Masihi Yeézu naayanaánkulwa Yeruzaléemu
1 Obuchilo Yeézu na abaheémba boómwe belilize omuli Yeruzaléemu, baáhika omu mugoongo gwa Betifáage omu ibaanga lye Emizeituni. Niho Yeézu yaábasiíndika abaheémba boómwe bábili, yaábagaambila nka nikwo, 2 "Muzeénde omu mugoongo oguli omu méeso gáanyu. Obuchilo nimutáha omwo, ahonyini nimusaánga ensíkili esibikilwe aho, hamo no omwaana gwaáyo. Niho muzisibule, muundeétele aha. 3 Kábilaaba omuuntu weéna wéena alaababúuza chóona chóona, mumugalulile muti, ‘Omukáma wéetu naazeénda,’ náwe naabakuundila mwiíze nágwo."
4 Ebyo bikabaho bityo, chibone kuhikiilila echigaambo éecho Múungu akagaamba kulabila ha mubáasi woómwe nka nikwo,
5 "Bagaambile abaantu ba Sayuni21:5 Sayuni: Nicho echikaali cha Yeruzaléemu na abaantu baámo. nka nikwo,
‘Léeba, omukáma wáanyu naayiza hali íimwe,
no omufula, naayiza naába ahanamile aha nsíkili,
no omwaana gwe ensíkili.’ "21:5 Osome Zakaria 9:9.
6 Mbwéenu, abaheémba boómwe baázeenda, baákola nko óokwo Yeézu yabalagíile. 7 Obuchilo basubile hali Yeézu ne ensíkili ezo hamo no omwaana gwaáyo, baáyala emyéenda aha lugulu yaágwo, na Yeézu yeékalila emyéenda ezo. 8 Echo chipípi chiháango cha abaantu, baáyala emyéenda yáabo omu muháanda.21:8 Baáyala emyéenda yáabo omu muháanda: Ensoonga yaáho, baáyoleka ikuzo lyo kumukúza Yeézu. Abáandi baánogola amatábazi ge emiti no kugata omu muháanda habwo kumukúza Yeézu. 9 Abaantu abo abaabeele beébeembiile na abaabeele nibamukulaatíla Yeézu, bakaba nibahamuka aha maláka maháango báti,
"Hosana21:9 Hosana: Omu lulími lwe Echihebrania, ensoonga yaáho ekaba, "Chuungúla óobu!" Náho aha buchilo bwa Yeézu echigaambo echi chikagaambwa bwooli kumukúza Múungu nali Masihi. Osome Enzina 118:25. ha Mutábani wa Daudi!
Ayina omugisa ogwo alikwiiza ahi izíina lyo Omukáma Múungu!21:9 Osome Enzina 118:26.
Hosana hali Múungu óogwo ali omu igulu!"