LUK 2

22 Senꞌ ngoxob wiz ak nambi rop xa' xajka nyebeꞌ ley chanꞌ Moises, mbeꞌ xa' mbed yez Jerusalen sa lo' xa' mbed lo Dios. 23 Tamod mbli xaꞌ, tak ta nchab lo ley chanꞌ Dios: "Reta mbed biꞌ jwanꞌ nchal ner, ak nayon or par Dios." 24 Nde mdaꞌ xaꞌ jwanꞌ yon, xajka nyebeꞌ ley chanꞌ Dios: chop ngog o chop mbyin be.

25 Lenꞌ wiz ya ngo thi xaꞌ ndole Simeon yez Jerusalen. Xaꞌ nak thi xaꞌ galꞌ nde nxoꞌbyek xa' xkiꞌs Dios, ngembed xaꞌ wiz telꞌ Dios thi xaꞌ konale lazo' men Israel. Nde Mbi Nayon ndono xaꞌ. 26 Nde mblo' Mbi Nayon lo Simeon sa mne xa' ke na’gajta xa' axta kebe' wi' xa', Xa' jwan' mtel' Dios. 27 Zyasa mbli Mbi Nayon ngwa Simeon yodoꞌ, senꞌ mzin Jose kon Mari ndeno xa' mbed yodoꞌ, sa li xaꞌ jwanꞌ nchab ley Moises, 28 zyasa mdeꞌs Simeon mbed nde mdaꞌ Simeon dyux lo Dios, nchab Simeon:

29 Dios ro, naya ngokla reta jwanꞌ xata nea lon,

naya toyal nabe’z gaj na.

30 Tak mbwiꞌa na or jwanꞌ tolaꞌ re men,

31 nde reta yez yolo xa' jwan' nak xgab la lia, tola’a re men.

32 Or ak xni lo reta yez nanakta xa' Israel,

nde por or sa xyob xki’s yez Israel.

33 Jose nde Mari xnaꞌ Jesus leꞌka nzoyen xaꞌ mbin xaꞌ reta jwanꞌ nchab Simeon kwent chanꞌ mbed. 34 Zyasa mbli leyꞌ Simeon xaꞌ, nde nchab Simeon lo Mari xnaꞌ Jesus:

—Wiꞌ nea, Dios mtelꞌ or sa lir bro toz xa' Israel lyayo nde bro toz xa' tyotsa'. Jwan' lo' ak or, bro toz men na’ryo’d lazo' xa’y. 35 Per reta jwanꞌ reꞌ aka xaja thi espada yada lazo’a. Nde men thoz ryo’xo’b jwan' nzo lazoꞌ xa'.

36 Nde tya ndoga' thi men got gox ndole An, xa' ya nak profet, xinꞌ Fanuel, jwan' nde lo bin Aser, sen' yen' ngol mpselyaꞌ ngol nde gaz linꞌ mdobno ngol salꞌ ngol, 37 nde nzola xa' thap gal nzo thap linꞌ tata ndo thib xa'. Thibla' ndo ngol yodoꞌ, nde yalꞌ ndlyabe ndli ngol sinꞌ lo Dios, nke ngol yalse nde ndodi’sno ngol Dios. 38 Nde hor yaga' mbike ngol lo Jose nde Mari, mdobte mdaꞌ ngol dyux lo Dios, nde mdej ngol kwent chanꞌ Jesus lo reta xaꞌ jwanꞌ ngembed pol sin xaꞌ jwanꞌ tolaꞌ re men Jerusalen.