8 Tuhcite Pachia kawbya ccauh kha byaleih biate a ria hae. Ccungccaw hae nynh a ria hae paw kha a thaethya nawlan hae asuilan a ccaesahpya hae.
9 Ram uktu Nehemiah, ranpibawi te kawbya sazae athuapaw Ezra te ccungccaw hae a ccangpahtu Levi phin hae nynh ccungccaw hae kha, "Atunin hynh Bawipaw nae Pachia hanlan nin thyaapaw nynh thua; nae ngaethah nan sah, raw mah rah nan oh," a cipya hae. Pawccecize ccungccaw balyn tuh kawbya kya-e bya kha he a thae hae tuh a rah hae. 10 Te aning nynh minmin kha, "La cceih oh, looh athuathuapaw kha la ae oh lah, misutui a-epaw kha la neih oh, te pawpaw mah a hoi lei hae paw kha la neethungbua oh; pawccecize atunin tuh ah Bawipaw hanlan athyaapaw nin nynh thua; Bawipaw kya nae lungtuanaw tuh nae thawzung athua keiccuze nae ngaethah nan sah," a cipya hae. 11 Tukeiccuze Levi phin hae nynh ccungccaw balyn kha daesah hae zah, "Atunin tuh athyaapaw nin athua keiccuze daebabi lan umtua oh; nae ngaethah nan sah," a cipya hae. 12 Te ccungccaw balyn nynh a hopya hae paw bya kha a thaethya hae keiccuze ae khylan, nia khylan, milae hae kha neethungbua khylan te lungpawnaw pipi rae khylan a cceih hae.