Mateus 4

Yeézu naaleengesibwa ni Isitáani

1 Mála, Yeézu yeébeembelelwa no Omwooyo Mutakatíifu kuzeenda omu nsi yo obwoóma abone kuleengeswa ni Isitáani.*4:1 Isitáani: Habwo obusoomboozi bwooli osome Obusoomboozi habwa Amagaambo Agagumile. 2 Yaámala okwo ebilo makúmi aána, omu chilo na nyemisana naayeyima kulya ebyookulya. Aha muheleeluko, yaálumwa enzala bwooli. 3 Niho elyo Isitáani lyaamwiizáho libone kumuleengesa. Lyaámuzila liti, "Koólaaba íiwe oli Mutábani wa Múungu, galagile amabáale aga gahiinduke kuba emikaate." 4 Náho Yeézu yaáligalulila aáti, "Omu Maandiko Amatakatíifu chaandikilwe chíti,

‘Omuuntu tiyaákuhicha kutuungwa ebyookulya*4:4 Ebyookulya: Eyaandikilwe omu Chiyunani, omukaate. byoónka,

náho naatuúngwa habwa buli chigaambo

éecho echilikuluga omu kanwa ka Múungu.’✝4:4 Osome Okwiizukwa kwe Ebilagilo 8:3."

5 Niho elyo Isitáani lyaámutwáala Yeézu omu chikaali chitakatíifu cha Yeruzaléemu, lyaámweemeeleza aha luswi olula bwooli oluli aha nzu ya Múungu,*4:5 Éenzu ya Múungu: Habwo obusoomboozi bwooli osome Obusoomboozi habwa Amagaambo Agagumile. 6 lyaámugaambila liti, "Koólaaba íiwe oli Mutábani wa Múungu, yenaguze ahaansi. Tiwaákuhicha kuhutaala, habwo kuba eyaandikilwe omu Maandiko Matakatíifu eéti, ‘Múungu naalagíla bamaléeka boómwe ha bwaáwe,’ na káandi, ‘Nibakusutula, amagulu gaawe oteéza okeékuumpa ahi ibáale.’✝4:6 Osome Enzina 91:11-12."

7 Náho Yeézu yaáligaambila, "Káandi eyaandikilwe eéti, ‘Otamuleengesa Omukáma Múungu waawe.’✝4:7 Osome Okwiizukwa kwe Ebilagilo 6:16."

8 Niho, Isitáani kumutwáala Yeézu aha lugulu yi ibaanga lila bwooli. Aho, lyaámwoóleka obukáma bwóona bwe éensi hamo no obugéega bwaámo, 9 lyaámugaambila liti, "Kábilaaba noonteelela ebizwi no kuúndamya, niinkuha byóona ebi." 10 Náho Yeézu yaáligaambila aáti, "Luheendeho aha, Isitáani we! Eyaandikilwe omu Maandiko Matakatíifu eéti,

‘Omulámye Omukáma Múungu waawe,

omugomookele weényini weénka.’✝4:10 Osome Okwiizukwa kwe Ebilagilo 6:13."

11 Niho elyo Isitáani kumuleka Yeézu aho. Ahonyini, bamaléeka ba Múungu beeza kumuheéleza Yeézu.