Atos 2

Kwiízuzwa obuhicha kuluga ha Mwooyo Mutakatíifu echilo cha Peentekoste

1 Obuchilo bwe echilo cha Peentekoste*2:1 Peentekoste: Eyaandikilwe omu Chiyunani, makúmi ataanu echilo chikúlu chi igesa. Abayahudi bakalya amazenyi buchilo byaáhiíngwiile ebilo makúmi ataanu kuluga omu chilo chikúlu cha Paásika. Omu Ndagano ya Kala chikaba chili echilo chikúlu chi igesa, ne emisumo ya mbele. Omu Ndagano Eénsha echilo chikúlu echi bukaba buli obuchilo bwe entumwa kwiinaankula Omwooyo Mutakatíifu kuluga hali Múungu. kabwaahikile, abaantu bóona áabo abamwiíkiliize Yeézu bakaba bakobile omu nzu eémo. 2 Ahonyini, iláka elyaabeele lili nke echiihúle cho omuyaga, gwaáhéemba kuluga omu igulu, gwéeza gwéezula omu nzu yóona éezo bakaba beekeelemo. 3 Ahonyini beesulukizwa ebiintu bili nke endími zo omulilo, byeebaganisa, byeekala aha lugulu ya buli oómo wáabo. 4 Abaantu abo bóona beezuzwa obuhicha kuluga ha Mwooyo Mutakatíifu, baábaanza kugaamba ha ndími ezíindi, nko óokwo Omwooyo Mutakatíifu yaabeendíize kugaamba.