1 Nkir anà ngwiy uboo abɛ yan’fà ken? Nkye kà ntɔn ilään byàfànwaan uboo a ndür abɛ anki? 2 Bɛ làfàyɔm mpem anà bɛ làfàwal anki undiir. Bɛ làbà adwää anà aŋun’köl, anà bɛ làkwe anki muwal iböŋ. Bɛ làfànwaan anà làfàtwal an’sye. Bɛ undiir watɛy, ntɔn bɛ làfàlɔm anki. 3 Kya bɛ làsàlɔm, bɛ làfàwal anki undiir, ntɔn ndɔ̈ɔ̈m abɛ yà ube: ntɔn indiir làfàlɔm bɛ, bɛ bya làfàsyääl ntɔn ilään abɛ. 4 Bɛ aŋinswem! Nkye bɛ làyöb anki naa ukwen a indiir a mɛɛn bà un’yiiŋ a Nzam? Abun, mbuur usàkwen mukal un’sam a mɛɛn, nde kan’bulà un’yiiŋ a Nzam. 5 Nkye bɛ làsii naa abunàbun waa Ndaa Aŋàsɔn itɛɛnà naa: « Nzam akwen unsà un’köl Dweelà kàsi nde amu bi. » 6 Wɛɛ Nzam afipà kab a ngway làŋàsöön, ntɔn Ndaa Aŋàsɔn itɛn naa: « Nzam afàmbäär aŋun’yɔl, wɛɛ nde afàswaŋ ubwaŋ ande akà aŋàlàbɔ̈ɔ̈n. » 7 Abun, làpɛ mɔ̈ɔ̈ abɛ akà Nzam, wɛɛ làmbäär ileŋ, waa kya isàtiin ukwɛl apà bɛ. 8 Làsin tsütsü apà Nzam, waa nde usàsin tsütsü apà bɛ. Bɛ baar a man’be, làywɛy an’kɔɔ abɛ, anà làpöŋ mpem abɛ, baar a mpem yweel! 9 Làyweer mpay abɛ, làsi un’saabà anà làlel. Wɛy naa an’sɛ abɛ màbulà ilel anà un’sak abɛ ubulà ngyɛb! 10 Làkäl anà làbɔ̈ɔ̈n kusà a Mwol waa nde usàlasɛɛn.

11 Atɔŋ, twon lan’twe bɛ a bɛ. Mbuur afàtwe un’tɔŋ ande, itàkal naa afàtsul nsaŋ ande, nde wàmusaal Un’kɔɔn anà mutsüül wa mbar. Kyekà isàkal naa ngye an’tsüül Un’kɔɔn mbar, ngye afàkal anki un’syääl a wa, wɛɛ ngye awà ntɛɛn. 12 Mbuur mwɛy mpɛl afàpà un’kɔɔn anà nde mpɛl sye awà ntɛɛn. Nde mpɛl kan’kwo mutswà mɔ̈ɔ̈ anà mudwa wa. Ngye, ngye awà nà mutsüül mbääb angye mbar?

13 Abun, bɛ baar làfàtɛn naa: « Ŋàbà, itàkal naa nkàswà, bi iyàkyà bul là. Bi kwo ikàkyer mbul mwɛy, bi isàkàtà an’yà, anà bi isàkàwal ngim. » 14 Wɛɛ bɛ, bɛ làyöb anki akà ikikye naa nkàswà mɔ̈ɔ̈ abɛ asàkal aben, ntɔn bɛ làbà asànaa un’swey kan’mɛnà, ungö a kitaaŋ kan’fàyaalà. 15 Le, bɛ làlàtɛn naa: « Isàkal naa Mwol kan’kwen, bi isàkal anà mɔ̈ɔ̈ anà bi isàkyer abà itàkal abunà. » 16 Wɛɛ apanà bɛ làbàmuswaŋ ngaal unsà uyɔl abɛ. Uyɔl atubàbà bube. 17 Abun, isàkal naa mbuur mwɛy akyàyöb mukyer ubwaŋ, wɛɛ isàkal naa nde ba ukyer anki, apan nde kan’bwà unsà man’be.