Mateus 17

Yeézu naalíha oluhaambwe lwe éenzu ya Múungu

24 Obuchilo Yeézu na abaheémba boómwe kábaahikile omuli Kaperinaumu, abaantu bunaanka abaabeele nibatobesa oluhaambwe habwe éenzu ya Múungu,*17:24 Oluhaambwe habwe éenzu ya Múungu: Obuchilo óobwo, buli Muyahudi omukwaáta owe myáaka makúmi ábili nali kusaagáho, ayeendelwa kuliha oluhaambwe buli mwáaka habwo kusemeza éenzu ya Múungu. Empilya ezo ekaba eli empeéla ye ebilo bibili nali edináali ibili. Osome Okuluga 30:13-16; 2 Amagaambo ge Enchilo 24:9-14; Nehemia 10:32. beeza hali Peétero. Baámubúuza báti, "Ngási, omweégesa wáanyu náwe aliha oluhaambwe lwe éenzu ya Múungu?" 25 Peétero yaábagalulila aáti, "Nikwo bili, aliha."

Niho yaátaaha omu nzu. Náho acháali Peétero atakagaambile echigaambo choóna chóona, Yeézu yaábaanza kumubúuza aáti, "Íiwe Simoni, íiwe noobona oóta? Abakáma abo omu nsi ezi batobesa oluhaambwe kuluga aha báana báabo nali kuluga aha baantu abáandi?" 26 Peétero yaámugalulila aáti, "Nibatobesa kuluga aha báandi." Yeézu yaámugaambila aáti, "Keélaaba nikwo bili, mbwéenu abáana báabo baganyiílwe kuliha oluhaambwe. 27 Náho tutaákwiiza kubaleételela kutamwa abaantu aba, íiwe zeénda omu nyaanza, onage ilobo omu méenzi. Niho eénfwi yo kubaanza éezo olaakwáasa, ozaásamule omunwa, noosaángamo omwo eshekéeli.*17:27 Eshekéeli: Éezo ne empilya ya Abayahudi eyaabeele neeyiingana ne empeéla ye ebilo bibili. Mále ozitwáale eshekéeli ezo, ozeénde olihe oluhaambwe lwaanze no olwaáwe."