Lucas 17

Yeézu naachíza abaantu ikúmi abeene amabéembe

11 Obuchilo Yeézu akaba naazeénda Yeruzaléemu, akalabila embibi za Samaria, ne za Galiláaya. 12 Echilo chimo, akataahamo omu mugoongo gúmo, yaábugana na abaantu ikúmi abeene amabéembe. Abo abeene amabéembe, baáyemeelela hala na weényini,*17:12 Baáyemeelela hala na weényini: Ha ensoonga bakaba nibeetimwa habwa mabéembe gáabo. Kuba omu ntúungwa za Abayahudi, abeene amabéembe bakaba batakukuundilwa kwiílila ha baantu abazima nali kulya nábo. Habwo obusoomboozi bwooli, osome echigaambo cha Obutába no obulofo omu Obusoomboozi habwa Amagaambo Agagumile na Amagaambo ga Abaláawi 13:45-46. 13 baáhámuka ahi iláka omu kugaamba, "Yeézu, Mukáma, otuganyile!"

14 Yeézu yaábabona, yaábagaambila, "Muzeénde mweéyoleke aha bagabe ba Múungu." Baázeenda, no obuchilo bakaba bali omu luzeendo, baáchila.

15 Oómo wáabo, obuchilo káyaabweene nkokwo yaámazile kuchila, ahonyini yaásuba hali Yeézu, naamusiingiza Múungu ahi iláka liháango. 16 Obuchilo yaáhikile, omu kumusiima, yáagwa buzuúma omu magulu, omu méeso ga Yeézu. No ogwo muuntu, akaba ali Omusamaria.*17:16 Omusamaria: Abayahudi bakaba nibabagaya Abasamaria, ha nsoonga bakaleeba nkokwo Abasamaria nibamulámya Múungu ha miháanda éezo etakuundiílwe. Nikwo, abaantu ba amahaánga aga abili bakaba bahateene.

17 Yeézu yaágaamba, "Léeba abaantu ikúmi bachilizwe! Mbwéenu, abo abáandi mweenda bali nkáhi? 18 Tihaliho abáandi áabo abaabwéenwe nibasuba kumukúza Múungu, choónka ogu omuzenyi?" 19 Káandi Yeézu yaámugaambila, "Yemeelela, ozeénde. Okwiikiliza kwaawe nikwo kwaákuchiza."