Yohana 12

Yeesu arasuungʼaanwa Yerusaremu kya Masiya

12 Tabhoori yaho, esaango ekuru ya abhaatu bhano bhakaaza kuginiha Enyaangi yo Okuhiita, bhakiigwa kubha Yeesu ari munzira araaza Yerusaremu. 13 Ambe, bhakagega amatu ge emiteende, bhakagya kumusuungʼaana Yeesu. Bhakatiirya eriiraka bhakubhuga,

"Taatabhugya akumibhwe!*12:13a Taatabhugya akumibhwe, kwe ekigaambo kye Ekieburania ni Hosana no obhugazuro bhwaku "Otuurye bhoono."

Atweerwe ebhite wuno akuuza kuriina ryo Omukuru!

Aguungibhwe omutemi wa Abhiiziraeri."*12:13b Rora Zaburi 118:25-26.

14 Ambe, Yeesu akabhona etikiri, akatiira, akiikara kyeego ekaamirwe mu Makaamo Amahoreeru,

15 "Emwe abhaatu bha Sayuni,*12:15a Sayuni ni riina eriindi rya Yerusaremu. mutoobhoha!

Rora, omutemi weenyu araaza,

atiiriri etikiri!"*12:15b Rora Zakaria 9:9.

16 Eriibhaga riyo, abhaanabheega bha Yeesu bhataamenyiri engʼana yino ni ngʼanaki. Nawe hano Yeesu yaryookiri, bhakahiita kubha gayo gakaamirwe na niigo bhamukoreeri.

17 Abhaatu bhano bhaari na Yeesu hano yamubhirikiiri Razaro okurwa mumbiihira no okumuryoora okurwa mubhaku, bhakageenderera kunyaragania amangʼana gayo. 18 Ambe, abhaatu bhaaru bhaari bhiigwiiri amangʼana ge ekitiika kino Yeesu yakoriri, nikyo ekigirye bhakagya kumusuungʼaana. 19 Nawe Abhafarisayo bhakiibhuurya, "Murarora? Tutakunagya kukora kyokyoosi! Rora, abhaatu bhoosi bharamutuniirira ewe."