Lucas 18

Yeézu naachíza omuhume óokwo Yeriko

35 Yeézu akaba yeéliliza Yeriko, na aha ngeégeelo yo omuháanda, hakaba heena omuhume oómo. Omuhume ogwo akaba ayikéele, naasabiliza. 36 Obuchilo yaáhuliile abaantu béenzi nibahiingula aho, yaábúuza, "Heena chiíha?" 37 Baámugaambila, "Yeézu Omunyanazaréeti naahiingula."

38 Ahonyini, yaáhamuka ahi iláka, aha kugaamba, "Yeézu, Mutábani wa Daudi,*18:38 Mutábani wa Daudi: Habwo obusoomboozi bwooli, osome echigaambo cha Daudi omu Obusoomboozi habwa Amagaambo Agagumile. onzilile echiganyizi!" 39 Abaantu abo abaabeele beébeembiile, bakaba nibamuchaahukila ayesize. Náho weényini, yaáguma kuhamuka ahi iláka omu kumwéeta, "Mutábani wa Daudi, onzilile echiganyizi!"

40 Yeézu yaáyemeelela, yaálagila ogwo muhume aleétwe hali weényini. Obuchilo yaámuhika héehi, Yeézu yaámubúuza, 41 "Nooyeénda nkukolele chiíha?" Náwe yaágaamba, "Mukáma, niinsaba mbone kuhwéeza káandi." 42 Yeézu yaámugaambila, "Hweéza! Okwiikiliza kwaawe nikwo kwaákuchiza." 43 Ahonyini, yaáhwéeza, yaámukulaatila Yeézu, naamukuza Múungu. Abaantu bóona, obuchilo baabweene ebyo, nábo baábaanza kumukúza Múungu.