1 Yohana 2

12 Niimbaandikila abáana baanze enfula,

ha kuba mwaáganyiilwe ebiheno byáanyu ha kulabila izíina lya Yeézu Kristu.

13 Niimbaandikila íimwe ba táata,

ha kuba mwaámusoombookelwa Yeézu Kristu,

ogwo ayaabeele aliho kulugiilila ha bubaandizo.

Niimbaandikila íimwe abasigazi,

ha kuba mwaálisíinga elyo Izilwa, Isitáani.*2:13 Isitáani: Habwo obusoomboozi bwooli osome Obusoomboozi habwa Amagaambo Agagumile.

Niimbaandikila íimwe abayaánda,

ha kuba mwaámusoombookelwa Isíichwe Múungu.

14 Niimbaandikila íimwe ba táata,

ha kuba mwaámusoombookelwa weényini,

ogwo ayaabeele aliho kulugiilila ha bubaandizo.

Niimbaandikila íimwe abasigazi,

ha kuba mwiina amagala,

ne echigaambo cha Múungu nichiikala omu myooyo yáanyu,

káandi mwaálisíinga elyo Izilwa, Isitáani.

15 Ha bwéecho, mutaákweenda kukola obuzilwa nka abaantu áabo abatakumugomookela Múungu. Mutaákweenda obuzilwa bwoóna bwóona bwo omu nsi.*2:15 Mutaákweenda kukola obuzilwa nka abaantu áabo abatakumugomookela Múungu. Mutaákweenda obuzilwa bwoóna bwóona bwo omu nsi: Obusasaanuzi obúundi byaándikilwe nka nikwo, muleke kweenda éensi, nali amagaambo áago gali omu nsi. Kábilaaba omuuntu weéna wéena naayeénda obuzilwa bwo omu nsi, takumwéenda Isíichwe Múungu,