Atos 2

Peétero naasoomboólela abaantu empola zo Omwooyo Mutakatíifu

14 Náho Peétero yeémeelela, hamo ne entumwa bazeenzíbe abo ikúmi no oómo, yaábagaambila abaantu áabo ahi iláka liháango, "Íimwe Bayahudi, neemwe abáandi áabo mulikutúula aha Yeruzaléemu, muumpuliilize kuzima, mbone kubasoomboolela ebyo! 15 Nimuzila múti abaantu aba batamiile, amazima, aba baantu tibatamiile. Óobu hacháali ne esáaha isatu kwoónka ze enchaákala! 16 Náho amagaambo aga nigo áago gaagaambilwe kulabila aha mubáasi Yoeli,

17 Múungu naagaámba nka nikwo, ‘Omu bilo byo omuheleeluko,

niimbaseésela abaantu bóona Omwooyo gwaanze.

Batábani báanyu na bahala báanyu balaabáasa,*2:17 Balaabáasa: Aháandi ni balaáhaánga, ensoonga kugaamba echitakabeeleho chikeeza kubaho.

na abasigazi báanyu nibabona ameezaho,

na abanyaampala báanyu nibaloóta ebiloosi.

18 Omu bilo ebyo niimbaseésela Omwooyo gwaanze

no óobu aha lugulu ya abazáana baanze, abakwaáta na abakázi,

nábo balaágaamba obubáasi.

19 Niinkola amahano omu igulu olugulu,

ne emanyiso omu nsi ahaansi,

obwáamba, no omulilo,

no olwoóyela lwíinzi lwe elíika.

20 Izóoba lilaáhiinduka kuba ensiimbaazi,

no okwéezi kuláaba okulikutukula nko obwáamba.

Ago góona galáaba obuchilo chitakahikile echilo chikúlu chi ikuzo lyo Omukáma Múungu.

21 Na buli muuntu óogwo alikwéeta

ahi izíina lyo Omukáma Múungu, naachuungulwa.’✝2:21 Osome Yoeli 2:28-32."

22 Peétero yaázeendelela kugaamba, "Íimwe bakwaáta Abanyaiziraeli, muhuliilíze! Múungu akamumanyisa butúnu Yeézu Omunyanazaréeti hali íimwe, ha muháanda gwa amahano go kusobeza ne eméenko kulabila hali weényini, éezo Múungu akamuhikiiliza kuzikola omuli íimwe. Ago, íimwe nyini nimugamanya kuzima. 23 Káyaabaliile ogu Yeézu yaásohozwa hali íimwe, nka Múungu okwo yaálamwíile kwiingana ne ensoonga yoómwe kuluga ha bubaandizo. Neemwe mukamubaamba no kumwiítila aha musalaba, aha muháanda gwo kulabila Abanyamahaánga*2:23 Abanyamahaánga: Habwo obusoomboozi bwooli osome Obusoomboozi habwa Amagaambo Agagumile. abatakusaaswa ebilagilo. 24 Náho Múungu akamuzoola kuluga omu bafwiile, yaámuchuúngula ne ebyaágalalo byo olufu, habwo kuba mazima tichikwiíle lufu kuzeendelela kumukóma Yeézu! 25 Kuba náwe Omukáma Daudi akagaamba aáti habwa Yeézu,

‘Nkaba mmubona Omukáma ali Múungu omu méeso gaanze buli bucha.

Na habwo kuba ali olubazu lwaanze lwo obúlyo, tiínkuchuúndagulika.

26 Ha bwéecho, omuganya gwaanze nigusemelelwa,

káandi olulími lwaanze niluteéla emihila.

No óobu omubili gwaanze nágwo, nigutuúla aha bweetegeza bwa weényini,

27 habwo kuba íiwe toligunagilana omwooyo gwaanze omuli kuzimu,*2:27 Kuzimu: Habwo obusoomboozi bwooli osome Obusoomboozi habwa Amagaambo Agagumile.

na káandi tokukuunda omubili gwaanze guzuúnde, íinye Omutakatíifu waawe.

28 Waányoleka emiháanda zo obulami,

noonyizuza amanulilwa, habwo kuba oli héehi neenye.’✝2:28 Osome Enzina 16:8-11."

29 Peétero yaázeendelela kugaamba, "Abayahudi bazeenzi baanze, niinhicha kubagaambila ha kugima nkokwo isíichwe enkúlu Daudi akafwa, yaáziikwa, ne eémbi yoómwe echáali eliho aha kuhicha leélo. 30 Náho Daudi akaba ali omubáasi, na akamanya nkokwo Múungu akamweésagiza ha kulahila nka nikwo, alyaámukola omuuntu oómo wo kuluga omu lugaanda lwoómwe kwiikala aha chitébe cho obutégeki bwoómwe. 31 Daudi akasoombookelwa amagaambo áago nigabáho gáta, niho akagaamba habwo kuzooka kwa Masihi*2:31 Masihi: Habwo obusoomboozi bwooli, osome echigaambo cha Kristu omu Obusoomboozi habwa Amagaambo Agagumile. nka nikwo, talalekilwe omu kuzimu✝2:31 Osome Enzina 16:10. nali omubili gwoómwe tigulazuunzile. 32 Ogwo Yeézu, Múungu akamuzoola kuluga omu bafwiile, neechwe chwéena ni baalubona bo okuzooka okwo. 33 Múungu yaámuha Yeézu ikuzo liháango no kumuta héehi náze olubazu lwo obúlyo. Náwe Yeézu yaáyanaankula kuluga hali weényini Táata Omwooyo Mutakatíifu óogwo yaatweésagiize, náwe yaátuseeseliile. Echo nicho mulikuleeba óobu no kuhulila. 34 Kuba Daudi weényini talasutukile no kuzeenda omu igulu, náho akagaamba,

‘Omukáma Múungu akamugaambila Omukáma waanze,*2:34 Omukáma Múungu akamugaambila Omukáma waanze: Obusasaanuzi bwe echigaambo éechi nibwiingana mazima ne ensoonga oku eéli omu chitabu che Enzina. Osome Enzina 110:1. Náho, echigaambo ha chigaambo, omuchafa ogu omu chitabu cha Amakúlu ge Entumwa nigusasaánulwa, Omukáma akamugaambila Omukáma waanze.

"Oyikále olubazu lwaanze lwo obúlyo,

35 kuhika mbate ababisa baawe, iífo ya amagulu gaawe."’✝2:35 Osome Enzina 110:1."

36 Peétero akamala ha kugaamba, "Ha bwéecho, Abaiziraeli bóona nibeendelwa bamanye aha mazima nkokwo: Múungu yaámukola ogu nyini Yeézu kuba weényini Masihi no Omukáma, ogu, íimwe mukamubaamba aha musalaba."

37 Abaantu abo, kábaahuliile amagaambo ago, gaábachumita bwooli omu miganya yáabo. Baámubúuza Peétero ne entumwa abáandi, "Bazeenzi béetu, óobu tuzilého túta?" 38 Peétero yaábagaambila, "Buli oómo weenyu atamwe ebiheno byoómwe no kubilekelela, amuhiindukile Múungu no kubatizwa ahi izíina lya Yeézu Kristu,*2:38 Kristu: Habwo obusoomboozi bwooli osome Obusoomboozi habwa Amagaambo Agagumile. mubóne kuganyilwa ebiheno byáanyu. Neemwe nimwiinaánkula obuhicha bwo Omwooyo Mutakatíifu. 39 Múungu akatweésagiza endagano ezi ha bwéenyu, na abáana báanyu, na ha báandi bóona áabo abali hala okwo, kuba bóona áabo abalikwéetwa no Omukáma, Múungu wéetu weényini."

40 Peétero yaázeendelela kubagaambila abo baantu amagaambo agáandi méenzi go kubaneémbelela omu kubagumisa omuganya ha kugaamba, "Mchuungulwe kuluga omu luzáalo olu oluhuugeene lwa abatakutegezwa!" 41 Ha bwéecho, bóona abeenaánkwiile echigaambo choómwe Peétero, bakabatizibwa. Echilo éecho abaantu bo kuhika nke ebihuumbi bísatu (3,000) baaba baáyoongelwa omu baheémba abáandi.