1 Atɔŋ, ikamɛnà naa bɛ lan’diimà - mɛ in’tɛɛnà a baar bàyöb un’kɔɔn - naa nkye bɛ làyöb anki naa un’kɔɔn afàkal anà ikɔ̈b udu a mbuur nà utaaŋ awà nde anà mɔ̈ɔ̈? 2 Abun, un’kaar aŋàbääl wà un’tüüb, unsà un’kɔɔn, anà mbääl ande utaaŋ awà nde anà mɔ̈ɔ̈. Wɛɛ nde usàkwà, nde ufàfàkal anki ungyɛl a un’kɔɔn a bɔr. 3 Abà, isàkal naa nde kan’wal un’dim asin utaaŋ awà mbuur awà anà mɔ̈ɔ̈, nde kan’tà inswem. Wɛɛ, isàkal naa un’dim kan’kwà, nde kan’bulà nsaay kusà a un’kɔɔn, apan nde uyàkal anki ŋinswem mubulà un’kyay a mbuur asin. 4 Abun sye ntɔn bɛ, atɔŋ amɛ, bɛ bàkyàlasà kà ukwà kusà a un’kɔɔn, u mbwo a ndür a Klistɔ, ntɔn mubulà baar a mbuur asin, Mbuur awà kàwiyà uboo a akü, ntɔn bi itwey mbɛŋ ntɔn Nzam. 5 Kyakin, utaaŋ kàkäl bi unsà in’twaŋ, ilään a man’be màfü unsà un’kɔɔn, màsyäälà itiir a ndür abi, ntɔn bi itwey mbɛŋ ntɔn ukwà. 6 Wɛɛ apanà, kàkü bi unsà ikɔ̈b kyàkäärà bi kà isɔ, bi kàkyàtoo nsaay kusà a un’kɔɔn. Ntɔn bi isäl ungyɛl a ikɔ̈b akün kyà Dweelà, wɛɛ kà ungyɛl a ikɔ̈b itaan kyà un’kɔɔn aŋàsɔn anki.

7 Abun, ininà bi itɛn? Nkye un’kɔɔn wà man’be? Kà abwɛy anki! Wɛɛ, yàlàkal naa un’kɔɔn watɛy, mɛ man’be kàlàyöb anki. Abun, mɛ kàlàyöb anki ngyööm a mpem, yàlàkal naa un’kɔɔn kàtɛɛn anki naa: "Twon an’yɔm mpem." 8 Mulab ndaa ayi, man’be màbör amu mɛ ngyööm a mpem yà ifà ifà u mbwo a nswɛɛŋ. Ntɔn, yàlàkal naa un’kɔɔn ukɔ̈ɔ̈n, man’be màlàkal undiir aŋàkwà. 9 Itaan, mpal kàkɔ̈ɔ̈n un’kɔɔn, mɛ kàkäl anà mɔ̈ɔ̈. Wɛɛ mpal yàyi nswɛɛŋ, man’be màfàwal mɔ̈ɔ̈, 10 mɛ waa kàkü: nswɛɛŋ yàlàsyeen u mɔ̈ɔ̈, yan’syeen kà ukwà. 11 Ntɔn man’be, u mbwo nsil ayin, laa man’kür ma, u mbwo a nswɛɛŋ, anà u mbwo a wa, waa kan’pɛ ukwà.

12 Abun, un’kɔɔn wà in’kyɛɛl, nswɛɛŋ yà in’kyɛɛl, balàbal anà ubwaŋ. 13 Apan, nkye undiir aŋàbwaŋ kàkyàtwaal ukwà ntɔn mɛ? Kà ndandaa anki! Wɛɛ mà man’be: ma màsyääl undiir aŋàbwaŋ mukan’pà ukwà, ntɔn wa kàmɛnà asànaa man’be anà muswaŋ nkyɛl a man’be, u mbwo a nswɛɛŋ.

14 Ndandaa, bi bàkyàyöb naa un’kɔɔn wà wàdweelà. Wɛɛ mɛ, mɛ in’wà mbuur a un’sön a ndür, bàkyän’yälà u man’be asànaa un’sɔ. 15 Ntɔn, mɛ in’fàyöb anki ayà in’fàkyer mɛ: mɛ in’fàkyer anki ayà in’fàkwen mɛ, wɛɛ mɛ in’fàkyer ndaa in’fàtɔn mɛ. 16 Abun, isàkal naa ayà mpa in’fàkwen mɛ, mɛ in’fàkyer ya, mɛ an’kyey naa un’kɔɔn wà ubwaŋ. 17 Kà mɛ anki in’kyer abun, wɛɛ man’be amà amu mɛ. 18 Ntɔn mɛ in’kyàyöb naa amu mɛ, - mɛ in’kwen mutɛn uboo a ndür amɛ - ubwaŋ batɛy: ukwen akyer ubwaŋ bàmwo, wɛɛ mɛ in’kakwo anki mukyer ba. 19 Kyakin ubwaŋ in’kwen mɛ mukyer, mɛ in’kyerà anki, wɛɛ ube mpa in’kwen mɛ, mɛ in’wàmukyer ba. 20 Kyekà, isàkal naa mɛ an’kyer ayà mpa in’kwen mɛ, kà mɛ anki an’kyer, wɛɛ man’be amà amu mɛ. 21 Apan, mɛ an’man un’kɔɔn wà: mpal in’kwen mɛ mukyer ubwaŋ, ube bàmanääm. 22 U mpem amɛ, mɛ in’fàman un’sak ntɔn un’kɔɔn a Nzam. 23 Wɛɛ, uboo a itiir a ndür amɛ, mɛ an’fàman un’kɔɔn asin wàmunwan a un’kɔɔn a un’yɛnà amɛ, wa kàman’buul un’sɔ a un’kɔɔn a man’be amà uboo a itiir a ndür amɛ. 24 Ngyɛb akà mɛ! Nà asan’tsuuŋ u ndür a ukwà yi? 25 An’tɔɔn akà Nzam u mbwo a Yɛsu Klistɔ, Mwol abi! Mutsülà, mɛ ŋakwo in’wà un’sɔ a un’kɔɔn a Nzam unsà un’yɛnà, un’sɔ a un’kɔɔn a man’be unsà ndür.