1 Krais nono kane paikraiglmedi nono ere i meda edugwa. Yegl pre yoba ta lo mina atne kane panaiglmedi eribi, ene adigl gigledi moglsre, mane dio!

2 Prio! Na Pol ene di teiga i, ene God no wakai kanabedi nagino puduo nagie beglbi, Krais ene okuo ta ake ple di tekrabuka paugwa. 3 Ene yagl mudu kor prio. Ene lo duglo boramnedi nagino puduo nagie beglbi, ene God lomo swara ta kodokre, pra pra duglo boraiglkwa paugwa.

4 Ene tau du moramnedi lo duglo beglkwa i, ene Krais bogl si dakagl meglkwa i kodo, ede eglke eigwa. Te, God ene yoko kaima ere wakai ere tomara i, adigl moglkre, yage sigwa. 5 Ba no tau Mudu Murubuglo sika sumga i, God no ere i yoba du kaima edenabedi pre medigl, sugl munga.

6 Nono Krais Jisas yugobunomo munga i, nagino puduo nagie bunga mo boglkrumga mo i, i ta manugwa. Nono pre medigl moglsre, te pre medunara i deno muduno te ikne ikne edinamga, swara taragl podo paugwa.

7 God kamo kaima paugwa i, ene wakai ere sika sidre, muku digwa ba ira ene kinano sugo, yage sime? 8 Ene nomano kide i, God ta tekrukwa. Siragl pre God ene kane pai dinaiglmedi agle dugwa. 9 Yis kuri ta pidre, plaua mudu ake poia dumere mere yegl ka kibi i, ene kanige eribi, ede u podo enabuka.

10 Ba na pre gi diga i, nono Yaglno Kade eran, ene ka kibi prikre, na kana swara pre moraiglmedi prika. Ba yoba ira ta ka mabuno kibi beke te moglkwa i, God ye ka tage tenabuka.

11 Agrama abarama wagle, okna na nagino puduo bolo dimere i, erme di mola, Juda yoba na ta ere kide ere narekriko. Te, yegl ta dia, Jisas ede prak mina goglkwa ka i pi teke pama, na kide pre narekriko. 12 Yoba ene nomane kide tedre, nagino bolo digwa i, i kodo. Yene nagino si keglu sio do!

13 Agrama abarama wagle, ene prio! God ene lo mina atne kane paikre, yoko kaima moraiglmedi agle dugwa. Ba ene kane paikrumnedi prisre, deno muduno goglo duglo boglkrio! Ene yoko kaima munedi prisre, ene ikne ikne wakai kan, niglno kogono ere teo! 14 I siragl pre God lomo paimara i, lo swara ta God lomo mudu bi dugwa. Lo i yegl paugwa,

Ene enene wakai kanimere yegl, yoba ta magigl akie kipanaiglkwa i, ama yegl mere wakai kanio!*

dugwa. 15 Ba ene bugla are mere ikne ikne si nebi, u kide enaiglkwa pre kan kun erio!

16 Na diga i, ene Mudu Murubuglo duglo bogl meglbi, deno muduno goglo pogglau boran, ene ta yage sikraiglkwa. 17 Deno muduno goglo Mudu Murubuglo ake atne edenagledi eruko, Mudu Murubuglo deno muduno goglo ama ake atne edenagledi eruko, eribrika. Ye kuda ikne ikne miurka i pre ene mabuno wakai boramnedi eribi, waragne paugwa. 18 Ba ene God Murubuglomo duglo beglbi, ene lo mina atne moglkraiglkwa.

19 Ana yoba deno muduno goglo duglo beglkwa igne, ye mabuno siragl mere erikwa i, nogugl paugo, kamga. Kumugl abai ya yagl abu ta bogl kunogl nedre, mabuno deglbi yogwa i ersre, mabuno gua gua eriko, kamga. 20 Te, ye god kibi kamage ere tedre, kumo giai erikwa. Te, yene ama ikne ikne kide kan, jelas ere tedre, nonga digwa. Yoba yegl ersre, ama deno podo kubro, si buno di ede pere pere pidre, yene mogl mitna edidre, yoba no kano swara praiglmedi erikwa. 21 Ye yegl ersre, te, yoba pere taraglno bubuno goglsre, spak ersre, spak erimara ama ka kade didre, mabuno gua gua erikwa. Yegl ersre, tadaglme tau mere ama erikwa. Na okna ene di teiga ba aglke kor di tenaglka. Yoba mabuno kide yegl ta ere moraiglkwa i, God yoba kingno mogl, suglno morabara taragl swara ta ikraiglkwa.

22 Ba yoba Mudu Murubuglo duglo beglkwa igne, ye meglmara kogon eruko, ye mogo wakai keglkwa. Ye deno muduno ikne ikne tedre, gun yei, deno muduno wida di idre, deno tabre kubrokre, yoba ere wakai ere te, ye ama ka dimara adigl moglsre, mabuno wakai beglkwa. 23 Te, ye ama kiede mogl, deno muduno goglo i, ake atne edigwa. Mabuno wakai pra pra i, yoba lo ta ere padigl, mane dikrikwa.

24 Ana nono Krais Jisas yobama ta munga i, deno muduno goglo ede prak mina si padunga. Deno muduno goglo mabuno kide wakai pre tedre, eragledi prukwa i, mudu ede prak mina si padunga mere yegl paugwa. 25 Te, Mudu Murubuglo nono ere i kor edugwa pre ye ta di norabere swara duglo boramga. 26 Ba no nono pre mitna edidre, agroma abaroma tau deno buglo yei, jelas ere tekramga paugwa.