Mateus 18

21 Zyasa mbike gax Pedr nde nabdiꞌs Pedr lo Jesús:

—Señor, ¿Pla gob ndablo ridndab na yek na re jwanꞌ ndlino wes na, na? ¿Cho gaz goba?

22 Leꞌ Jesús mkab lo Pedr:

—Nanaktey benꞌta gaz gob. Na ni, dib tiemp ndablo li ley.

Chop xaꞌ ndaꞌb

23 Jwanꞌ nasa leꞌ yalnyebeꞌ lo beꞌ nak, xa nak thi rey jwanꞌ tolo tyopte nyaꞌb kwent lo re xaꞌ nge sinꞌ lo xaꞌ. 24 Lo mdobte rey mbloꞌ rey kwent, zyasa ngwano men tib xaꞌ ndaꞌb por millon tmi lo rey. 25 Nde xaꞌ ya naꞌngenoda xaꞌ jwanꞌ kix xaꞌ jwanꞌ ndab xaꞌ, zyasa leꞌ rey xwanꞌ xaꞌ yaꞌ mnebeꞌ sa dyo xaꞌ kon ngol xaꞌ, kon re xinꞌ xaꞌ nde reta jwanꞌ ngeno xaꞌ, sa yax reta jwanꞌ ndaꞌb xaꞌ. 26 Zyasa leꞌ xaꞌ ya mdoxub lo rey nde mnab toz xaꞌ lo rey nchab xaꞌ: "Xwanꞌ na kwed goꞌ lud, leꞌn yixka re jwanꞌ ndaꞌb na lo goꞌ" 27 Nde rey ya mblat lazoꞌ xaꞌ mos xaꞌ, nde mtonꞌ xaꞌ reta jwanꞌ ndaꞌb mos lo xaꞌ nde mblaꞌ xaꞌ mos. 28 Beꞌnta ngolo mbroꞌ mos tya, mzyalꞌ xaꞌ thi ta mos xaꞌ, jwanꞌ ndab ti tmi lud lo xaꞌ. Nde mxen xaꞌ yen mos ya nde mde xaꞌ yen mos, nde nchab xaꞌ: "¡Bdix jwanꞌ ndab la lon!" 29 Leꞌ ta mos xaꞌ ya, mdo xub lo xaꞌ nde mnab toz xaꞌ nchab xaꞌ: "kwed la lud, leꞌn yixka re jwanꞌ ndaꞌb na loa". 30 Per xaꞌ ya naꞌndoyalta, cheꞌla mkeꞌ lizyiꞌb xaꞌ ta mos xaꞌ, axta kebeꞌ kix xaꞌ jwanꞌ ndab xaꞌ. 31 Lo senꞌ mbwiꞌ tedib ned ta mos xaꞌ jwanꞌ na, jwanꞌ toz ngo nabil lazoꞌ xaꞌ, nde ngwa xaꞌ nchab xaꞌy lo rey reta jwanꞌ ngotey. 32 Zyasa xaꞌ nak rey mbrez xaꞌ mos ya nde nchab xaꞌ lo mos: "¡Lu nak ti mos xkap! Na mton reta jwanꞌ ndab la lon, tak nalat mbrez la mnab lay lon. 33 Noga lu ndablo ndlat lazoꞌa ta mos la xa mblat lazoꞌn lu." 34 Zyasa jwanꞌ toz mxi lazoꞌ rey nde mnebeꞌ rey mtoti xaꞌ mos axta kebeꞌ yax reta jwanꞌ ndab xaꞌ.

35 Ngolo nchab Jesús jwanꞌ na, nchaba Jesús:

—Taga lino Xud na ndob lo beꞌ re goꞌ, tez goꞌ naꞌtonꞌta goꞌ xken ta men goꞌ dib nzo lazoꞌ goꞌ.