà duu unsà làkwikilà, ntɔn bɛ làkäl anà làkyän aŋàsöönà u ngwal a Dweelà In’kyɛɛl!

14 Ntɔn bɛ, atɔŋ amɛ, mɛ an’kyey ndandaa naa bɛ làbà bɛ ŋakwo làŋàyɔl a ubwaŋ, làŋàyɔl a un’yɛnà wanswà anà lan’kwo mupà an’lwɛŋ bɛ a bɛ. 15 Apan, ntɔn mufàbay an’kyän abɛ mbaa, mɛ amàlasöön anà unkir kà ikal byumwɛy, ntɔn kab a ngway kan’pɛ Nzam 16 mukal un’syääl a Yɛsu Klistɔ apà baar mpa abà Ayudà, mupà mɔ̈ɔ̈ amɛ wanswà kà isal a Làsaŋ Aŋàbwaŋ là Nzam, ntɔn naa baar mpa abà Ayudà bàbulà an’kab kàkyey Nzam, màŋàkyɛɛl amu Dweelà In’kyɛɛl. 17 Lalan, mɛ in’we anà ngaal amɛ amu Klistɔ Yɛsu ntɔn isal a Nzam. 18 Ntɔn, isàkal naa mɛ in’we anà undiir atɛn, mɛ in’tɛn nà indiir kàkyer Klistɔ u mbwo amɛ ntɔn musyen baar mpa abà Ayudà kà unkyeey: amu ndaa anà amu isal, 19 unsà ngwal a idiim anà impà, unsà ngwal a Dweelà a Nzam. Apan, sɛmà Yɛlusàlɛm anà ikal a tsütsü tii u Iliri, mɛ kàkyään aŋàkwo Làsaŋ Aŋàbwaŋ là Klistɔ. 20 Wɛɛ mɛ kàsi ibyääl mukyään Làsaŋ Aŋàbwaŋ nà kà ikal mpa bàkäl aŋàtàtà ikɔb a Klistɔ din, ntɔn mukɔɔn atɔŋ udu a in’bään kàsi mbuur asin. 21 Kyakin mɛ in’lab ndaa bàsön naa:

« Baar mpa bakyään ntɔn Nde, bàkyer asàman,

ba akwà mpa bàkäl aŋàtàwem musam ntɔn Nde, bàkyer asàyöb. »

22 Undiir nsil awun kan’tsüŋà mbalà mbɔɔn muyà akà bɛ. 23 Wɛɛ apan, mɛ in’fàkal anki anà ikal asal ntsü ayi akà, anà, sɛmà mbul mbɔɔn, mɛ in’we anà ngyal mbɔɔn muyà akà bɛ, 24 umpal in’yàkyà mɛ Ɛspanye. Mɛ an’sà làkyän muyàlaler utaaŋ in’yàlyaaŋ mɛ anà bɛ mukan’bay mukyà kwo, ungö atàyɔl a un’sak, itàkal ikikye, mukal anà bɛ. 25 Wɛɛ apanà, mɛ in’wàmukyà Yɛlusàlɛm ntɔn musyääl aŋin’kyɛɛl. 26 Ntɔn, Masɛdwan anà Akayi bàtsül mbar muköŋà indiir, ntɔn mubay aŋàlàmbwà abà uboo a aŋikyɛɛl a Yɛlusàlɛm. 27 Inye, ba ŋakwo bàtsül abun, wɛɛ, kutɛn aŋàbwaŋ ba bàlàkyer abun. Ntɔn, isàkal naa baar mpa abà Ayudà bàwɛl kab unsà indiir in’kyɛɛl aba, ba sye bàkyer afasyääl unsà indiir a ngyal aba. 28 Umpal in’sàkal mɛ aŋàmay anà aŋàpà kà imɛɛy indiir ban’bwiy, mɛ in’yàkyà Ɛspanye, muyàlyaaŋ apà bɛ. 29 Mɛ in’kyàyöb naa muyà akà bɛ, mɛ in’yàyà aŋàyɔl a nsaak a Klistɔ.

30 Mɛ in’lɔm akà bɛ, atɔŋ, akà Mwol Yɛsu Klistɔ anà u mbwo a ukwen a Dweelà, munwan un’tüüb anà mɛ u mbwo a ngyamàkà làsaa bɛ akà Nzam ntɔn mɛ, 31 ntɔn mɛ in’kɔ̈ɔ̈n akwɛlà akà baar a Yuday bà mpem bwoor bà, ntɔn mbaay in’syen mɛ u Yɛlusàlɛm, aŋikyɛɛl bàwɛl ya ubwaŋàbwaŋ. 32 Abun, mɛ in’yàkɔlà apà bɛ unsà un’sak, kà ukwen a Nzam, anà muyöör anà bɛ. 33 Wɛy Nzam a duu ukäl anà bɛ banswà! Yà abwɛy!