10 Milagres de Jesus na Bíblia: Lista com versículos e explicação

Tintfanu waini tro hu’nea naneke

1 Hagi tare knamofo amefi knazupa, arave hunaku Kana kumate Galili kaziga nehazageno, Jisasi nerera’a anante mani’ne. 2 Ana hige’za Jisasine Agri amagenentaza disaipol naga’anena, aravema huku’ma hazarega zamagi hazage’za vu’naze. 3 Wainima vagaregeno’a, Jisasi nerera’a asmino, waini tina hagovagare’ne huno Agrira asmi’ne. 4 Higeno Jisasi’a nererana amanage huno asmi’ne, Ama a' moke, Nagra naza ama zampina huku hugenka nehane? Nagri kna zahufa efore osu’ne. 5 Jisasina nerera’a eri’za vaheku anage huno zamasmi’ne, Agrama inankna kema tamagri’ma tamasminia’zana hiho. 6 Higeno keana 6si’a havereti tro hunte ti afi kavo Juda vahe’mokizmi avu’avapina kavofinti ankehi’za tina fre’za avu sese nehazane, tina mago 100 lita azeritere huga tin kavorami me’ne. 7 Jisasi’a eri’za vahe huzmanteno Ana kavo zagafi ti ome afi viteho hige’za tina ome afi vite’naze. 8 Higeno Jisasi’a anage hu’ne, Anampinti mago’a afita ne’zante kva hu’nea nera ome amiho, hige’za afi’za ome ami’naze. 9 Ana ne’mo tima neno keana waini ti fore higeno, igati efore hu’neo antahino keno osu’ne, (hagi tima omefi’naza vahe’mo’za antahiza ke’za hu’naze), kavete kva hu’nea ne’mo aravema hia ne' asmino, 10 maka vahe’mo’za pusante knare wainia tagi zamige’za kema hazage’za, aza vahe’mo’za netageno, anante evurami’nea wainia tagi zamige’za nenaze. Nehazanagi kagra knare wainia ante’nanteti menina eri fore hane! 11 Ama kaguvazana Agra’a ese erigafa huno Jisasi’a Galili kaziga Kana kumate nehuno, Agri’a hihamu masa zama’a eri ama hige’za, Agri amage nentaza disaipol naga’mo’za Agrite zamentinti hu’naze.

Avurga asu' hu’nea ne’mofo naneke

1 Hagi anama Jisasi’a vugatereno nevuno, mago nera reranku’afinti avu asuhu’nea ne' kasente’nea omege’ne. 2 Agri’ma amage nentaza disaipol naga’mo’za antahige’za, Rempi hurami ne’moka (Rabbai) aza kumira hu’negeno ama avu asuhu nera kasente’ne, agra’afi nererapi nefa’e? 3 Hazageno Jisasi’a amanage huno kenona hu’ne, Ama ne’mo kumira osigeno, nerera nefa’a kumira osu’ne. Hu’neanagi e’i zama fore hu’neana Anumzamofo eri’zamo agripinti eriama hanigu e’inahu hu’ne. 4 Hunantege’na e’noa ne’mofo eri’zana, tagra zagema me’nesire Agri eri’zana erisune. Hanima esigeno’a mago vahe’mo’a erizana e’origahie. 5 Nagrama ama mopafima emani’noa kna’afina, Nagra ama mopafi vahe’mofo Tavire. 6 Anage Agra huteno, mopare avetu heno eri igri huno, higogna huteno, ana mopa tarega avure frenenteno, 7 amanage huno asami’ne, Vunka Siloamu tirupi ti omefro. (Siloamue hu’nea kemofo agafa’a, huntegeno vu’ne hu’ne.) Ana hutegeno vuno ti ome freteno, avurga hari higeno mika’zana negeno e’ne. 8 E’ina hige’za, ana ne’mofo tavaonte nemani’za vahe’mo’zane, ana ne’mo ke’zatino meme nehige’za negaza vahe’mo’zanena amanage hu’naze, Ama ne’mo mani’neno kezatino meme nehigeta negona nepi ru nere? 9 Mago’amo’za anage hu’naze, Ama ana nere nehazageno, mago’amo’za hanaveti’za anage hu’naze, A’o agra ana ne' kna’nehie. Ana ne’mo huno, Nagra ana ne' mani’noe, huno zamasmi’ne! 10 Zamagra anage hu’za antahige’naze, Inankna hankeno kavurga eri hari hugante’ne? hu’za agenoka hu’naze. 11 Agra ana ke’nona anage hu’ne, Mago ne’ma Jisasi’e nehaza ne’mo, mopa erino tinuti eri igri huteno navurgare frenanteno, amanage huno nasmi’ne, Siloamu vunka tirupi omefro hige’na, vu’na tina ome frogeno, navu ragamo’a hari hige’na navua ke’noe. 12 Hige’za zamagra ana ne’ku anage hu’naze, Kavuma eri so’e hu’nea nera inantega mani’ne? Hazageno avuma azeri harima hunte’nea ne’mo’a, Nagra onke’noe hu’ne.

Jisasi 5 tauseni’a vahe ne’za zami’nea naneke

13 Heroti’ma Jonima ahe fri’nea naneke Jisasi’a nentahino, ana kuma atreno vahe omani’nea ka’ma mopare agrake votifi marerino vu’ne. Vige’za hakare veamo’za nentahi’za maka kumateti eri hantge’za avariri’za mopafi vu’naze. 14 Vu’za uhanatizageno, Jisasi’a ventefinti takaunereno keana hakare vea nezmageno tusi’za huno asunku hunezmanteno kri eri’namokizmi zamazeri so’e hu’ne. 15 Kinaga sege’za, amage nentaza disaipol naga’mo’za Jisasinte e’za anage hu’naze, ama vahe omani ka’ma kopi mani’nonkeno, hago hani hu’za nehianki, ama vahe’zaga huzmantege’za kumatega vu’za, zamagra’a nesaza ne’zana ome miza seho. 16 Hianagi Jisasi’a anage huno zamasmi’ne, Zamagra ovugahazanki ne’zanku keta zaminke’za neho! 17 Hige’za, zamagra anage hu’za Jisasina asmi’naze, 5fu’a bretigi, tare nozaki huta ama eri’none hazageno, 18 Erita eme namiho, huno hige’za eri’za eme ami’naze. 19 Ana vahetmina apepate maniho huno nezmasmino, ana 5fu’a bretine, tare nozara erino, monafi ke’nagamuteno negeno, asomu ke huno susu huteno, bretia korino amage’ma nentaza disaipol naga zamige’za, ana vahetmina zami’ne. 20 Makamo’za ana ne’za nageno zamu hu’ne. Nege’za atrazama’a zogi’za 12fu’a ekaeka kupi zogiri avitente’naze. 21 5 tauseni’a vene’ne nazamo’za ne’naze, hagi a’nene mofavre’zaga ohampri’naze.

Jisasi’a ke higeno timo rurava ahe’nea naneke

35 Hagi ananzupa kinagasegeno Jisasi’a amage nentaza disaipol naga’agura anage hu’ne, Erinketa kantu kaziga tinkenare vamneno huno hige’za, 36 vahe krerfa zamatrete’za Jisasi’ma mani’nea votifi mareri’za vazageno, mago’a ventea zamagrane vu’naze. 37 Nevazageno tusi’a ununko atuno, tina erikranto kranto nehuno, ana votifi timo’a marevite’za higeno, timpi votimo’a tami’za hu’ne. 38 Hagi Jisasi’a votimofona arigarega fita runo mase’negeza, azeri oti’za anage Agrikura hu’naze. Rempi hurami ne’moka, timo’ma tazeri nakri’za nehiana nonkano? 39 Anante otino zaho’mofona kesuno, Tami avazago huno timofona higeno, akoheno urami avazagene. 40 Ana higeno Jisasi’a anage huno zmantahige’ne, Nahigetma amanahu huta koro nehaze? Tamentintia nosazo? 41 Ana nehige’za zamagra tusi’a zamagogo fege’za, inankna ne’mo kea nehigeno zahomo’ene timokea ke’a antahinezmi’e hu’za hu’naze.

25 Hagi mago ara korankria 12fu’a zage kafufi eri’nea a’mo anampi mani’ne. 26 Zago afufenoma’a ana krimoma vagarentesigu atrevagareno rama’a tusa vahe’mofo ome miza hu’neanagi, atage’za amizageno ana kri’amo’a vagaore rura hu’ne. 27 Hagi ana a’mo’a Jisasi agenke antahiteno tusi vea kevufinti, Jisasina amefiti zaza kena’are eme avako hu’ne. 28 Na’ankure antahintahi afina kukena’are ome avako hanugenoke kri’nimo’a atrenantegahie huno nentahino, 29 ome avako higeno ame huno korankrima eri’neazamo’a atrentegeno keno antahino hu’ne. 30 Hagi Jisasina mago’a hanave’amo agripinti nevigeno nentahino, ame huno ana vahe kevufinti rukrahe huno anage hu’ne, Kenani’arera iza avako hu’ne? 31 Higeno Agri amage’ma nentaza disaipol naga’mo’za anage hu’za, mika vahe’mo’za oretufe aretufe hu’nazanki nahigenka, aza navako hu’ne nehane? 32 Hianagi Jisasi’a rukrehe huno keganti kegma huno avako hu’nemofonku hakare’ne. 33 Nehakregeno ana a’mo’a koro nehuno agu’amo’a fakifaki nehigeno kri’ama amane hu’nea zanku nentahino, avuga kepri huno maka kri’amo vagarenteazana huama huno asami’ne. 34 Jisasi’a anage huno ana akura hu’ne, Mofa, kagri ka’a kamentintimo kazeri knare hianki, karimpa frune vugeno krikamo’a atreganteno.

Jisasima negi ne’mofo agu’afinti havi avamu hunte’nea naneke

1 Hagi Ventefi vu’za Galili timofo kantu kaziga’a Gerasin uhanati’naze. 2 Anama Jisasi’a votifinti eneramigeno’a, agru osu havi avamumo agu’afi fre’nea ne’mo’a, ame huno hezamopinti (matipinti) eme tutagiha hunte’ne. 3 Ana ne’mo vahe asenentea kumapi mani’nege’za, mago vahemo’e huno azerino anaki ontege, seni nofinu anaki onte’ne. 4 Na’ankure ana ne’mofona azeriza seni nofi’nu azampi kina renentaza aeni agare azantera kina rente’naze. Hianagi ana ne’mo’a azampine agafinema rente’nea nofira rukampruhu osi osi hu’ne. Ana higeno mago vahe’mo’a hanaveti’za azeri arava hugara osu’naze. 5 Mika zupa hanine, zagene vahe asenentaza kumapine agonaregane vano nehuno, rankege huno, have erino avufa tagarago hu’ne. 6 Jisasi’a afete mani’negeno ana ne’mo negeno, agareno agafi ome renareno, 7 anante ranke huno kezatino, Jisasiga marerisa Anumzamofo Mofavremoka, na’a hurante’za nehane! Nagra Anumzamofo agifi huhanavetina negasamue, tazeri havizana osuo! 8 Na’ankure Jisasi’a havi avamumofonku huno, Ama ne’pintira atiraminka evuo huno hu’negeno’e! 9 Jisasi’a Kagi’a iza’e huno antahigegeno? Nagini’a hakarena mani’noe, Na’ankure tagra rama’a sondia vahe mani’none. 10 Jisasiga amafintira hurantegeta atreta ovamneno huno kazikazi huno asami’ne.

11 Hagi agonamofo asoparega rama’a afu’mo’za ne’za nene’za mani’naze. 12 Ana havi avamumo’za kazigazi hu’za antahige’za, tataregeta antu afutamimofo zamagu’afi uframaneno hu’za hu’naze. 13 Jisasi’a knareki viho huno ana havi avamutamina huzmantege’za, ana ne’mofo agu’afinti atirami’za, afu’mokizmi zamagu’afi ufre’naze. Ana maka afu’tamina 2 tauseni’a afu’mo’za agonaregati tragi’za uramiza zavaniteti timpi takaure’za ti nakri’za fri’naze.

14 Anante afu kva vahe’mo’za koro nehu’za, fre’za vu’za rankumate’ene osi kumate’ene ke huganti hugma hu’za vahera zamasmi’naze. Nezmasmige’za ana veamo’za nentahi’za ana’ma hu’neaza kenaku eri hantage’za e’naze. 15 Jisasinte e’za eme kageno havi avamu’mo’ma agu’afi fre’nea ne’mo’a anante mani’nege’za ke’naze. Kukena nehuno fatgo antahintahi erino mani’nege’za, rama’a havi avamumo agu’afi fre’nea nere nehu’za koro hu’naze. 16 Hagi ana nete’ma fore’msa nehuno afute’enema fore hu’neazama ke’naza vahe’mo’za onke’naza vahe’mokizmi zamasmi vagarage’za antahi’naze. 17 Hagi ana vahe’mo’za Jisasinku hankavetiza, ama mopa atreno vanie hu’za hunte’naze. 18 Hagi Jisasi’a votifi marenerigeno havi avamu’mo’ma agu’afi fre’nea ne’mo’a, natregena kagrane va’neno huno antahige’ne. 19 Hianagi Jisasi’a nagranena ovugahane nehuno, anage huno asami’ne, Kumakarega vunka, vahe ka’afi Ramo’ma asunku’ma huganteno, razama so’eza hugante’nea zankura ome zamasamio. 20 Anage huno asamigeno atreno Dekapolisi 10ni’e nehaza kumate vuno Jisasi’ma knare huno aza hu’nea nanekea zamasmige’za, maka vahe’mo’za nentahi’za antarintru hu’naze.

Kva ne’mofo mofa’ene korankri eri’nea a’mofo naneke

21 Hagi Jisasi’a ete votifima vuno kantu kaziga Galili tiru ankenare’ma umahanatige’za, hakare veamo’za agrite e’za eme regagi ante’naze. Anama hazazanku Jisasi’a anante mani’ne. 22 Anante osi mono nonte kva vahe zagafinti mago ne’mofo agi’a Jairusi’e nehaza ne’mo’a, eno Jisasima eme negeno’a, agafi emaseno, 23 muse hugantoanki, osi mofa’nimo’a fri’za higena neonki, enka kazana agofetu eme antegeno ofrino manino huno antahige’ne. 24 Higeno Jisasi’a ana ne’ene nevigeno tusi’a vahe krerfamo’za otufe atufe hu’za vu’naze.

25 Hagi mago ara korankria 12fu’a zage kafufi eri’nea a’mo anampi mani’ne. 26 Zago afufenoma’a ana krimoma vagarentesigu atrevagareno rama’a tusa vahe’mofo ome miza hu’neanagi, atage’za amizageno ana kri’amo’a vagaore rura hu’ne. 27 Hagi ana a’mo’a Jisasi agenke antahiteno tusi vea kevufinti, Jisasina amefiti zaza kena’are eme avako hu’ne. 28 Na’ankure antahintahi afina kukena’are ome avako hanugenoke kri’nimo’a atrenantegahie huno nentahino, 29 ome avako higeno ame huno korankrima eri’neazamo’a atrentegeno keno antahino hu’ne. 30 Hagi Jisasina mago’a hanave’amo agripinti nevigeno nentahino, ame huno ana vahe kevufinti rukrahe huno anage hu’ne, Kenani’arera iza avako hu’ne? 31 Higeno Agri amage’ma nentaza disaipol naga’mo’za anage hu’za, mika vahe’mo’za oretufe aretufe hu’nazanki nahigenka, aza navako hu’ne nehane? 32 Hianagi Jisasi’a rukrehe huno keganti kegma huno avako hu’nemofonku hakare’ne. 33 Nehakregeno ana a’mo’a koro nehuno agu’amo’a fakifaki nehigeno kri’ama amane hu’nea zanku nentahino, avuga kepri huno maka kri’amo vagarenteazana huama huno asami’ne. 34 Jisasi’a anage huno ana akura hu’ne, Mofa, kagri ka’a kamentintimo kazeri knare hianki, karimpa frune vugeno krikamo’a atreganteno.

35 Anage huno nehigeno’a, osi mono nomofo kva ne' nompinti e’naza vahe’mo’za, Jairusinku hu’za mofa kamo’a hago fri’neanki rempi hurami ne’mofona kna omio. 36 Hianagi anama hazankea Jisasi’a antahi amane nehuno, ana kva nera anage huno asami’ne, Korora osunka kamentinti huo. 37 Nehuno maka vahera maniho hunezmanteno, Pitama Jemisi nefu Joni’ma Jemisima huno zamavarege’za amage ante’za vu’naze. 38 Zamagrama ana mono kva ne’mofo nontema uhanatiza kazana, ranke hu’za tusi zavi krafa hu’za zavira netageno, Jisasi’a zamage’ne. 39 Ana nompima unefreno’a, Na’a higetma ranke hutma zavira netaze, mofavremo’a ofrineanki amane mase’ne. 40 Anagema hiankegura zamagra kiza re’naze. Hianagi miko megi’a huzmantege’za mani’zageno, ana mofa’mofo nererane, nefane nezanevareno amage’ma nentaza disaipol naga’a nezamavareno ana mofa’ma hunaragi antepinka ante’nazafinka ufre’naze. 41 Anante ana mofamofo azante akoheno aze’nerino Talita kum! Zamagri’a kefina osi mofa’moka Nagra kagriku huanki otio hu’ne. 42 Ana mofamo’a 12fu’a zagegafu hu’neakino ame huno otino kana vano hige’za tusi antri hu’naze. 43 Jisasi’a hanavetino ama zankura mago vahere hutma ozmasamiho nehuno, ne’za aminkeno neno huno zamasami’ne.

Jisasima ti avozare vu’nea naneke

22 Amage’ma nentaza disaipol naga ame huno huzmanteno, Ko votifi mareritma kantu kaziga viho nehuno, anampima mani’naza vahekrerfa huzmantege’za vu’za e’za hu’naze. 23 Ana veara huzmantege’za vutageno, Agra agonarega nunamu hunaku mrerino umani’negeno, kinagasegeno Agra’ake anante mani’ne. 24 Anama nehige’za, amage’ma nentaza disaipol naga’mo’za ti amu’nompi nevazageno, hanave zahoko atigeno timo’a kranto kranto huno votia eri rukrahe hu’za hu’ne. 25 Ana nehigeno kotu afa’za nentegeno, Jisasi’a ana ti avozare ne-egeno, 26 amage’ma nentaza disaipol naga’mo’za negageno ti avozare ne-ege’za tusi koro nehu’za, Amanu hankrore nehu’za koro hu’za krafa hu’naze. 27 Hianagi ame huno Jisasi’a anage huno zamasmi’ne, Korora osuta akoheta maniho, ama Nagre, huno higeno, 28 Pita’a anage huno asmi’ne, Ra’moka kagrama mani’nenunka, eno hunka huge’na kagritega va’neno. 29 Higeno Knareki eno! higeno Pita’a votifinti uramino ti avozare Jisasintega vu’ne. 30 Hianagi tusi’a zaho enerigeno negeno koro huno, ana timpi uneramino kezatino, Ramoka nazahuo! 31 Higeno Jisasi’a ame huno azana antegantu ateno avazu nehuno, anage huno asmi’ne, Kagra osi kamentinti hane, Na’a higenka tare kagu kagesa nentahine? huteno, 32 ana votifi marerikeno, zaho’mo amane hu’ne. 33 Ana votifi mani’namo’za Jisasina mono hunente’za, tamage Kagra Anumzamofo mofavre mani’nane hu’za hu’naze.

Jisasi’a aga stinea ne’ma azeri so’e hu’nea naneke

1 Mago’a kna evutegeno Jisasi’a rukrahe huno Kapaneamu nemania kumate emani’nege’za, Jisasi’ma e’ne kema veamo’za antahi’naze. 2 Hagi rama’a vahe krerfamo’za atru hu’za nompine kasante’ene mani titipa nehazageno, mono kea zamasmi’ne. 3 Hagi mago’a vahe’mo’za aga sti’nea ne' avare’za e’naze. Hagi 4'a vahe’mo’za sesenku hu’za erizafa hu’za e’naze. 4 Zamagra zafahu’za ufrega osu’naze, na’ankure rama’a vahe krefamo’za manihiza hazageno, Jisasi’ma mani’nea avamenteti nomuza eri anasege’za, ana nera sesenkufi mase’nege’za nofite azerineza atrageno akoheno urami’ne. 5 Anama hazageno’a Jisasi’a avare’za e’namokizmi zamentinti negeno, agama sti’nea nera amanage huno asami’ne, Ne’nimoka kumika’a apasegantoe. 6 Hianagi anampina mago’a kasegere ugagota hu’naza vahe’mo’za mani’ne’za, anage hu’za zamagu’afina antahi’naze. 7 Na’a higeno ama ne’mo’a kumira atregantoe nehie? Anumzamofo huhaviza hunente! Iza Agra kumira atregantoe nehie, Anumzamoke kumira atrentegahie hu’za antahinaze? 8 E’i anage hu’za zamagesa nentahizageno, Jisasi’a zamagu’afi negeno, ame huno zamasami’ne, Na’a higetma tamaguafina e’inahu antahintahia nehaze? 9 Agama sti’nea nera ina’i kema hanua kemo fru huntegahie. Kumi ka’a atregantoe hanua kemopi, ontinka sesenku ka’a erinka vuo hanua kemo fru huntegahio? 10 Hianagi tamagra antahitama ketma hugahaze. Vahe’mofo Mofavremo’a, ama mopafi vahe’ma kumi’ma atrente hihamua erineankino, kumira atrentegahie. 11 Nagra hugantoanki otinka sesenkuka’a erinka nonka’arega vuo. 12 Higeno ame huno otino sesenku’a eri kofino mika vahe zamure atiramino vu’ne. Nevige’za mika vahe’mo’za zamagogo fege’za, Anumzamofo agi erisaga nehu’za, e’inahu ruzahu ruzahu avu’ava zana nonkonaza erifore nehie, hu’naze.

Lasarusi fri’zamofo naneke

1 Hagi mago nera Lasarusi’e nehaza ne’mo’a kri eri’ne. Agra Betanitire, Maria’ene nenunkna Matake nemani’a kumate nere. 2 Maria’a mananentake masavenu Ramofo agare frenteteno, anu azokateti ana agama eri ho’mu hu’nea a’mofo nesaro kria eri’ne. 3 Ana nanunkna’moke Jisasintega kea atrenteke, anage hu’na’e, Ramoka antahio, Kagrama avesima nentamo’a kri eri’ne. 4 Higeno Jisasi’a ana ke nentahino, anage hu’ne, Ana krimo’a fri kantera avreno ovugahie, na’ankure Anumzamofo ra agi ami’nigeno, ana zantetira Anumzamofo Mofavremo ra agi erigahie.

5 Jisasi’a Matane nenunknane, Lasarusine avesizamante’ne. 6 Hianagi Lasarusi kri eri’ne nanekema hazageno nentahino’a, tare zage’gna anama mani’nea kumate mani’ne. 7 Ana huteno amage’nentaza disaipol nagaku huno, Judia kaziga ete vanune huno zamasmi’ne. 8 Hige’za amage nentaza disaipol naga’mo’za anage hu’za asmi’naze, Rempi hurami ne’moke (Rabbi), Jiu kva vahe’mo’za mensintfama have knonu kahenaku nehzarega, Kagra ete vu’za nehano? 9 Jisasi’a kenona zamire anage hu’ne, 12fu’a kna (aua) mago zagefina omane’nefi? Mago vahe’mo’ma zage ferupima vanuno’a agra traka osugahie, na’ankure ama mopafi masa agra nege. 10 Hu’neanagi mago’mo hanimpima vanuno’a ome traka hugahie, na’ankure masa agripina omne’ne. 11 Anagema huteno, mago’ene Jisasi’a anage hu’ne, Ronetimo Lasarusi’a avu mase’ne, hianagi menina Nagra ome azeri otigahue. 12 Hige’za amage’nentaza disaipol naga’mo’za anage hu’naze, Ramoka, agra avu’ma mase’nesuno’a, knare hugahie. 13 Hagi Jisasi’ma hu’neana, Lasarusi’a ko fri’nea zanku hu’neanagi, zamagrama antahi’zana amne avu mase’nea zanku nehie hu’za antahi’naze. 14 Jisasi’a anante huama huno zamasmi’ne, Lasarusi’a ko fri’ne, 15 Tamagri tamaza hanigu Nagra muse nehu’na, ana kumatera omani’noe, e’ina hanigeta tamagra tamentinti hugahaze. Hianagi erinketa agritega vamneno. 16 E’ina hianagi Tomasi (Didimasi’e hu’neana kugavezare) nehaza ne’mo, magoka Jisasi amage nentaza disaipol nagaku huno, tagranena erinketa vuta Agrane ufri’maneno hu’ne.

Matane, Maria kizni Jisasi’a ke huznami’nea naneke

17 Hagi Jisasi’a ana kumate uhanatino, ome antahiana Lasarusina ko havegampi asentageno, 4'a zagegna evu’ne. 18 Betani kumara Jerusalemi tava’onte 3 kilo mitanaza me’ne. 19 Rama’a Jiu vahe’mo’za e’za Matane Maria kiznia, neznasaro fri’negeza e’za zname rentinti hu’naze. 20 Jisasi ne-e hia kema Matama nentahino, kantega ome kenaku vu’ne. Hianagi Maria’a nompi mani’ne. 21 Mata’a, Jisasina ome keno anage huno asmi’ne, Ramoka, Kagrama amafima mani’nantesina, nensaro Lasarusi’a ofrisine. 22 Hianagi meninena nagra antahi’noe, na’anku’ma Anumzamofo antahige’sankeno’a, Anumzamo’a anazana kamigahie. 23 Jisasi’a kenona huno asmi’ne, Negsaro Lasarusi’a ete otino asimu erigahie. 24 Mata’a amanage huno Jisasina asmi’ne, Nagra antahi’noe, henkama otisaza zupa vagare knarera, agra otino asimu erigahie. 25 Jisasi’a amanage huno Matana asmi’ne, Fripinti otino asimu erino mani’zamofo agafa’a Nagra mani’noe, iza’o Nagrite’ma amentinti hanimo’a, frigahianagi asimu erino manigahie. 26 Maka vahe’mo’za mani’neza Nagrite zamentinti hanazana, ofri’tfa hugahaze. Amama nehua kegura kagra kamentintia nehampi? 27 Higeno Mata’a anage huno asmi’ne, Izo Ramoka, nagra namentinti hue, Kagra Kraisige, Anumzamofo mofavre’moka Kagra ama mopafi erami’nane.

28 Mata’a anage huteno, vuno nenunkna Mariana sumi huno agesafi asami’ne, Hurami ne’mo’a ne-eno kagriku ke nehie huno asamigeno, 29 ana kema nentahino’a, ame' huno otino Jisasinte vu’ne. 30 Jisasi’a ana kumapina uofreno, kantega Matama omege’nere mani’negeno, Maria’a emege’ne. 31 Anante Jiu vahe’mo’za Maria’ene nompi ame rentinti hu’za mani’nareti, kageno’ma agra ame' huno otino megi’a vige’za, zamagra amage nevu’za, keri’are zavi ome ate’naku nevie hu’za antahi’naze. 32 E’ina higeno, Maria’a Jisasi’ma mani’nere eno eme negeno, agiafi emaseno, anage huno asmi’ne, Ramoka, kagrama amafima mani’nantesina, nensaro Lasarusi’a ofrisine. 33 Jisasima kegeno zavi’ma netegeno’a, ana a’ene e’naza Jiu vahe’mo’zanema zavi atageno, Jisasi’a nezmageno agu’afina tusi’za huno rimpamo’a kna nehigeno, 34 Jisasi’a zamantahigeno, Inantega ana nera asente’naze? Zamagra kenona hu’za Agrira asmi’naze, Ramoka enka emego. 35 Hazageno Jisasi’a zavi' ate’ne. 36 Zamasuma ragiku’ma e’naza Jiu vahe’mo’za anage hu’naze, Keho agrira tusi’za huno avesinte’ne! 37 Hianagi mago’amo’za anage hu’naze, Ama ne’mo avu suhu ne' eri hari hunte’neankino, Agra Lasarusina mago’a zana huntegeno ofrino manisimpi?

Lasarusina kerifinti Jisasi’a azeri oti’nea naneke

38 Anante Jisasi mago’ene, rimpamo’a kna nehigeno ana ne’mofo kerire uhanati’ne. Havega me’nege’za ufrekantera have eri’za runkani re’naze. 39 Jisasi’a huno, Ana have rezahe hutreho, higeno fri’nea ne’mofo nesaro Mata’a anage huno asami’ne, Ramoka, menina kno hi’mana vugahie. Na’ankure 4'a zagegna ko mani’ne. 40 Higeno Jisasi’a anage huno ana ara asmi’ne, Ko kasami’noe, kagrama kamentinti hanunka Anumzamofo hihamu hankave’a (glori) kegahane hu’na kasmi’nofi? 41 Hige’za anankema nentahi’za ana have rezahe hutre’naze. Anante Jisasi’a kesga hunagamuteno, anage hu’ne, Nenfaga, Nagra muse hugantoe, Kagra ke’nia antahi nami’nane. 42 Nagra antahi’noe, hakare zupa keni’a nentahine, hianagi kema nehuana ama oti’za mani’naza vaheku hu’na Nagra nehue. Kagra hunantanke’na e’noe hu’za zamagra zamentinti hanagu nehue. 43 Jisasi’a anagema huteno’a, kezatino Lasarusiga, atiraminka eno! 44 Higeno fri’nea ne’mo atiramino e’ne, agiane, azanena, tavrave nofi’nu ana’neki’za, avugosa tavravenu anovazinageno Jisasi’a zamasmino, Tavarave’a vakneta eri atrenkeno vino.