Marcos 6

Yeézu naaliísa abaantu ebihuumbi bitaanu no obusáago

30 Obuchilo entumwa*6:30 Entumwa: Habwo obusoomboozi bwooli osome Obusoomboozi habwa Amagaambo Agagumile. za Yeézu zaasubile, zaákoba omu méeso ga Yeézu, baámugaambila góona áago baákozile na áago baayegesize. 31 Kwiingana na abaantu béenzi bwooli áabo bakaba baliho, abáandi bakaba nibeéza, abáandi bakaba nibalugaho, Yeézu na abaheémba boómwe baábulwa omwáanya gwo okulya. Yaábagaambila abaheémba boómwe aáti, "Mwiíze, tuzeénde ahaantu ahatéena baantu, tubone kuhuúmula kache." 32 Baalugáho boónyini kwo bwáato, baázeenda ahaantu áaho ahatéena abaantu.

33 Náho obuchilo bakalugayo abaantu béenzi baábabona, baábamanya. Abaantu abo hamo na abáandi kuluga omu mizihwa míinzi baábelukiilila lwa amagulu, baábeebeembelela kuhika okwo áaho bakaba nibazeénda. 34 Obuchilo yaásooka omu bwáato, yaábona embága mpáango ya abaantu. Yaábazilila echiganyizi, habwo kuba bakaba bali nke entaama zitéena omulíisa. Yaábaanza kubeégesa amagaambo méenzi.

35 Obuchilo izóoba kalyaaheénzile omukóno, abaheémba boómwe beeza hali weényini, baámugaambila báti, "Aha tuli no omu chitúuntu, ne ensiimbaazi yeéliliza. 36 Obalage abaantu aba, bazeénde omu mitúulo beégulile ebyookulya." 37 Náho Yeézu yaábagalulila aáti, "Íimwe Mubáhe ebyookulya." Baámubúuza báti, "Nooyeénda íichwe tuzeénde kubagulila emikaate ye edináali magána abili*6:37 Edináali magána abili: Empilya nke éezo ekaba eli empeéla yo omuuntu oómo aha méezi munáana. tubone kubaha balye?"

38 Yeézu yaábabúuza aáti, "Ngási, mwiina emikaate engáhi? Nimuzeénde muleebe." Baázeenda kuleeba, baásuba, baámugaambila báti, "Twiine emikaate itaanu ne eénfwi ibili."

39 Yeézu yaábagaambila aáti mubeekáze abaantu bóona empelo bunaanka aha bunyaansi. 40 Beékala empelo, abáandi igana, abáandi makúmi ataanu ataanu. 41 Yeézu yaátwáala emikaate itaanu ezo ne eénfwi ibili, yaálalamila omu igulu, yaámusiima Múungu. Niho yaázimenyula emikaate, yaábaha abaheémba boómwe babone kubagabila abaantu bóona emikaate ne eénfwi. 42 Abaantu bóona baálya, baáhaaga. 43 Niho, abaheémba boómwe baákobya kobya amasaága ge emikaate ne eénfwi, beezuza ebitukulu ikúmi na bibili. 44 Áabo bakalya emikaate aho, abaséeza bakaba bali ebihuumbi bitaanu.