10 Milagres de Jesus na Bíblia: Lista com versículos e explicação

Jisas nigl kor ere i wain koglo edugwa

1 Okuo, ege suo ede ogo, dumo ta Kana we dimara, distrik Galili suna yogwa i, yagl abu suo ta bogl ibriko, yoba kaya mokna podo ere nenamnedi makai si meglkwa. Ye makai si meglmara suna i, Jisas mam ama moglko, 2 te yoba ye ama Jisas ye duglo beglkwa yagl bogl di gaiglko, wigwa. 3 Ye u suna meglko, yoba kaya mokna nedre, nigl wain nedre, ere meglko, nigl wain dudugwa. Dudugo, Jisas mam pi Jisas moglmara di tedre, Yoba nigl wain nenaiglkwa i, dudumiwe dugwa. 4 Yegl dugo, Jisas di ikne edidre yegl dugwa, Mana yo, ene siragl pre na di natne? Na kimagl eraglka egena ta yeikrumiwe dugwa. 5 Jisas yegl dugwa ba ye mam ere mogl, yugu nem niglmo kogonmo yoba tau meglkwa i di te, yegl dugwa, Na wana ka siragl mere ta ene di tenabuka i, ye dinabere sika si erio di, yegl dugwa.

6 Ana yugu ta yoba makai si meglmara i, nigl migi kobuglo mina bekigwa 6-pela yogwa. Nigl migi i, ye Juda yoba ebrie mabunono pamere i, ogono kaglno nigl koraiglkwa pre yeigo, swara swarade 100 lita mere yegl toide atne edibi, kau sinabuka yogwa. 7 Ana Jisas ere mogl, yugugl i nigl kogon yoba ta meglkwa i di te, yegl dugwa, Ene nigl kogl yu, nigl migi 6-pela i mudu kogl kau sio dugwa. Yegl dugo, nigl kogon yoba ye dumere ere, kogl kau sigwa. 8,9 Kogl kau sigo, Jisas nigl i ere i wain edidre, ye di te, yegl dugwa, Ene nigl migi i mina nigl tau kogl i pi, yagl ta kaya mokna sugl moglkwa i, tebi, ye ne prabiwe dugwa. Dugo, ye tau kogl i pi teigo, yagl i ne prukwa. Yagl i, ye nigl kogon yoba aglo mere kogl yuigwa i ta pre kan erekrukwa ba nigl kogon yoba i keme pre kan erikwa. Ana ye ne prisre, yagl abu suo bogl ibrika yagl i agle dugo, ugwa. 10 Ugo, ye di te, yegl dugwa, Aya, yoba kaya mokna podo yegl neigwa igne, yoba ege ege nigl wain kuglo wakai erukwa i komono kana teigo, neigwa. Mere ne kodigo, ye okuo nigl wain kuglo wakai ta erekrukwa i, yoba nenaiglmedi teime dugwa. Yoba ege ege yegl erikwa, ba ene yegl ta erekitne dugwa. Nigl wain kuglo wakai erukwa i, ene okuo i notniwe di, yegl dugwa.

11 Ana Jisas kimagl yegl erukwa i, dumo Kana, distrik Galili suna yomara i moglsre, erukwa. Te, ye kimagl i koragle ersre, kimagl tau mudu erukwa i, okuo erukwa. Ye kimagl i ersre, yobuglomo ya kagie kade i nogugl edugo, ye duglo beglkwa yagl i kandre, ye pre mediglkwa.

Yagl ta gumuglo kin yogwa i, Jisas ere wakai erukwa

1 Ana ege swara ta Jisas konbauna wan mogl, yagl ta gumuglo kin yogwa i, kanugwa. Yagl i, mam ye kuglmara i, gumuglo kin yogwa. 2 Ana Jisas duglo beglkwa yagl ama yagl i kandre, Jisas di pre, yegl digwa, Tisa yo, ira tadaglme erumara pre yagl i gumuglo kin yome? Yene tadaglme erukwa pai erumo mo ye nem mam tadaglme eribrika pai erume? digwa. 3 Yegl digo, Jisas di ikne ede, yegl dugwa, Yagl i gumuglo kin yogwa i, yene tadaglme erumara plau dikruko, te ye nem mam tadaglme eribrara ama plau dikrukwa ba God ye moglmara kogon podo ta eran, yoba kanaiglkwa pre plau dugwa.

4 God na dedugwa i, kogonmo ere moramga paugwa. I siragl pre erme erimine mere yegl yogwa. Eduer mere yegl yenan, kogon erumun, manabuka. 5 Na makandigle wan moraglka igne, na makandigle yoba abuglageno mere yegl moluwe dugwa.

6 Ana Jisas ka yegl di kodidre, eur si makan mina edugwa. Edidre, ye eur sumara makan gaba tau buglkwa i idre, yagl ta gumuglo kin yogwa i gumuglo mina gaba buglsre, 7 ye di te, yegl dugwa, Ene pi, nigl nubun ta Siloam we dimara i nigl paio! dugwa. Nigl nubun kagie Siloam i, mem paugwa i, Dedugwa. Jisas ka yegl dugo, yagl i ede pi nigl padre, ede ikne ugwa igne, ye gumuglo mina kan pogl sugwa.

8 Ana yagl i, gumuglo u wakai ogo, yoba tau ye kipamara magigl kipaigwa ya ye guma dra okna kanigwa i, di ikne ikne ede, yegl digwa, Yagl i, ye okna konbo bina ame di mogl, mige pre yana di moglkwa ikra moglmkana we digwa. 9 Yegl digo, yoba tau di ikne ede, Kaima, yagl i moglmiwe digwa. Ba yoba tau digwa i, yegl digwa, Ta manugwa. Ye yagl i moglkrukwa ba ye moglmere mere yegl moglkwa pamiwe digwa. Yegl digo, yagl i yegl dugwa, Ta manugwa. Na yagl ikra moluwe dugwa.

10 Yegl di moglkwa pre yoba ye di pre, Siragl eruko, ene gumuglno u wakai ome? digwa. 11 Yegl digo, ye di ikne ede, Yagl ta ye kagie Jisas we digwa i, ye makan gaba tau buglkwa erabedi ersre, gumuglna mina buglkwa. Ye yegl ersre, na di nare, Ene pi nigl nubun Siloam we dimara nigl paio! dugwa. Yegl dugo, na pi nigl paigo, na gumuglna u wakai omiwe di, yagl i yegl dugwa. 12 Yegl dugo, yoba ye di pre, Yagl Jisas i, aglo moglme? digwa. Digo, ye di ikne ede, Na ta kankriwe dugwa.

Jisas bret ake buko didre, yagl 5,000 mere yegl meglkwa i, togwa

13 Ana Herot ye Jon si goglkwa i, Jon duglo beglkwa yoba pi Jisas di teigo, prisre, ye duglo beglkwa yoba bogl yene moramnedi bakugl mina ede nigl Galili koglo ibo dumo wau yomara ta eigwa. Ba Jisas ede aglo mere ogwa i, digo, prisre, yoba mere kide yuguno toglno kide kodo, nigl nubun i winabo di, Jisas tegigl yenamnedi eigwa. 14 Ana nigl koglo ibo plau digo, Jisas ede makandigle pidre, ye yoba mere kide wigwa i, kandre, mitno goglkwa. Ye mitno goglsre, ye tau kide sigwa i, ere wakai ere togwa.

15 Ana Jisas yegl ere moglko, min panagledi erukwa. Eruko, Jisas duglo beglkwa yagl ede magigl pidre, yegl digwa, Dumo magigl i, yugu togl ta yeikruko, min pai kodugwa pre yoba i dedin, ede enaiglmedi prumniwa. Ye ede taun ya yugu togl yomara kaya mokna topo si nenaiglmiwe digwa. 16 Yegl digo, Jisas di ikne ede, yegl dugwa, Yoba ede bage ta enaiglkwa i ta paikrukwa. Ene kaya mokna ta nenaiglmere teo dugwa. 17 Jisas yegl dugo, ye duglo beglkwa yagl aglke kor yegl digwa, No bret 5-pela ya buglo bagle suo keme yomne digwa. 18 Yegl digo, Jisas ye di te, bret 5-pela ya buglo bagle suo i, yu nario dugo, yu teigwa.

19 Ana Jisas duglo beglkwa yagl ye bret ya buglo bagle yuigo, Jisas yoba mere meglkwa i di te, Ene kugl mina ame dio dugo, ye ame digwa. Ame di meglko, Jisas ye bret 5-pela ya buglo bagle suo ikra idre, kan heven ibo ede, God di wakai yei togwa. Di wakai yei tedre, ake buko didre, ye duglo beglkwa yagl yoba i pi tenaiglmedi te pai moglko, ye i pi teigwa. 20 I pi teigo, yoba mudu neigwa, dano eruko, ye bret ya buglo bagle kawa te yogwa i, gade makai sidre, degigl gagl 12-pela gre kau sigwa. 21 Ana yoba bret ya buglo bagle neigwa i, abu gak kerekrikwa ba yagl keme kerikwa i 5,000 mere yegl meglkwa.

Jisas ka dugo, ir waga kudu ugwa bu yogwa

35 Ana ege swara i min paugo, Jisas ye duglo beglkwa yagl di tedre, Nono ede nigl nubun koglo ibo omno dugwa. 36 Ye baglkugl kuglo mogl, ka yegl dugwa pre ye duglo beglkwa yagl yoba mere kide meglmara i kide kodidre, Jisas auro i ede koglo ibo enamnedi baglkugl wagle eigwa. Te, yoba tau baglkugl tau ama idre, pere eigwa. 37,38 Ana ye ede nigle suna eigo, Jisas ye baglkugl mokomugl mogl, ede iko ta yei, ugl pai moglkwa. Ugl pai moglko, ir waga kudu podo ta ugo, nigl si pepigl di, u baglkugl wagle si kau sinagledi erukwa. Yegl eruko, ye duglo beglkwa yagl ye uglo yoko, yegl digwa, Neno Yagle, no goramga i, ene prikitno? di, yegl digwa. 39 Yegl digo, Jisas adiglsre, ir waga kudu ikra ka tedre, nigl sugwa i di te, Kiede moglo! dugwa. Dugo, ir ugwa i dudugo, nigl ama kiede kaima moglkwa. 40 Yegl eruko, Jisas ye duglo beglkwa yagl di pre, yegl dugwa, Siragl eruko, ene kudugl geglme? Ene na yobuglna pre mediglkrimo? dugwa. 41 Jisas yegl dugo, ye duglo beglkwa yagl ye Jisas kuduglmo podo goglsre, yegl digwa, Aya, yagl irane? Ye ir ya nigl akie ka togo, pribriwe di, yegl digwa.

25 Ana yoba eimara suna i, abu ta ogwa. Abu i kide ta sugo, abu ba kanimere yegl, bugla yugu 12-pela bu yeikruko, aimadi kan pai moglkwa. 26 Te, dokta mere meglmara ogwa i, ye ake ple di tenaiglkwa i, manugo, ibun keme yugwa. Te abu i dokta topono te ogwa, migemo dudugwa ba kide ye sugwa i aragan erekre, u podo ogwa. 27 Ana abu i Jisas kamo digo, prukwa pre Jisas yoba mere kide bogl akie eimara i, abu i Jisas mokomugl u ye kuguglmo gaglmo akugwa. 28 Akidre, prukwa i, Na ye kuguglmo gaglmo keme akibo, kidena bu yenabiwe di prukwa. 29 Ana ye gaglmo akugo, bormai ugwa i oglade bu yogo, yene ogo nagie wagle prukwa, kidena bu yomiwe di prukwa. 30 Kidemo bu yogo, Jisas oglade Na yobra tau ede meda omedi prisre, yoba mere meglmara suna kan yake tedre, Ira na gaglna akume? di, yegl dugwa. 31 Dugo, ye duglo beglkwa yagl i ere mogl, Ene siragl pre Ira na akume dine? digwa. Yoba mere bogl akie umga i, ene unara mogl winabo didre, nagn bai, ede wimiwe digwa. 32 Yegl digwa ba Jisas ye abu ta ye gaglmo akugwa i kanagledi kan koglo koglo edugwa. 33 Yegl eruko, abu i ye moglmara siragl plau dugwa i prisre, kudugl gogl, nagie nuglo didre, u Jisas moglmara yage kobragai padre, ye siragl mere erukwa i mudu Jisas di togwa. 34 Di togo, Jisas ye di te, yegl dugwa, Abra yo, ene na pre mediglnga pre kidenen bu yomiwa. Ene den mudun wida dinan, ede enatniwe dugwa.

Murubuglo kide tau yagl ta moglmara suna meglko, Jisas ye di meda edugwa

1 Ana Jisas ye duglo beglkwa yagl bogl nigl nubun Galili ede koglo pidre, Gerasa yoba meglmara eigwa. 2 Eigo, Jisas baglkugl kide kodo ede meda ugwa igne, yagl ta gigl pene yomara pai mogl, ye moglmara ugwa. Yagl i murubuglo kide tau ye moglmara suna meglko, 3,4 yoba geglkwa padiglmara pai wan moglkwa. Te, yoba ege tau mere ogo kagle sen mina si kane sigwa ba ye ege ege sen si biglke dugwa. Yegl eruko, yoba swara ta erme yobuglo ere, ye aglke kor kan wagle mo sen wagle si kane sinabuka kuno erekrukwa. 5 Ye ege ege etne ya eduer yoba geglkwa yeimara ya muglo meglbi wan mogl, kaglkane yei, kobuglo idre, yene ogo nagie wagle bogl biglke dugwa.

6 Ana Jisas eglke iro mogl ugo, yagl i Jisas kandre, muku di ede pi Jisas umara yage kobragai pai, 7 ka podo yegl dugwa, Jisas yo, ene God Mogl Mitna Kaima Ibo Edugwa Wam motnga i, ene siragl mere ere naragledi une? Na God kagie mina ene di prika i, ene giugl narekratnedi priwe dugwa. 8 Ye yegl dugwa i, siragl pre Jisas ye murubuglo kide i di tedre, Ene yagl i moglmara kide kodo, ede meda wio! di yegl di te kodugwa. 9 Ana Jisas ere mogl, Ene kagn dagl naro! dugo, yagl i, Kagna Ami we dugwa. I siragl pre no mere muniwe di, yegl dugwa. 10 Te, murubuglo kide i, Jisas di pre, no di dumo bage eglke ta edekrabedi mogl, kamage yogwa.

11 Ana dumo i muglo meglbi ta yogo, muglo meglbi i mina bugla mere kide yumun ne meglkwa. 12 Ana Jisas ye murubuglo kide ede meda wio dugwa igne, murubuglo kide i Jisas di prisre, Ene no kanige etn, ede bugla meglmara suna enamniwe digo, 13 Jisas pra we dugwa. Pra we dugo, murubuglo kide i, yagl i moglmara kide kodo, ede meda udre, bugla mere kide meglmara suna eigo, bugla mudu i, guglo ta yomara muku di ede atne pi, nigl nubun suna pidre, nigl ne geglkwa. Bugla i, 2,000 mere yegl meglkwa.

14,15 Ana yoba ta ye bugla ikra sugl meglkwa i, ye taragl ta plau dugwa i kandre, muku di pi yoba taun suna kipaigwa ya meda kipaigwa i di teigo, yoba mudu pi taragl ta plau dugwa i kanamnedi ede eigwa. Ye pi Jisas moglmara plau didre, yagl ta murubuglo kide ye moglmara ede meda eigwa i, nomanemo u wakai ogo, ye kugugl gagl ede, ame di moglko, ye kandre, kudugl geglkwa. 16 Kudugl gogl meglko, yoba tau ye siragl taragl bugla mina ya yagl murubuglo kide kau sugwa mina plau dugwa kanigwa i, ye boglo kugl teigwa. 17 Di teigo, prisre, Jisas ye dumono moglkre, ede bage ta enabedi kamage yeigwa.

18 Ana yoba i Jisas yegl di teigo, Jisas ede baglkugl kuglo pidre, ede enagledi eruko, yagl murubuglo kide okna ye moglmara suna meglkwa ikra, u Jisas bogl akie wanabugledi kamage yogwa. 19 Yegl dugwa ba Jisas mane didre, yegl di togwa, Ene ede ikne pi yugun kaminen pidre, Yagl Kade ene siragl mere mitn goglsre, taragl podo ene ere togwa i, yobanma di to di, yegl dugwa. 20 Yegl dugo, yagl i ede pi dumo ta taun 10-pela suna yogwa, kagie 10-pela Taun we dimara suna i pidre, Jisas ye siragl mere ake ple podo di tomere yoba mudu di togo, ye prisre, gagno keglkwa.

Abai gak ta goglko, Jisas ye ere i kor edidre, te, abu ta Jisas gaglmo akugo, kidemo aragan erukwa

21 Ana Jisas nigl nubun Galili mina aglke kor ede ikne koglo ya ugo, yoba mere kide Jisas nigle bina moglmara u makai si, winabo di meglkwa. 22 Ana Jisas ugo, yagl ta kagie Jairus we digwa i, ede Jisas moglmara udre, Jisas kagle mina yage kobragai paugwa. Yagl i ye Juda yoba ka mabuno yuguno ta sugl moglkwa yagle moglkwa. 23 Ye Jisas kagle mina yage kobragai padre, kamage yei, yegl dugwa, Na abra kebra kide sugwa, goragledi erukwa. Ene u akin, ye aragan eran, goglkrabiwe di, yegl dugwa. 24 Yegl dugo, Jisas ye bogl akie ede kipamara enabugledi ebrika.

Ede ebriko, yoba mere kide ye omara, magigl magigl, gagie bai, eigwa. 25 Ana yoba eimara suna i, abu ta ogwa. Abu i kide ta sugo, abu ba kanimere yegl, bugla yugu 12-pela bu yeikruko, aimadi kan pai moglkwa. 26 Te, dokta mere meglmara ogwa i, ye ake ple di tenaiglkwa i, manugo, ibun keme yugwa. Te abu i dokta topono te ogwa, migemo dudugwa ba kide ye sugwa i aragan erekre, u podo ogwa. 27 Ana abu i Jisas kamo digo, prukwa pre Jisas yoba mere kide bogl akie eimara i, abu i Jisas mokomugl u ye kuguglmo gaglmo akugwa. 28 Akidre, prukwa i, Na ye kuguglmo gaglmo keme akibo, kidena bu yenabiwe di prukwa. 29 Ana ye gaglmo akugo, bormai ugwa i oglade bu yogo, yene ogo nagie wagle prukwa, kidena bu yomiwe di prukwa. 30 Kidemo bu yogo, Jisas oglade Na yobra tau ede meda omedi prisre, yoba mere meglmara suna kan yake tedre, Ira na gaglna akume? di, yegl dugwa. 31 Dugo, ye duglo beglkwa yagl i ere mogl, Ene siragl pre Ira na akume dine? digwa. Yoba mere bogl akie umga i, ene unara mogl winabo didre, nagn bai, ede wimiwe digwa. 32 Yegl digwa ba Jisas ye abu ta ye gaglmo akugwa i kanagledi kan koglo koglo edugwa. 33 Yegl eruko, abu i ye moglmara siragl plau dugwa i prisre, kudugl gogl, nagie nuglo didre, u Jisas moglmara yage kobragai padre, ye siragl mere erukwa i mudu Jisas di togwa. 34 Di togo, Jisas ye di te, yegl dugwa, Abra yo, ene na pre mediglnga pre kidenen bu yomiwa. Ene den mudun wida dinan, ede enatniwe dugwa.

35 Ana Jisas ka yegl di moglko, yoba tau ka mabuno yugu sugl moglkwa yagl ikra kipamara mogl, wigwa. Ye udre, yagl i yegl di togwa, Ene abutn goglmiwe digwa. Ene Tisa kogon tau tenatnga i, ta paikrume digwa. 36 Yegl digo, Jisas prisre, ka mabuno yugu sugl moglkwa yagle yegl di togwa, Ene kudugl goglkre, na yobuglna pre mediglo dugwa. 37 Yegl didre, ye yoba mudu akie enaiglkwa i mane didre, Pita, ya Jems ye agigle Jon i keme bogl akie Nono ede enamne dugwa. 38 Yegl dugo, ye ede pi ka mabuno yugu sugl moglkwa yagl i kipamara eigo, yoba mere kide kai ere, kai giglage sidre, taragl podo eriko, Jisas kanugwa. 39 Kandre, ye ede yugugl pi yoba kai ere meglkwa yegl di togwa, Ene siragl eruko, kai ere, taragl podo ere meglme? dugwa. Abai kebra i ta goglkrukwa ba ugl keme pamiwe dugwa. 40 Yegl dugo, yoba ye gauglmo ere teigwa. Gauglmo ere teigwa ba ye yoba mudu i di meda edidre, abai goglkwa i nem mam yebriko, ye duglo beglkwa yagl suota i bogl, abai ikra kiule pai moglmara eigwa. 41 Eigo, Jisas ye abai i ogo akidre, Talita kum! dugwa. Ye ka dugwa i, mabuno yegl paugwa, Abai kebra, adiglo! 42 Ana Jisas yegl dugo, abai i oglade adigl, konbo u ikne ikne ogwa. Abai i, bugla yugu 12-pela nogwa. Ye adigl, konbo u ikne ikne ogo, ye nem mam si puglo di, gagno kiurika. 43 Yegl eribriko, Jisas ye yoba swara ta di te dinabredi mane kaima dugwa. Mane didre, ye kaya mokna ta nenaba, tero dugwa.

Jisas nigl yaudomugl konbauna ede ogwa

22 Ana Jisas ye duglo beglkwa yagl di tedre, Tabre ede bakugl mina pio dugwa. Enene ede okna pi nigl koglo ibo ebi, na yoba mere magigl meglkwa i, di pere pere edinaluwe dugwa. Yegl dugo, ye ede eigwa. 23 Ana Jisas yoba di pere pere edidre, ye swara ede muglo pi kamage eragledi ede ogwa. Ana Jisas yene muglo ibo moglko, min paugwa. 24 Min paugo, ye duglo beglkwa yagl ede u eglke pi nigl suna eigo, ir podo u, nigl si pepigl di bakugl guma mina sugo, bakugl enabuka mere manugwa. 25 Igne i kamun tagenabuka magigl eruko, Jisas nigl yaudomugl egre, ede bakugl pamara magigl ogo, 26 ye duglo beglkwa yagl kandre, kudugl podo gogl, grigle di, Yoba goglkwa ta kiamo umiwe digwa. 27 Yegl digwa ba Jisas oglade yegl di togwa, Ene kiede mogl, kudugl goglkrio! Na wiwe dugwa.

28 Ana Jisas yegl dugo, Pita ere mogl, yegl dugwa, Yagl Kade ene kaima unga panan, ene din, na nigl yaudomugl ene motnara unagliwe dugwa. 29 Pita yegl dugo, Jisas, Ede wo! dugo, Pita baglkugl kide kodo, nigl yaudomugl ede Jisas moglmara enagledi ogwa. 30 Ye kuno ere egre ogwa ba ye ir podo ugwa pre ye kudugl goglko, nigl i atne, atne edugo, ye kaglkane yei, Yagl Kade, na ere yo! dugwa.

31 Pita ka yegl dugo, Jisas tabre ogo ede, ye akidre, yegl dugwa, Ene na pre mediglnga i, kebra paugwa. Ene siragl eruko, kinan suo yome? dugwa. 32 Jisas yegl dugo, ye ede egli bakugl mina ebriko, ir ugwa i, oglade bu yogwa. 33 Ir bu yogo, Jisas duglo beglkwa yagl meglkwa ikra kandre, Jisas kagie kade tedre, Ene ka kaima God Wam motniwe di, yegl digwa.

Jisas yagl ta ogo kagle mawa sugwa ere wakai erukwa

1 Jisas ege tau wan mogl, aglke ede ikne u taun Kaperneam we dimara ugwa. Ugo, yoba ere mogl, Jisas kipamara ikne ume digo, ka wai dugo, 2 yoba mere kide prisre, ede u Jisas yugugl moglmara ikra wigwa. U yugugl ya yugu dramugl i kau si kodigwa. Kau si kodigo, Jisas ye ka mabuno di togwa. 3 Ka mabuno di te moglko, yagl 4-pela ere mogl, yagl ta kagle goglkwa gagle ersre, boglo ere i pi Jisas moglmara eigwa. 4 Boglo ere i pi yugugl enamnedi eigo, yugugl ya yugu dramugl i yoba kau si, gagno bolamugl kaima meglkwa pre ye aglke ede u idaule pidre, idaule taragl tau terke i eglke edidre, yagl i gagle bogl ede atne Jisas moglmara edigwa. 5 Ede atne edigo, yagl wagle Jisas pre mediglkwa i, Jisas kandre, yagl kagle goglkwa i di te, Wana yo, ene tadaglmenen gugl ede teiwe dugwa.

6 Ana Jisas ka yegl dugo, God lomo beke teigwa yagl tau yugugl ame di meglkwa i, prisre, ye nomano wagle yegl di prikwa, 7 Yagl i siragl pre ka yegl dume? Ye God agaimo idre, kagie ere kide erukwa. God swara yoba tadaglmeno gugl edenabiwe di, yegl di prikwa. 8 Yegl priko, Jisas ye deno muduno mina prikwa i, ye nomane mina kwade kandre, yegl dugwa, Ene siragl pre nomano mina yegl di pre meglme? dugwa. 9 Na siragl ka dibo yuwaglke panabedi prime? Yagl kagle goglkwa i di tedre, Tadaglmenen gugl ede teie dibo, yuwaglke panabo mo yagl i di tedre, adigl kuguglnen akidre, konbauna ede po dibo, yuwaglke panabedi prime? 10 Na ene yoba tadaglmeno gugl ede tekrabedi prikwa ba na Yoba Wam moglka i, yoba tadaglmeno gugl ede tenaglka i, kagna paugwa pre erme taragl ta eribo, kan pogl sinaiglmiwe dugwa. Jisas yegl didre, yagl ta ogo kagle goglkwa i yegl di togwa, 11 Na ene di teiga, ene adigl, kuguglnen akidre, ede kipanara po! dugwa. 12 Yegl dugo, yagl i tabre kaima yoba gumuglno mina adigl, kuguglmo akidre, ede meda ogo, yoba kan meglkwa i, gagno koglsre, God kagie kade tedre, yegl digwa, Nono taragl yegl mere okna ta kankrumnere kamniwe di, yegl digwa.

Yagl Lasarus goglkwa

1 Ana aglke ta yagl ta kagie Lasarus we digwa kide sugwa. Ye dumo Betani we dimara kipai moglkwa. Dumo Betani i, Lasarus abauglo suo Maria ya Marta ama kipai meglbrika. 2 Maria i aglke ta kugo nuglo demene wakai erukwa Yagl Kade kagle wagle toide edidre, bre yugo mina kokugwa. Maria i agigle Lasarus kide sugwa. 3 Ana Lasarus kide sugwa pre ye abauglo suo ere mogl, yoba ta dedebriko, ye pi Jisas yegl di togwa, Yagl Kade yo, yagl ta ene boma daguma meglbrika ikra kide sumiwe dugwa. 4 Yegl dugo, Jisas prisre, yegl dugwa, Lasarus kide sugwa i, ye ta gogl dudukrabuka. Ye kide sugwa i, God kagie wanabuka pre erukwa. Te, na God Wam moglka i, ye kide sumara i, na ama kagna wanabiwe di, yegl dugwa.

5 Ana Jisas ye Marta ya Maria ya Lasarus pra, wakai kanugwa. 6 Ye wakai kanugwa ba ye Lasarus kide sugwa i prisre, tabre pi kankrukwa. Ye moglmara ege suo mogl pai moglkwa. 7 Moglsre, ye duglo beglkwa yagl mudu di te, Nono ede ikne distrik Judia, yagl Lasarus moglmara omno dugwa. 8 Yegl dugo, ye duglo beglkwa yagl di ikne ede, yegl digwa, Tisa, edue iga Juda yoba kobuglo si, ene si goramnedi erikwa. Yegl erikwa pre ene erme ede ikne enatno? digwa. 9 Yegl digwa ba Jisas di ikne ede te, yegl dugwa, Kamun tagugwa igne ede pi mim erukwa igne, ade kwia 12-pela yogwa. Yoba ta ade kwia 12-pela suna i konbauna enan, ye ta guglo sikrabuka. I siragl pre abuglage si makandigle edugo, ye kan pogl sugwa. 10 Ba mim eran, yoba ta konbauna enan, abuglage si ye moglmara edekrukwa pre ye guglo sinabiwe di, Jisas yegl dugwa.

11 Jisas ka yegl didre, ye ka ta ama yegl di togwa, Nono kabagleno Lasarus i, ugl paugwa. Ye ugl paugwa ba na ye uglo yokinagledi pre ede ikne omno die dugwa. 12 Yegl dugo, ye duglo beglkwa yagl di ikne ede, yegl digwa, Yagl Kade yo, ye ugl panan, aragan erabiwe digwa. 13 Jisas ye Lasarus ugl pame dugwa i, Lasarus goglkwa pre dugwa ba ye duglo beglkwa yagl prikwa i, ka kaima ugl paugwa pre dumedi prikwa. 14 Yegl prikwa pre Jisas di nogugl ede, yegl dugwa, Lasarus goglmiwa. 15 Te ye goglkwa igne moglkrika i, gun yeiga. Siragl pre na ene we di prisre, na siragl ta eribo, ene na pre medraiglmedi prika. Ana nono ede pi Lasarus i pi yeimara omno! di, yegl dugwa. 16 Jisas yegl dugwa pre Tomas, kagie ta Didimus we digwa i, ye Jisas duglo beglkwa yagl yegl di togwa, Ana, nono ede omno! Yoba ta ere mogl, Jisas si geglbi, nono ama akie goramniwe dugwa.

Jisas ere mogl, Yoba na swara mina adigl u kor pidre, kor moraiglme dugwa

17 Ana Jisas ede dumo Betani magigl ugo, yoba ye di te, Lasarus kobuglo mur yeigwa, ege 4-pela de ede omiwe digo, prukwa. 18 Dumo Betani i, Jerusalem we dimara magigl yogwa. Jerusalem we dimara ede pi Betani i, 3 kilomita mere yegl yogwa. 19 Magigl yogo, Juda yoba mere Marta ya Maria agro goglkwa pre deno muduno aragan erabedi pi kanigwa.

20 Ana Jisas ede magigl ugo, yoba ere mogl, Jisas umiwe digo, Marta prukwa. Prisre, ye tegigl yenabugledi ede pi Jisas umara ogwa. Ye ede ogwa ba Maria yugugl mogl pai moglkwa. 21 Marta ede pi Jisas umara pidre, ye yegl di togwa, Yagl Kade yo, ene magigl i motna, na agra ta goglkruko. 22 Ba na pre kan erika i, erme ama ene God siragl mere di pitn, ye ene dinatnere ere tenabiwe dugwa.

23 Marta ka yegl di kodugo, Jisas ye di te, Ene agitn adigl u kor enabiwe dugwa. 24 Dugo, Marta ye yegl di togwa, Kaima. Ege okuo, yoba mudu adigl u kor enaiglkwa igne, ye ama adigl u kor enabuka i na priwe dugwa. 25 Yegl dugo, Jisas ye aglke kor yegl di togwa, Yoba na swara mina adigl u kor pidre, kor moraiglkwa. Yoba na ta pre mediglsre, goran, ta goglkrabuka. Kor mogl pai morabuka. 26 Te, yoba ta kor moglsre, na pre medran, ye kaima ta goglkrabuka. Na ene di teiga i, ene pre mediglno? Jisas yegl di prukwa. 27 Di pruko, Marta ye di ikne ede te, yegl dugwa, Yagl Kade yo, na pre mediglka. Ene God Wam moglsre, God Yagl ta dedenan, ede makandigle unabe digwa i, ene motnedi pre mediluwe dugwa.

Lasarus goglkwa i pre Jisas kai erukwa

28 Ana Marta ka yegl didre, ye ede ikne abauglo Maria moglmara pidre, ye swara prabedi yegl dugwa, Tisano udre, ene wo dumiwe dugwa. 29 Marta yegl dugo, Maria ka i prisre, tabre adigl ede pi Jisas moglmara ogwa. 30 Jisas ede dumo suna ukrukwa. Ye Marta bogl tegigl yeibrara ikra mogl pai moglkwa. 31 Ana Maria tabre adigl ede ogo, Juda yoba ye dem muduo aragan erabedi gaugl wigwa ikra yugugl moglsre, kanigwa. Kandre, Maria ede kobuglo mur yeimara kai erabuka pre omedi prisre, ye mokomugl sika si eigwa.

32 Ana Maria ede Jisas moglmara pi Jisas kandre, ye Jisas adigl moglmara yage kagle mina kobragai padre, yegl dugwa, Yagl Kade yo, ene magigl i motna, na agra ta goglkruko we dugwa. 33 Maria yegl didre, kai eruko, Juda yoba ye mokomugl wigwa ikra ama kai eriko, Jisas kanugwa. Ye kandre, ye dem muduo yubun dogo, kide kaima prukwa. 34 Ye yegl ersre, yoba di pre, Ene Lasarus ogo nagie aglo yeime? dugwa. Jisas yegl di pruko, ye di ikne ede te, yegl digwa, Yagl Kade yo, ye yomnara kanatna wo digwa. 35 Yegl digo, Jisas kai erukwa. 36 Ye kai eruko, Juda yoba kandre, yegl digwa, Kanio! Ye Lasarus dem muduo kaima tomiwe digwa. 37 Yoba tau yegl digwa ba tau ama ere mogl, yegl digwa, Yagl i yagl ta gumuglo kin yogwa ere wakai ere togwa. Ye ama Lasarus goglkrabedi erabuka pamiba, erekrumiwe di, yegl digwa.

Jisas ye Lasarus ere i kor edugwa

38 Yoba tau ka yegl digo, Jisas dem muduo aglke kor yubun dogo, ye Lasarus kobuglo mur yeimara ede magigl ogwa. Kobuglo dra i, kobuglo paglkane wagle si kegl digwa. 39 Jisas ede kobuglo dra magigl pi, ye yoba di te, Kobuglo dra si kegl digwa i, ake nu si eglke edio! dugwa. Yegl dugo, yagl goglkwa abauglo Marta ye Jisas yegl di togwa, Yagl Kade yo, ye goglkwa, ege 4-pela de ede ogwa pre erme kubuno kide erabiwe dugwa. 40 Yegl dugo, Jisas di ikne ede te, yegl dugwa, Na ene okna di teiga ikra, Ene pre medigln, God yobuglomo podo paugwa i kanatne digra we dugwa. 41 Jisas yegl dugo, yoba kobuglo paglkane ikra ake nu si eglke edigwa. Edigo, Jisas kan mitna ibo ede, yegl dugwa, Nina yo, na ka ta ene erme di praglka i, ene pre kodinga pre na ene di wakai yei teiwa. 42 Na ege ege ene ka siragl mere di prika, ene prisre, dimere ere natnga i, na pre kan ere kodiga ba yoba magigl adigl meglkwa i praiglkwa pre diga. Ye prisre, ene ka kaima na dedinga i, pre medraiglkwa pre diwe dugwa.

43 Jisas ka yegl di kodidre, ye ka podo yegl dugwa, Lasarus, ene ede meda wo! dugwa. 44 Dugo, yagl goglkwa i adigl u kor pidre, ede meda ugwa. Yoba okna ye kobuglo mur yeigwa igne, ogo kagle ya guma dra lap wagle tu sigwa i, pai moglko, ye ede meda ugwa. Ye ede meda ugo, Jisas yoba di te, yegl dugwa, Ene lap pirka si teo. Ye yoko wan morabiwe dugwa.