João 5

Yeézu naachíza enziíngami

1 Kágaabeele ago gaáhwéele, Yeézu yaázeenda Yeruzaléemu omu mazenyi ga Abayahudi. 2 Okwo omuli Yeruzaléemu, hakaba heenamo iléembo liháango éelyo likaba nilyeétwa, "Iléembo lye Entaama."*5:2 Omu muzihwa gwa Yeruzaléemu lukaba lulimo olugo olwoombekesizwe amabáale, lukaba luzoongolokile omuzihwa gwóona. Óolwo lugo lukaba lwiina amaléembo méenzi. Buli iléembo likaba liina izíina lyaályo. Iléembo límo lyaáho likaba nilyeétwa "Iléembo lye Entaama" habwo kuba likaba lili héehi ni igulizo éelyo bakaba nibagulizaho entaama ne ebituungaánwa ebiindi. Osome Nehemia 3:1; 12:39. Héehi ne elyo iléembo, hakaba heena iláambo, elyo iláambo likaba lyéetwa omu izíina lyo olulími lwe Echihebrania, liti, Beetizata. Iláambo elyo likaba lizoongolokilwe na amakulato ataanu áago gakaba geena enyomyo. 3 Omuli ago makulato, bakaba balyaamamo abalwéele béenzi, nka abahume, enziíngami, na áabo abalageele. [Bakaba baliindiliile améenzi gabulaangulwe, 4 ha kuba hakaba haazila omwáanya óogwo maléeka*5:4 Maléeka: Habwo obusoomboozi bwooli osome Obusoomboozi habwa Amagaambo Agagumile. wa Múungu akaba atúuka, aza omuli elyo iláambo no kugabulaangula améenzi. Omulwéele óogwo akaba aba owo kubaanza ha kuzamo omu méenzi kagalikuba gaábulaangwiilwe, ogwo mulwéele akaba achila endwáala yoóna yóona éezo akaba ayina.] 5 Omuli abo nyini, akaba alimo omuuntu oómo óogwo ayaabeele ali omulwéele aha mwáanya gwe emyáaka makúmi asatu na munáana. 6 Niho Yeézu kumubona ogwo muuntu alyaamile aho. Yaaba yaásoombookelwa nka nikwo yaalalweele omwáanya mula, yaámubúuza, "Ngási, nooyeénda kuchila?" 7 Ogwo mulwéele yaámugalulila Yeézu aáti, "Mukáma, íinye tiinyina omuuntu wo kuúnzuna kutaahámo omu iláambo obuchilo améenzi nigabulaángulwa. Buli kiindikweenda kutaahamo, omuuntu oóndi naayaanguha kuunyibeembela kuzamo." 8 Niho Yeézu aba yaámugaambila aáti, "Yemeelela, yimucha omukeeka gwaawe, olibate." 9 Ahonyini, ogwo muuntu aba yaáchila, yeemucha omukeeka gwoómwe, yaábaanza kulibata.

Náho echigaambo echi chikakolwa aha chilo che Endaálikizo.*5:9 Endaálikizo: Habwo obusoomboozi bwooli osome Obusoomboozi habwa Amagaambo Agagumile.