17 Xija mkab tib xaꞌ, nchab:

—Maestr, na ndeno xinꞌ na loa, tak ti mbi narax nzo lazoꞌr nde jwanꞌna mbli nda xkiꞌs or. 18 Nde one ploja ngeter ndyen mbi narax or, ngobiy or izyo, ndryoꞌ psinꞌ ror, ngaꞌz ler nde mbyez or. Nchab na lo re xinꞌ teꞌd la kote xaꞌ mbi narax nzo lazoꞌr, per na’lid xaꞌ gan.

19 Leꞌ Jesús nchab lo xa':

—¡Nak go' men nandlid lazonꞌ Dios! ¿Plopa ndablo keteꞌnon goꞌ? ¿Plopa ndablo xek na goꞌ? Deꞌno goꞌ mbyo ncheꞌ. 20 Zyasa ngwano xaꞌ mbyo lo Jesús. Nde senꞌ mbwiꞌ mbi naraxa Jesús, xaja kwana mtotiy mbyo, mdinkey or izyo anta nchub or nde taja nke psinꞌ ror. 21 Jesús mnabdiꞌs lo xud or:

—¿Pol ndate ta ndyak or?

Leꞌ xud or nchab:

—Xata lud ora. 22 Nde naꞌr toz gob axta lo ki nde lenꞌ nit ngobi mbi narax or par kuja or. Per tez tlia gan lia ti jwan', blat lazoꞌa náꞌ nde blaꞌsto náꞌ.

23 Jesús nchab:

—Tezka tlia gan li lazo’a, tak men jwanꞌ ndli lazonꞌ reta jwanꞌ taka lo xaꞌ.

24 Zyaga xud mbyo ya mbrezyaj xa', nchab xaꞌ:

—Li lazoꞌ ney, blaꞌston sa masra' li lazoꞌn.

25 Nde senꞌ mbwiꞌ Jesús men toz ndodop tya, zya mbrez Jesús lo mbi narax, nchab Xaꞌ:

—Mbi ngup, mbi nkweꞌ, na nyebeꞌ loa, broꞌte lazoꞌ mbyo reꞌ nde na’beretra lu.

26 Zyasa leꞌ mbi naraxa mbliy mbrez yaj or nde xaja kwana mtotiy mbyo tamod mbroꞌtey lazoꞌr; nde mbyanꞌ mbyo xaja men nguja.

Reta men nzi tya, nchab xaꞌ:

—Nguj mbyo. 27 Per Jesús, mxen Xaꞌ yaꞌ mbyo, mbliche Xaꞌ or, nde mtolir.