Mateus 3

Yohana naaloónza omuháanda habwa Yeézu

1 Ebilo kábyaachíile, akabaho omuuntu oómo óogwo akaba naayétwa Yohana Omubatiza. Yohana akaba naayolekeelela omu nsi yo obwoóma omuli Yudea aáti, 2 "Mutamwe no kulekelela ebiheno byáanyu, habwo kuba obukáma bwo omu igulu*3:2 Obukáma bwo omu igulu: Habwo obusoomboozi bwooli, osome Obukáma bwa Múungu omu Obusoomboozi habwa Amagaambo Agagumile. bweéliliize." 3 Yohana niwe ogwo ayaagaambilwe no omubáasi Isaya aáti,

"Omuuntu alikuhámuka ahi iláka liháango omu nsi yo obwoóma,

‘Muguloonze omuháanda gwo Omukáma,

mugolole obulabo óobwo alaahiíngula.’ "✝3:3 Osome Isaya 40:3.

4 Emyéenda za Yohana zikaba zikozilwe na amooya ge entwaangabuleende náwe akaba azwaala omusipi gwe enkoba.*3:4 Emyéenda éezo Yohana akaba azwaala, zikaba zili nke ezo omubáasi Eliya. Osome 2 Abakáma 1:8. Ebyookulya byoómwe bikaba bili empalala na amóochi moochi go omu nsi yo obwoóma. 5 Abaantu baaba nibamuhululukila kuluga omu chikaali cha Yeruzaléemu, omu chaalo chóona cha Yudea, ne enkási zóona zo omunóna gwa Yorodáani. 6 Abaantu abo baaba nibegaámba ebiheno byáabo, náwe yaaba naababatiza omu munóna gwa Yorodáani.