Mateus 26

Abatégeki ba Abayahudi nibaloondela omuháanda gwo kumwíita Yeézu

1 Obuchilo Yeézu káyaamazile kugaamba amagaambo ago góona, yaábagaambila abaheémba boómwe nka nikwo, 2 "Nko óokwo mulikusoomboókelwa, kábilaaba byaáhiíngwiile ebilo bibili, nihaba na amazenyi ga Paásika.*26:2 Paásika: Habwo obusoomboozi bwooli osome Obusoomboozi habwa Amagaambo Agagumile. Omu chilo echo, íinye Mutábani wo Omuuntu niinkoóbibwa, mbone kubaambwa aha musalaba."

3 Mbwéenu, obuchilo obwo, abakúlu ba abagabe na abanyaampala ba Abayahudi baákoba aha lubuga lwe eéka yo omugabe mukúlu óogwo izíina lyoómwe akaba ayétwa Kayafa. 4 Omwo, bakabiteélana nka nikwo óokwo baayeenzileho kumukwáata Yeézu habwe eseleke, babone kumwíita. 5 Náho, bakabiteélana báti, "Tutaákwiiza tukakola aga omu mazenyi ga Paásika, abaantu bateéza bakakola omusaambo."

Omukázi naamusíiga Yeézu amazuta

6 Niho Yeézu yaázeenda omuli Betania, yeékala omúka ya Simoni óogwo kala akaba ayina endwáala yo obubéembe. 7 Obuchilo Yeézu akaba ali aha luhelo kulya, omukázi oómo yéeza hali weényini ayina olwaaba lwi ibáale eliina omuzeeze gwo obukaani buháango bwooli. Omukázi ogwo yaágamwiítilila Yeézu omu mútwe.

8 Obuchilo abaheémba boómwe kábaabweene ago, baátamwa. Baágaamba báti, "Boózo! Ha bwaáchi ogu mukázi naasíisa amazuta aga go obukaani buháango aáti? 9 Yakabeele kuzima amazuta aga gaguzwe aha mpilya nyíinzi bwooli, zikaázunile abahabi!"

10 Yeézu óobu akeeza yaámanya amagaambo ago, yaábagaambila aáti, "Ha bwaáchi nimumwaagalaza ogu mukázi? Weényini yaánkolela echigaambo chi ikuzo bwooli. 11 Abahabi mwiikala hamo nábo buchiile, náho íinye timuliikala hamo neenye buchiile. 12 Omukázi ogu yaányitilila amazuta,*26:12 Bukaba buli obuteéka bwa Abayahudi kusiiga amazuta omutúumbi. yaáchikola aha kuúndoongeza omubili gwaanze habwo okuziikwa kwaanze. 13 Mazima butúnu niimbagaambila nka nikwo, omu nsi zóona, hoóna hóona áaho abaantu baláaba niboolekeelela Empola Nzima ezi, baláaba nibagaámba éecho akakola omukázi ogu, ha kumwiízuka."

Yuda Iskariote naayikiliza kumukoonga Yeézu

14 Niho oómo omu baheémba ba Yeézu ikúmi na bábili, óogwo ayaabeele naayétwa Yuda Iskariote, yaázeenda aha bakúlu ba abagabe, 15 yaábabúuza aáti, "Nimuundiha chiíha kiíndaahicha kumubaheéleza Yeézu omu ngalo záanyu?" Niho baámuliha ebinogoka bye empilya makúmi asatu.*26:15 Ebinogoka bye empilya makúmi asatu: Endeengo ezo ekaba eli yo omuuntu kuliha obuchilo echimasa choómwe káchilaayita omuzáana. Osome Okuluga 21:32; Zakaria 11:12. 16 Kubaandiza obuchilo obwo, Yuda yaábaanza kuloondela omuháanda gwo kumubaheéleza Yeézu omu ngalo záabo.

Yeézu naálya echookulya cha Paásika hamo na abaheémba boómwe

17 Aha chilo cho kubaanza cha amazenyi ge emikaate éezo etatiílwémo ituumbyo,*26:17 Amazenyi ge emikaate éezo etatiílwémo ituumbyo: Habwo obusoomboozi bwooli osome Obusoomboozi habwa Amagaambo Agagumile. abaheémba ba Yeézu beeza hali weényini, baámubúuza báti, "Nooyeénda tuzeénde kukuloongeza echookulya cha Paásika nkáhi?" 18 Yeézu yaábazila aáti, "Muzeénde omu chikaali,*26:18 Omu chikaali: Ensoonga ni Yeruzaléemu. owo omuuntu bunaanka, mumugaambile muti, ‘Omweégesa yaátusiíndika na naagaámba aáti, Obuchilo bwaanze bweéliliza kuhika. Owaáwe niho ndikulíila amazenyi ga Paásika, íinye hamo na abaheémba baanze.’ " 19 Abaheémba boómwe baázeenda baákola góona nko óokwo Yeézu yabalagiíliile, baáloonza ebyookulya bya Paásika.

20 Obuchilo habeele olweébazo, Yeézu na abaheémba boómwe ikúmi na bábili beékala aha luhelo kulya ebyookulya. 21 Obuchilo bakaba nibalya, Yeézu yaábagaambila aáti, "Mazima butúnu niimbagaambila nka nikwo, oómo omuli íimwe naayiza kuúnkoonga."

22 Abaheémba boómwe baákamaala bwooli, baábaanza kumubúuza oómo oómo báti, "Láma Mukáma, mazima tíwe íinye?" 23 Yeézu yaábasubiza aáti, "No óogwo alikukoza hamo neenye, niwe alaánkoonga. 24 Íinye Omutábani wo Omuuntu, niinyítwa nko óokwo eyaandikilwe omu Maandiko Matakatíifu. Náho neelóoko omuuntu óogwo alaánkoonga. Yakabeele kuzima hali weényini hachili tiyaákuzeelwe!"

25 Mbwéenu, Yuda ogwo enkoonga wa Yeézu, náwe yaámubúuza aáti, "Láma Mweégesa, mazima tíwe íinye?" Yeézu yaámugalulila aáti, "Níiwe waágaamba."

26 Mbwéenu, obuchilo bakaba nibalya, Yeézu yeemucha omukaate, yaámusiima Múungu, yaágumenyula, yaábaha abaheémba boómwe, yaábagaambila aáti, "Mwaanaánkule mulye, ogu nigwo omubili gwaanze." 27 Yeemucha ne echikóombe éecho echikaba chiina evíini, yaásiima Múungu, yaábaha, yaábagaambila aáti, "Mwaanaánkule evíini ezi, munyweeleláne íimwe mwéena. 28 Evíini ezi niyo enságama yaanze ye endagano.*26:28 Endagano: Habwo obusoomboozi bwooli osome Obusoomboozi habwa Amagaambo Agagumile. Enságama yaanze elaaseéseka habwa abaantu béenzi, kuba Múungu kubaganyila ebiheno byáabo.