16 Mala omuuntu oómo yéeza hali Yeézu, yaámubúuza aáti, "Íiwe Mweégesa, nkole chizima chi neenye mbone obulami bwo obucha no obuchiile?" 17 Yeézu yaámugalulila aáti, "Ha bwaáchi noombuúza íinye echigaambo echili chizima? Léeba, Múungu weénka niwe omuzima! Náho koólaaba nooyeénda kuza omu obulami obwo bucha no buchiile, okoondoókele ebilagilo bya Múungu." 18 Omusígazi ogwo yaámubúuza aáti, "Bilagilo chi?" Yeézu yaámugalulila aáti, "Otaákwiita, otaákuba omusaambani, otaákwiiba, otaákusiinza ebisuba, 19 obakúze iíso na nyoko, no kumwéenda muzeenzi waawe nko óokwo olikweéyeenda íiwe nyini."19:19 Osome Okuluga 20:12-16; Amagaambo ga Abaláawi 19:18; Okwiizukwa kwe Ebilagilo 5:16-20.
20 Omusígazi ogwo yaámuzila aáti, "Ebilagilo byóona ebyo nkabikola. Nkole chiíha echíindi éecho mbuzilwého?" 21 Yeézu yaámugaambila aáti, "Koólaaba nooyeénda kuba ahikile, zeénda oguze ebiintu byóona éebyo oyinabyo, empilya ezo obáhe abahabi. Koólaaba waákozile oótyo, noóba ne ensabo omu igulu. Mále oyize, onkulaatile." 22 Obuchilo omusígazi ogwo yaáhuliile ebyo, yaalugáho habwo buzune, habwo kuba akaba ali omuhíte bwooli.
23 Niho Yeézu yaábagaambila abaheémba boómwe aáti, "Mazima butúnu niimbagaambila, chilyáaba chigumile ha omuhíte kuza omu bukáma bwo omu igulu. 24 Niimbagaambila káandi nka nikwo, chihuhuukile bwooli ha ntwaangabuleende kuhiíngula omu kahulu ko olusíinge, kusaaga omuhíte kuza omu bukáma bwa Múungu."
25 Obuchilo abaheémba boómwe bahuliile bátyo, baásobelwa bwooli, baámubúuza báti, "Óobu noóha mbwéenu óogwo yaakaáhicha kuchuúngulwa?" 26 Yeézu yaábaleeba omu kubeétegeeleza, yaábagaambila aáti, "Habwa abaantu echo tichikwiíle, náho habwa Múungu góona gakwiíle."