Marcos 7

Okwiikiliza kuháango kwo omukázi ogwo atali Muyahudi

24 Yeézu yaalugáyo okwo Galiláaya, yaázeenda omu byaalo bya Tíilo na Sidóoni. Okwo, yaátaaha omu nzu, talayeenzile omuuntu weéna wéena amanye nka nikwo aliho. Náho talahikize kweéseleka. 25 Náho hakaba heena omukázi óogwo omuhala akaba ayina izimu, yaamwiizáho bwaangu, yaáteela ebizwi omu méeso goómwe. 26 Ogwo mukázi akaba atali Muyahudi akalugiilila Foonike omu nsi ya Siíria. Ogwo mukázi yaámusaba Yeézu alimwiihého omuhala izimu.

27 Yeézu yaámugaambila aáti, "Ti kuzima kutwáala ebyookulya bya abayaánda no kubinagila eémbwa.*7:27 Ti kuzima kutwáala ebyookulya bya abayaánda no kubinagila eémbwa: Abayahudi bakagaamba abayaánda niyo kumanyisa Abayahudi. Káandi, bakagaamba eémbwa niyo kumanyisa áabo abatali Bayahudi. Babaánze abayaánda baháage." 28 Náho omukázi ogwo yaámugalulila Yeézu aáti, "Nikwo bili Mukáma, náho no óobu eémbwa ezili aheéfo ye emeéza nizilya ebisige bya abayaánda."

29 Yeézu yaámugalulila aáti, "Aho waágaamba kuzima. Mbwéenu, zeénda, izimu lyaamulugaho muhala waawe." 30 Omukázi ogwo yaásuba omúka, yaásaanga omuhala alyaamile aha chitabo, izimu lyaámulugilého.