28 Senꞌ mne nchab Jesus re jwanꞌ reꞌ, ndya Jesus yez Jerusalen. 29 Senꞌ ndo sin gax Jesus yez Betfage nde yez Betania, lad yiꞌ jwanꞌ ndole Oliv, zyasa mtelꞌ Jesus chop xin'te'd Jesus, 30 Nchab Jesus lo xaꞌ:

—Wa goꞌ yez nzi lad tso ba, sen' yote go' len' yez yosal goꞌ thi bur teꞌ yen' ngedoꞌ, ma' tera tyob nek thib men. Bxak goꞌ ma' nde deꞌno goꞌ ma'. 31 Nde tez cho men nyabdiꞌs lo goꞌ, kwan ndliy ngexak goꞌ bur, gus goꞌ lo xaꞌ, Xaꞌ Nyebeꞌ nakinꞌ ma'.

32 Zyasa ngwa rop xaꞌ, nde mzyal xaꞌ bur a xata nchab Jesus lo xaꞌ. 33 Nde laja ngexak xaꞌ bur, xwanꞌ bur mna'bdi's lo xaꞌ, nchab:

—¿Kwan ndliy ngexak goꞌ bur?

34 Zyasa mkab xaꞌ nchab xaꞌ:

—Xaꞌ Nyebeꞌ nakinꞌ ma'.

35 Nde mbe' xaꞌ bur lo Jesus, mxob xaꞌ xab xaꞌ xis bur, nde mtob xaꞌ Jesus xis bur. 36 Nde xa nderidandab Jesus, taja ntogaꞌ men xab men lo ned. 37 Senꞌ ndo sin gax Jesus, par tyola Jesus yiꞌ Oliv, zyasa reta xaꞌ ndanke xis Jesus mdobte ne mbrez xaꞌ tak nale nzo lazoꞌ xaꞌ nde ndaꞌ xaꞌ dyux lo Dios, por reta yalnaro jwanꞌ mbwiꞌ xaꞌ mbli Jesus. 38 Nde nchab xaꞌ:

—¡Nayon nak Rey jwanꞌ nde lo le Xaꞌ Nyebeꞌ! ¡Yalnabe'z lo be' nde naro toz nak Dios lo beꞌ!

39 Zyasa pla xaꞌ fariseo jwanꞌ nzo xij re men nchab lo Jesus:

—Maestr, brez yek re xaꞌ ta ndenke xis la.

40 Jesus mkab lo xaꞌ:

—Leꞌ na ni lo goꞌ, tez re xa' re' nakwesta xa', re ke ba kwes.