ZEKHARIAH 9

Israel Rhaw hae kha Byapianaw

1 Hodaebya.✝9.1: Isa 17.1-3; Jer 49.23-27; Amo 1.3-5✝9.1-4: Isa 23.1-18; Eze 26.1—28.26; Joe 3.4-8; Amo 1.9-10; Mat 11.21-22; Luk 10.13-14

Bawipaw bya nynh Hadrak ram te

Damaskas khua kha a rawse cih.

Israel phin hae balyn kyalya thua leite

Siria khuapi kha mah

Bawipaw kya-e nynh thua.

2 Hadrak ramri a umpaw

Hamath khua mah

amaw kya-e nynh thua,

Tair khua te Sidon khua tuh

myarya a haw hae zemah

amaw kya-e nynh thua hae.

3 Tair nynh rhawlungrua kha a raeku,

ngun kha vuiping hawte

pumkuh zah,

sui kha laanpi kya umpaw

tuiccua hawte a pumku.

4 Thuasalama Bawipaw nynh

a hoirumnaw kha a lawpah cih,

a sisua kha rili lungkhu lang

a phungpah cih zah,

khuapi kha maee te soi athua cih.

5 Ashkelon khua nynh

tuh-e tuh a muih cih zah a rih cih;

Gaza khua nynh mah a muih cih zah

lungriathaete a um cih;

Ekron khua mah

a ngaehoinaw azo keiccuze

tuhcite athua cih.

Gaza siapharan tuh azo cih;

Ashkelon khua kya

ccungccaw um lan khyh;✝9.5-7: Isa 14.29-31; Jer 47.1-7; Eze 25.15-17; Joe 3.4-8; Amo 1.6-8; Zef 2.4-7

6 Ashdod khua kya

kaapia hae a um cih hae,

Filistin hae mih lysakunaw kha

ka thangsah cih.

7 Aning nynh a aepaw chiise kha

a khalang kyate ka lah cih zah,

aning nynh a boupaw

anungsikuhpaw kha

a haw hae laku kyate ka lah cih;

a laehypaw ccungccaw tuh

ah Pachia hanlan

a laehypaw athua cih zah,

Judah phin lungkhu e

phin kheit hawte athua cih,

Ekron khuaccaaw hae tuh

Jebus hae hawte athua cih hae.

8 Humhung nynh mah

a ccianua bungthung khyh nawlan,

ka inn kyakhe rhawviatu lante

ryahmin ka tahkuh cih;

tuaasahtu nynh minmin kha

bua thiing vae lan khyh hae,

pawccecize ka mit ccaccei te

atu phe ka muih vae.

Oun Thua Cih paw Uktu

9 Pou Zion ccanung,

na lung myarya tua sah!✝9.9: Mat 21.5; Joh 12.15

Pou Jerusalem ccanung,

thawte siatua!

Pawccecize na siapharan tuh

na kalan yn cceih cciamang;

aning tuh taetu thua zah

taenaw te yn cceih,

thinlung nepaw thua zah

lann tungvaw a ccikuh,

lann taraw tungvaw,

lann a taw tungvaw ccikute yn cceih.

10 Kae nynh Efraim ram kyate

marangle kha ka dee cih zah,

rhawtuknawpaw marang kha

Jerusalem kyate ka dee cih;

rhawtuknawpaw li kha

vua athua cih zah,

minphuin hae kha

daenaw bya ka hopah cih hae;

ka uknaw tuh rili ccangkheit kyate

rili ccangkheit kyacia

a phah cih zah,

Vawpi kyate laephi

adianaw cia a thua cih.✝9.10: Sam 72.8

11 Nang na hanlan tuh, nang te ah raekheihpaw

ka byakinnaw chiise keiccuze,

thongccah hae paw

na ccungccaw hae kha

tui um leinaw laekarung kyate

ka luesah cih hae.✝9.11: Exo 24.8

12 Pou ngaehoinaw a hoi hae paw

thongccah hae,

nae rhawlungrua lungkhu lang

kithui oh; nanning kha

hiin hoynaw leit ning

kae pyathui cih oh, cite atunin ka ho vae.

13 Pawccecize Judah kha

ka li hawte ka koi vae;

Efraim kha the lang ka rae vae.

Pou Zion, na ccapaw hae kha

mih lung ka thosah cih zah,

pou Grik, na ccapaw hae kha

ka dousah cih hae,

nang kha rhawkaw thaloi lang

kae mang cih.

14 Bawipaw tuh mih tungvaw khe

yn langkuh cih zah,

a the tuh khozawlaekuhpaw

hawte a kaw cih;

Bawipaw PACHIA nynh

mungkae a tu cih zah,

alia lang e khiccung ryte

a cceih cih hae.

15 Vaaw Bawipaw nynh

minmin kha a thungkhaw cih hae,

minmin nynh a roh cih hae zah

deihnawpaw lung hae kha

a syde cih hae;

mih chii kha misutui hawte

a neih cih hae zah

pakekhupaw abia hawte

abeih cih hae,

silawhang apaki hawte

ciadadae lan a um cih hae.

16 Tuin nin vae tuh

Bawipaw mih Pachia nynh

minmin kha a khum cih hae,

pawccecize minmin tuh

a ccungccaw hae nynh thua hae;

a ram kyakhe

bawilukhung kya-e

aphutepaw lung hawte a aw cih hae.

17 A hoynaw te a puithyanaw tuh

pawcih baban mou ale!

Ccathae nynh ccangvae hae kha

mih thawsaesah cih hae zah,

misutui thawpaw nynh

liaccaw hae kha

mih thawsaesah cih hae.