Jezebel kyate Elijah A Ccue
1 Elijah nynh a cyipaw balyn te thaloi te profeh hae balyn a chiapaw kha Ahab nynh Jezebel kya marya a hopya. 2 Te Jezebel nynh Elijah kalan khe locceihtu lu kheit saw zah, "Na hiinnaw kha awkhualan atu ccyh kya tuh-e profeh hae hiinnaw hawte ka cyi khyh lanze, pachia hae nynh ka tungvaw kya tuh-e ciate thuasah, tuhlaeze alung lante mah thuasah cyih vae hae sah," a cipya. 3 Tetuh Elijah tuh a ri keiccuze thokuh zah a hiinnaw lue khylan Judah ram e Beersheba khua lang a ccue; tuin kyakhe a ryalahtupaw kha a cciatawsya.
4 Amaw tuh nin kheit laanccia ramkaw lang cceih zah innphi ku kaw a thua te a haung. Te a chi nawlan ngia zah, "Pou Bawipaw , azaw vae; atu tuh ka hiinnaw hynh yn lah ccavae, pawccecize kae tuh ka minpaaw hae laeze ahoy huapaw ka thua khyh," a ci.19.4: Jon 4.3 5 Te innphi ku kaw marya a ih. Vaekheitmawte vaawpaw nynh hae zah, "Thokuh lah ae," a cipya. 6 Elijah nynh do zah a luki khe lung asopaw vawlan aruakuhpaw sanlou phe kheit te tui ling kheit kha a muih. Ae zah a neih koute bua a ih. 7 Bawipaw vaawpaw tuh vae ningnaw yn thua zah aning kha hae zah, "Na cceih cihnaw laanpi tuh myarya asaw keiccuze thokuh lah ae hin," a cipya. 8 Thokuh zah a ae a neih; tuh-e looh thawzung tuhte nin sung pali te zi sung pali, Pachia mua Horeb langkhe a cceih.