Mateus 8

Raerangsaro Bahkuh hae paw

28 Jesu tuh rili khuraw lang Gadara ram he a thua te, raerangsaro bahkuh hae paw lu ning nynh shawku kyate oun pou hae zah amaw kha oun tungku hae; minmin tuh ri lan myarya um hae zah humhung nynh mah tuh-e laanpi te cceih ngan khyh hae. 29 Te minmin nynh vaekheihmawte, "Pachia Ccapaw, nang te kaening tuh pawmou ah sekuh oh? Accyh azaw mawze kaening hynh vawsaw pya khylan tou hynhlang nae thua?" cite a sia hae. 30 Te minmin kyate eih asaw leinaw khe rampaeekuh hae paw voh phu kheit a um. 31 Te raerangsaro hae nynh, "Nang nynh kaening hynh nae dee ze, voh hae lungkhu lang beih oun teesah," cite a ngiaku hae. 32 Jesu nynh minmin kha, "Cceih oh!" a cipya hae. Tukeiccuze minmin tuh pou hae zah voh hae lungkhu lang a tee hae; voh hae tuh mih balynte apannaw lang thawmawte ccuebung hae zah rili lungkhu lang phungkuh hae zah tui kya pong a chih hae. 33 Voh a rintu hae tuh ccue hae zah khua lungkhu lang a tee hae, te raerangsaro bahkuh hae paw kya acyihkuhpaw balyn kha a hopya hae. 34 Khuaccaaw hae balyn nynh Jesu te tungku lan oun cceih hae zah amaw kha he a muih hae te, mih ram kyate a pou nawlan a ngia hae.